耶利米書 15章1節 到 15章21節   背景資料  上一筆  下一筆
Chit章thang清楚看tio̍h猶大瑪拿西王所做ê事,確實是hō͘上帝kah猶大人民關係破裂ê罪魁禍首,mā是上帝siōng無法度原諒ê一位猶大國王。列王記下第廿一章1到17節真詳細地記載猶大王瑪拿西án怎背叛上帝ê旨意,除了tī耶路撒冷聖殿裡設置偶像神明外,伊ê雙手koh khah是沾滿無辜者ê血(參考列王記下廿四:4)。Á瑪拿西卻是猶大歷代國王中在位siōng久長ê一位,總計統治五十五年,mā因為án-ne,伊對猶大人民ê影響非常深遠,尤其是tī宗教心靈上影響koh khah大,伊帶領人民tùi原本敬拜創造萬物ê上帝,改為拜虛假無用ê偶像神明。Tī伊超過半世紀ê統治之下,歷代志ê作者用chit種一句話來形容當時ê kui個猶大景況:「雖然上主警告瑪拿西kah伊ê人民,in iáu是m̄肯聽。」(歷代志下三十三:10)

第1節,「即使摩西kah撒母耳khiā tī我面前向我祈求,我mā不憐憫chiah-ê人」,這清楚顯示出上帝ê心非常疼痛。Chit句mā強化第十四章11節記載上帝對先知耶利米講ê,無koh聽伊為以色列人民祈禱ê聲音,這mā顯示出上帝ê忿怒已經是達tio̍h頂點ê狀態。這mā是耶利米書記載上帝第四pái表示拒絕垂聽先知為猶大人民發出ê任何祈禱聲音(參考七:16、十一:14、十四:11—12)。上帝m̄-nā拒絕聽猶大人民任何祈禱ê聲音,甚至iáu決定kā猶大人民「趕走!叫in tùi我面前滾開」,這lóng teh表明上帝kā掩面無願意koh再看見猶大人民,mā是表明beh放棄祂kah猶大人民ê約。

第2節,thang參考第十四章ê 12節。

Chia提起「病死」、「戰死」、「餓死」等,這三項lóng是先知耶利米信息ê主要內容之一。伊一再強調上帝會用「戰爭」、「饑荒」、「瘟疫」等三種方式來懲罰悖逆ê以色列人民。Tī chia mā增加第四項是「受掠」,表示上帝ê懲罰jú來jú重,上帝ê忿怒已到極點,因為「受掠」mā是teh說明iáu大將會hō͘滅亡,人民chiah會「受掠」去做奴隸。

第3到4節,chit兩節koh khah進一步提起頂面所講「四種災害」ê情景,kah頂面所講四種懲罰相對應。而且特別提起上帝chiah-ni̍h受氣ê原因,就是因為瑪拿西王ê罪。「被刀劍刣死」,這是屬tī戰爭;「被野狗拖行屍體」、「被天空ê飛鳥啄食」、「被野獸吞食」等,這三項lóng tī說明戰死á是餓死、病死ê人,無法度掩埋屍體了後呈現出來ê恐怖景象,hiah-ê屍體khǹg荒郊野外,á是城市街道中chhut-chāi野獸飛鳥啄食、吞食。上帝ài先知耶利米提醒猶大人民,祂tio̍h用chiah-ê嚴厲ê方法懲罰in,hō͘ in連想beh收屍體、埋葬屍體ê機會mā無,因為in會hō͘敵人「擄」去做奴隸。所有chiah-ê事件ê發生lóng只有一個理由:猶大人民m̄-nā棄sak上帝ê教示,mā拒絕聽從上帝忠實奴僕先知ê苦勸。Á這lóng kah「瑪拿西王tī耶路撒冷ê惡行」有關係。

第5到9節,是一首短詩,說明耶路撒冷tú-tio̍h到巴比倫帝國侵犯ê慘狀。

耶路撒冷原本是上帝ê聖城,結果卻是殺害上帝奴僕ê所在,mā是棄sak上帝ê城市,甚至是充滿tio̍h偶像崇拜ê城市,taⁿ tī上帝懲罰下,城裡ê人kā bē得tio̍h任何人ê「可憐」,mā bē為in「悲傷」,向in「問好」。因為in「背離」上帝,而且是「轉身不理」上帝,mā因為án-ne,上帝決定「無koh抑制家己ê忿怒」,決定beh像手the̍h簸箕teh「篩糠秕」一般,kā chiah-ê悖逆ê子民「篩散」,只因為為in「不悔改」認罪。上帝甚至beh hō͘ in「少年力壯ê青年人」戰死戰場,致使「寡婦會比海沙khah chē」,這是非常恐怖ê懲罰。有ê老母會因為「喪失七個kiáⁿ」而「暈倒」到無法度喘過氣來,因為伊所有ê希望lóng破滅,甚至連「殘存ê人」mā無法度留落來。可見上帝ê懲罰確實非常嚴重。

第10節,tùi chit節到第21節ê chit段經文,是先知耶利米kah上帝之間ê對話。第10到12節是先知耶利米提出ê疑問,而第13到14節則上帝ê回答;第15到18節是先知耶利米koh一pái回應上帝,然後第19到21節是上帝回答先知耶利米。

「我老母為何生我?」chit句話mā thang參考第二十章14到15節。表示對性命tú-tio̍h痛苦ê時ê一種艱苦心感受。先知耶利米tī chia提起家己ê孤獨情況是家己「無借錢hō͘別人,mā無向別人借錢」,這表示無kah親友發生金錢上ê糾紛,á是有任何無清楚ê瓜葛,m̄-koh卻遇tio̍h別人ê「詛咒」。

第11到12節,先知耶利米認為家己真盡責,照上帝ê指示去做m̄-nā「盡事奉」ê「職責」,而且iáu為家己ê同胞向上帝「哀求」,m̄-koh卻換來同胞ê無諒解,甚至對伊懷有恨意。M̄-koh事實上是巴比倫帝國kah「銅混合ê鐵」仝款堅硬,會帶hō͘猶大人民慘重ê傷害。

第13到14節,chit兩節是上帝回應先知耶利米所提問ê話。Mā thang參考第十七章3到4節。

無錯,上帝確實是為tio̍h beh懲罰猶大人民tī「全國各地所犯ê罪」,特別差派巴比倫帝國來侵犯in,m̄-nā beh來「掠奪in ê財寶」,mā tio̍h hō͘ in tī「生份ê所在受敵人奴役」,這是上帝對猶大人民ê懲罰。

第15節,chit節到第18節是先知耶利米繼續向上帝發出呼聲。

Tùi chit節thang真清楚提起先知耶利米面臨被謀刣ê危險。有兩種人是先知耶利米所提起想beh殺害伊ê敵人,一是第十一章18到23節先知耶利米伊ê鄉親亞拿突人想刣伊。二是第十八章18節所提起ê,先知耶利米認為hiah-ê專門傳達假信息ê假先知、眾祭司,因為先知耶利米拆破伊ê白賊,致使in想出所有ê辦法beh阻擾伊傳達上帝ê信息,甚至用不實ê罪名控告伊(參考廿六:7—11)。Chiah-ê人包括有聖殿總監巴施戶耳(參考二十:1—2)。

第16節,chit節真可能是teh指主前621年ê背景,約西亞王時代tī聖殿中發見「約」冊(指申命記),niâ後開始進行ê宗教改革運動。先知耶利米指出,就是因為得tio̍h上帝ê律法,人民ê「心內充滿喜樂」kah ǹg望。先知耶利米確實是忠實tī上帝ê奴僕伊講上帝對伊講ê話,「句句我lóng注意聽」,m̄-nā無歪曲上帝ê信息,mā無bē記得上帝ê任何一句話。Chit句「我是屬tī你ê」,是一句立約ê用語,表示出先知耶利米確實是照上帝所交帶ê事去做。

第17節,chit節thang參考第十六章到2節。先知耶利米是單身,m̄-koh soah koh hō͘家己ê同胞敵視,因為án-ne koh khah顯得孤獨。因為所有ê親友lóng離開伊,這hō͘伊陷入了自我「哀怨」ê狀態。

第18節,chit節充分顯示出先知耶利米心中ê艱苦心。伊問上帝「為甚麼不斷受苦」?Chia ê「受苦」,包含被誤解kah被威脅beh殺害伊。伊講這是一種性命ê「創傷」,m̄-koh為甚麼「bē-tàng醫」。伊甚至懷疑上帝ná親像「乾涸ê小溪hit種靠不住」,這表示先知耶利米懷疑上帝bē記得呼召伊ê時ê應允?

第19到21節,chit段經文是上帝回答先知耶利米所提問ê問題,mā是上帝koh一pái堅定先知耶利米ê信心。上帝鼓勵ê方式,是beh先知耶利米悔改,全心óa靠祂,m̄-thang對上帝有懷疑。上帝用「tńg來」、「收留」、「重新」、「歸向」等用詞,lóng teh表示上帝beh重建先知耶利米ê心靈,hō͘伊tī極大ê挫折中,重新koh再出發。上帝ài先知耶利米會記得「只傳達必要ê信息」,上帝iáu-koh看伊是祂所揀選ê奴僕。上帝koh一pái表示beh kah伊「同在」,並且beh「保護」伊ê「安全」,hō͘伊tī眾人面前ná親像「銅牆」一般ê堅強,m̄驚人ê攻擊。M̄-nā án-ne,tī面臨災難來臨ê時,上帝會「tùi邪惡強暴ê人手中」kā伊「搶救出來」。

重新查詢 專卷研經 耶利米書系列
錯誤回報,請聯繫comm[@]fhl.net