耶利米書 12章1節 到 12章17節   背景資料  上一筆  下一筆
Chit章是一篇哀歌;背景可能是tī巴比倫王尼布甲尼撒帶兵攻打侵入猶大,逼kah約雅敬王臣服ê時期。Tī chit首詩中咱thang清楚看tio̍h先知耶利米所發出ê哀聲,伊teh形容hit種猶大亡國後ê悽慘狀態。另外一方面,先知耶利米mā teh問上帝,為甚麼án-ne m̄聽苦勸ê子民,上帝iáu維護in,hō͘ in繼續囂張得意?

Chit章mā講tio̍h上帝決定hō͘以色列人民受亡國ê苦難,m̄是無原因ê,乃是beh重新改造in,hō͘ in成做忠實ê子民。

第1節,chia先知耶利米講每pái伊向上帝「申辯」伊ê「案情」,每pái lóng是上帝ê「對」,chit種心境ná親像約伯teh陳述ê感受仝款,約伯認為上帝thang提出上千條ê理由,來證明人所犯ê錯(參考約伯記九:3)。

第2節,先知耶利米講只要是上帝「栽種」ê,一定會穩定落來,而且ē-tàng往下「扎根」、「長大,結實」(參考詩篇一:3)。M̄-koh先知耶利米指出chiah-ê以色列人民tī長大了後,就bē記得上帝ê恩典。「in嘴裡常提起」上帝,m̄-koh「心內卻無」上帝(參考五:2,以賽亞書廿九:13、四十八:1),表示in以虛假ê態度敬拜上帝。

第3節,先知耶利米清楚知影上帝是查驗人心內,並m̄是看外表。伊強調上帝「認bat」伊,而且知影伊ê「行為」。伊祈求上帝kā「pháiⁿ人」giú行,就「像giú羊進屠宰場」仝款,一直到審判ê日子來臨。

第4節,「土地iáu koh khah乾旱jōa久」,chit句話kah「田園ê草會枯乾到tang時」是仝款ê意思,lóng mā因為受tio̍h上帝懲罰而土地跟tòe受害,連「飛鳥行獸lóng行光」,這是因為猶大人民iáu認為上帝不在乎in所做ê惡事,因為án-ne繼續活tī罪惡中。

第5到6節,chit兩節是上帝回答先知耶利米頭前第4節ê問題。

Chia用賽跑來做譬喻,ài先知耶利米m̄是beh靠人ê氣力來支撐。雖然伊ê鄉親背叛伊,m̄-koh上帝thang成做伊óa靠ê氣力。雖然伊ê「兄弟親人lóng背叛」伊,聯合起來攻擊伊,m̄-koh mài驚,mā m̄-thang信任in,就算in無講pháiⁿ話,盡講「甜言蜜語」ê話,mā「bē-tàng信任」in。

第7到8節,上帝beh kā猶大人民棄sak,kā in「交hō͘敵人」,雖然in bat是上帝「所疼ê子民」,m̄-koh上帝已經「討厭in」。

第9到13節,chit段經文teh描述上帝決定無koh看顧祂ê選民以色列民族,大災難就會臨到in身上。Chia用「la̍h-hio̍h」teh攻擊「鳥á」、「列國ê統治者摧毀了我ê葡萄園」,致使田園「一片淒涼」,以及「戰禍蔓延大地」,雖然in栽種ê「是小麥,收ê是刺phè;in辛苦耕耘,卻白做無功」等等chiah-ê詞句,lóng是用來形容iáu大將會遇tio̍h ê重大災難。第10節ê「葡萄園」通常是來譬喻以色列民族,tī chia是teh指猶大國,in是上帝所栽種ê葡萄園。Chit節mā thang參考以賽亞書第五章2節。上帝原本栽種ê是siōng好葡萄種籽,卻結出酸澀ê果子仝款。

第14到17節,chit段經文是散文呈獻,kah頭前ê詩歌文體無仝款;chit段經文真可能是tī受掠充軍後ê作品。

先知耶利米講出上帝ê信息,結局有án-ne ê一工,上帝iáu是會伸手kā「猶大搶救出來」,hō͘ in thang「回歸故土」。另外mā預言hiah-ê侵犯上帝子民ê國家,除非in mā承認耶和華是in ê上帝,才能kah上帝ê子民同齊享受上帝賞賜ê繁榮,若無,上帝會懲罰chiah-ê侵犯猶大kah以色列民族ê鄰國身上。

重新查詢 專卷研經 耶利米書系列
錯誤回報,請聯繫comm[@]fhl.net