耶利米書 1章1節 到 1章10節   背景資料  下一筆
Chit章主要teh紹介先知耶利米被上帝揀選ê經過,特別強調上帝揀選伊,並m̄是tī伊成長了後,卻是早tī伊iáu未出世chìn前,上帝就已經計畫beh揀選伊做奴僕,表示上帝是按計畫進行祂拯救ê工作。這mā teh說明當上帝決定揀選一個人來當祂ê奴僕ê時,人是無能力thang推辭,只有ē-tàng順服。Á上帝hō͘被揀選ê奴僕唯一ê保證,就是beh kah祂ê奴僕做伙(參考一:8)。Chit種kah奴僕做伙ê應允,並無表示奴僕bē受苦,卻是hō͘奴僕有夠額堅忍ê心志,不屈服,有剛硬如銅牆鐵壁般ê氣力,thang抵擋會tiâu所有ê惡勢力(參考一:9)。

Chit章mā真清楚說明上帝會透過異象傳達信息,chit種看見異象ê記事,tī先知運動中一再出現,先知耶利米mā不例外。Tī這章ê異象表明有災難來自北方,就是巴比倫帝國ê入侵。

Chit段經文記載先知耶利米被上帝呼召、揀選出來當奴僕ê經過,向猶大人民講話ê時代背景。每一個先知lóng有被上帝呼召ê簡短告白,其中先知耶利米ê siōng特別,伊講當iáu tī母親ê腹中就已經被上帝揀選。換句話講,伊是lóng無拒絕ê機會kah力量。

第1節,「chit部冊是耶利米ê語錄。」chit句話有意表示chit本冊m̄是耶利米家己寫ê,若án-ne,則有可能是伊ê秘書巴錄所記落來ê(參考耶利米書三十六:4—6、11—18、26、32、四十五:1)。Chit節mā紹介先知耶利米ê家族是屬tī「便雅憫」支派ê祭司。因為án-ne,照祭司ê條例,先知耶利米mā是祭司。Kah先知以西結仝款,lóng是出身祭司家族(參考以西結書一:3),卻被上帝呼召出來當先知。

「亞拿突」,這是屬tī便雅憫支派境內四座屬tī祭司亞倫kiáⁿ孫khiā起ê城鎮之一(參考約書亞記廿一:17—18)。Chit-ê城設tī耶路撒冷東北方大約五公里ê所在。今á日ê名稱是「亞拿大」(Anata),是阿拉伯人khiā起ê村鎮。

第2到3節,chit兩節紹介先知耶利米ê時代背景,講是tī「約西亞統治猶大國ê第十三年」,這大約是tī主前627年。照列王記下第廿二章2節ê記載,約西亞王算是一個bē-bái ê君王,作者án-ne評論伊講:「約西亞做上主看做對ê事,跟tòe先祖大衛ê腳步,不偏左不偏右。」甚至講:「tī伊以前,無一個王像伊hit種盡心、盡意、盡力地事奉上主,遵行摩西所頒佈ê律法,tī伊以後,mā無一個王像伊hit種。」(列王記下廿三:25)tī chit時chūn「上主向耶利米講話」,而且是「常常」向耶利米講話。M̄-koh tī「約西亞ê kiáⁿ」約雅敬統治猶大了後ê君王,lóng無想beh聽先知耶利米傳達上帝ê信息,一直到西底家王結束統治,猶大人民「被掠到巴比倫去」做奴隸止,這是tī主前586年。

第4到5節,chia講先知耶利米尚且iáu未生出來,iáu tī母親ê胎中,上帝「已經選召了」伊,chit句話表明上帝早已經有計畫。Tī聖經中類似chit種先知有kúi-nā位,親像先知撒母耳(參考撒母耳記上一:11)、參孫(參考士師記十三:3—5)、行洗禮約翰(參考馬太福音一:13—17),in ê出世lóng kah上帝ê揀選有密切關係。值得注意ê是使徒保羅mā是án-ne告白家己,是tī iáu未出世chìn前就被上帝揀選(參考加拉太書一:15)。

Chia講上帝揀選先知耶利米是beh指定伊「作萬國ê先知」,這「先知」,意思是teh指替上帝傳達信息者。因為án-ne,伊一定tio̍h忠實傳達上帝ê話語(參考申命記十八:18—19,列王記上廿二:14)。

第6節,這是先知耶利米拒絕接受上帝ê呼召。伊講家己「太少年」,「無口才」,chit種話語真親像摩西回應上帝ê呼召仝款(參考出埃及記四:10、六:12)。當先知耶利米用「太少年」一詞來回應ê時,其實真清楚,he是一種逃避、推辭ê意思。上帝揀選人,bē受tio̍h年紀ê影響,就親像上帝呼召亞伯拉罕出哈蘭ê時,亞伯拉罕ê年紀是75歲(創世記十二:4),摩西被呼召ê時,則80歲(參考使徒行傳七:30—35),而上帝呼召先知撒母耳傳話ê時,hit時伊iáu是細漢gín-á(參考撒母耳記上三:8—10)。

第7到8節,上帝回答先知耶利米,ài伊「m̄-thang自認為少年」,上帝揀選伊就是beh「宣佈」上帝ê一切話」,這真清楚表示上帝呼召先知耶利米,是beh伊kā上帝講ê話lóng照實講出來hō͘猶大人民聽。上帝為tio̍h beh堅定先知耶利米ê心,因為án-ne ài伊「mài驚」,祂會kah伊「同在,tio̍h保護伊」,上帝chit種應允先知耶利米ê話,以及ài伊去傳hō͘猶大人民ê話是一再出現(參考耶利米書一:19、十:5、十五:20、三十九:17、四十二:11、四十六:27—28)。

第9節,就án-ne上帝「伸手摸」先知耶利米ê「嘴唇」,這是一種象徵性ê講詞,表示上帝beh「Kā該講ê話khǹg tī」伊ê「嘴中」,先知耶利米只傳講上帝beh伊講ê信息。Mā表示伊所講ê,lóng是出tī上帝ê授與。

第10節,chit節說明先知ài先知耶利米去執行ê工作,就是beh「向萬國萬民做根除、拆毀、破壞、推翻、重建,kah種植ê工作」,這說明先知耶利米一生ê主要工作。Chit句話mā thang清楚看出兩項主要內容:

一是「根除」,了後就續落來tio̍h「種植」。「根除」,這是連根拔起,只有án-ne才能徹底改變。

二是「拆毀、破壞、推翻」,然續後落來是「重建」。Chit部分就是穿插tī「根除」kah「種植」中間。因為「根除」ê時,就需要進行「拆毀、破壞、推翻」ê工作,然後才能「重建」,mā就是重新栽種。
重新查詢 專卷研經 耶利米書系列
錯誤回報,請聯繫comm[@]fhl.net