耶利米書 14章10節 到 14章22節   背景資料  上一筆  下一筆
Chit段是上帝kah先知耶利米之間ê對話,內容是針對hiah-ê假冒上帝ê名傳信息ê假先知,hō͘上帝非常受氣,m̄-nā beh懲罰假先知,mā beh懲罰hiah-ê拒絕聽從上帝忠實奴僕ê信息,卻去聽從假先知信息ê子民。

Koh講,ná親像頭前已經有提起過ê,先知為家己ê同胞祈禱,是一份責任,是主要ê工作項目之一。Tī第19到22節chit段詩歌中,thang看見先知耶利米koh一pái懇求上帝赦免、赦免猶大人民ê罪過。Chit段詩歌mā是一首懺悔ê詩歌,ná親像本章第7到9節仝款。Tùi chit段祈禱文中,mā thang看出先知耶利米ê偉大,雖然上帝已經對伊講過,kā拒絕koh再聽伊為悖逆ê以色列人民祈禱,m̄-koh伊iáu是繼續為同胞向上帝懇求赦免、赦免。

第10節,「背離」,這是teh指違背上帝之旨意。Á「遊蕩」,是teh指以色列人民去拜偶像神明。「隨家己ê意思」,有另外一種含意,表示in照家己ê想法鑄造偶像神明去拜。因為án-ne,上帝講會永遠「記tiâu in ê過錯」,mā因為án-ne,上帝beh開始懲罰猶大人民ê「罪行」。

第11到12節,thang參考第七章16節。

上帝ài先知耶利米「m̄免求」祂「幫助」猶大人民,因為猶大人民並無真正悔改ê心。就算猶大人民用「禁食」ê方式向上帝祈求,上帝mā bē垂聽in「哀求」ê聲音。即使in獻上「燒化祭kah素祭」(前者是teh指cheng-seⁿ,後者表示五穀雜糧)。上帝iáu是仝款「不接受」。M̄-nā án-ne,上帝iáu koh khah用「戰爭、饑荒,kah瘟疫」chiah-ê極大ê災難來「消滅in」。

其實,而chiah-ê災難lóng是來自戰爭。因為戰爭,田園會遇tio̍h損pháiⁿ,而cha-po͘人mā會為tio̍h beh上戰場相戰,致使荒廢農事無法度從事糧食生產。加上因為phah敗仗而戰死戰場ê屍體無法度掩埋,暴露腐pháiⁿ,引起傳染病。先知耶利米一再提起上帝beh用chit種方式來嚴懲以色列人民,伊總共提起十五次ê chē(參考耶利米書十四:12、廿一:7、9、廿四:10、廿七:8、13、廿九:17—18、三十二:24、36、三十四:17、三十八:2、四十二:17、22、四十四:13),chit三項災難mā ē-sái講是耶利米書ê主題之一。

第13節,聽上帝án-ne講了後,先知耶利米向上帝懇求講,猶大人民是因為聽假先知傳達錯誤ê信息,in講猶大人民會tī chit片上帝賞賜hō͘ in khiā起ê土地頂面「享受太平」,因為án-ne,無可能會發生戰爭kah饑荒ê殘酷事件。

第14到16節,chit段經文是上帝回答先知耶利米ê話。

上帝清楚指出chiah-ê假先知是「假借」上帝ê名義「講白賊」欺騙人民。上帝並無hō͘ chiah-ê假先知看見「異象」,因為án-ne in所預言ê,lóng是in「家己ê幻想」,m̄是真正。為tio̍h án-ne,上帝決定用「戰爭kah饑荒」來戳破chiah-ê假先知ê所傳ê錯誤信息。然後,上帝講假先知固然應該受tio̍h嚴厲而且加倍受ê處罰,m̄-koh,願意聽in傳達假信息ê人mā會遇tio̍h「仝款ê結局」,in kah「bó͘ kiáⁿ ê屍體」會「被hiat-ka̍k tī耶路撒冷街上,無人埋葬」,這是因為in無聽從上帝忠實奴僕先知ê話語kah苦勸所帶來ê結果。

第17到18節,上帝ài先知以利亞kā家己心內ê哀傷hō͘猶大同胞知影,而當伊行到戶外,當伊看見家己ê同胞受tio̍h「嚴重ê打擊」,hit種戰死、「iau餓病倒」,特別是看tio̍h「先知kah祭司照常工作,卻m̄知家己teh無閒kóa甚麼」ê時,先知耶利米ê「目屎日瞑湧流」無停,哀傷到極點。

第19節,先知耶利米m̄相信上帝會「完全棄絕了猶大」,mā bē徹底「討厭錫安ê居民」,先知耶利米有án-ne的確信,是因為伊深知上帝是憐憫、慈悲ê上帝(參考詩篇一○三:8—14)。只要猶大同胞會懺悔,上帝一定會赦免、憐憫。

這是裡所講ê「期待平安」,kah假先知所傳達ê「平安」是完全無仝;先知耶利米所講ê「平安」是有上帝同在。因為只要有上帝同在,就算tī siōng困難ê環境下,也ē-tàng平安地渡過。Á假先知則認為耶路撒冷城既然有聖殿,上帝會為tio̍h祂家己ê面子ê緣故,保護耶路撒冷城免受災難。這是錯誤ê信息,m̄是真正平安。

第20到21節,chit兩節是chit首懺悔詩歌ê中心經文。

先知耶利米替猶大人民承認得罪了上帝,祈求上帝ê憐憫kah赦免。伊代替猶大人人民向上帝講「承認家己ê罪過」,同時mā承認「祖先ê罪惡」,chia ê「祖先」,是teh指tùi離開埃及進入曠野,kah後來進入迦南地ê以色列人民。伊祈求上帝會記得祂所hō͘ ê「應允」,mā就是上帝kah以色列民族之間ê「約」,而這「約」是teh指上帝beh做為以色列民族ê上帝;以色列民族是上帝ê子民。Chit種「約」mā是kui個先知運動中siōng重要ê一個信息。先知耶利米祈求上帝「m̄-thang厭棄」猶大人民,祈求上帝m̄-thang改變這「約」ê關係。

第22節,chit節是teh回應前段第到9節提起嚴重乾旱ê災難。先知耶利米真清楚表達,所有偶像神明lóng無法度hō͘天降落甘霖、雨水,只有上帝chiah有chit種能力。因為án-ne,伊講「咱ê希望在tī你」,chit句話真清楚說明出人ê軟弱kah有限。先知耶利米真清楚teh表達一個觀念:人ê「生kah死」lóng是tī上帝手中,m̄是人ê氣力thang做主。因為上帝是造物主,因為án-ne,一切萬物lóng受tio̍h上帝ê「支配」teh運行,m̄是óa靠人ê氣力thang操控。

重新查詢 專卷研經 耶利米書系列
錯誤回報,請聯繫comm[@]fhl.net