以賽亞書 66章1節 到 66章11節   背景資料  上一筆  下一筆
Tùi第六十五章開始,是用「上主講」作為基礎,(參考第1、8、13、17、25等節),表明這是上帝beh傳達hō͘祂所揀選子民ê信息,然續後接到第六十六章,繼續出現「上主án-ne講」(參考第1、9、12、17、23等節)chit種語調,koh一pái teh提醒以色列人民tio̍h注意聽上帝所hō͘ ê信息。

第六十六章iáu有一個特別值得注意ê所在,就是tùi上帝ê聖殿開始(參考第1節),mā以敬拜上帝ê聖殿做結尾(參考第20到23節)。會用聖殿作為kui章結構ê主軸,是為tio̍h beh澄清一個基本信仰認知:敬拜上帝,並不在tī人ê手所建造起來ê有形建築物,而tī人心內ê真誠、敬虔。因為án-ne,敬拜ê中心雖然是講耶路撒冷ê殿宇,m̄-koh這耶路撒冷就是第六十五章17到19節所提起ê,是一個「新」建造起來ê耶路撒冷城,he是性命bē受tio̍h威脅ê所在,是用上帝為性命主宰ê快樂園地。

Chit段經文敬拜上帝ê方式kah地點,並不在有形ê聖殿á是現代所謂ê「禮拜堂」,重點是tī tio̍h喜愛聽從上帝ê信息,無論tī tó位敬拜,只要ē-tàng傳達上帝ê話ê所在,就是有上帝ê殿teh敬拜ê人ê心中。Koh講,chit段經文mā講出上帝賜福ê子民,一定會享受ê福氣,作者用婦女有娠臨盆,以及嬰á食老母ê奶,來形容嬰á出世帶hō͘全家人ê歡喜。

第1到2節,chit兩節提起上帝問祂ê子民,ē-tàng為上帝建造「toh種殿宇」hō͘祂作為「tòa所」?這是因為tī以色列人民tńg去故鄉了後,lóng tī為tio̍h建造聖殿而無閒,因為án-ne有人反應建造聖殿成做in ê生活負擔(參考尼希米記五:1—5)。

「天是我ê寶座,地是我ê腳凳」,chit句話參考以賽亞書第四十章22節;歷代志上第廿八章2節。Chia用「天」kah「地」來形容,表示kui個宇宙之空間,lóng有上帝ê同在。Mā表示天地lóng是上帝「親手創造」ê,包括「宇宙萬有」lóng是。

「我看顧謙卑痛悔ê人」,chit句話kah頭前ê建造殿宇有密切關係。上帝所kah意ê,並m̄是外表建築物,卻是心內對上帝ê忠實。「謙卑」,這表示人心中知影家己ê有限kah軟弱,清楚知影家己是「人」,án-ne chiah可能謙卑落來。Chit種人chiah「喜愛聽從」上帝ê話,而聽從上帝ê話,就會享受tio̍h性命ê歡喜(參考六十五:11—13)。

第3到4節,thang參考以賽亞書第一章11到14節。

「講到一般人」,這是teh指不敬拜上帝、拒絕上帝為in性命之主ê人。Chia特別指出「用人做牲祭」ê迦南人,in認為án-ne做thang為大地消除災難,mā會為土地帶來生產作物ê氣力。M̄-koh這是錯誤ê認bat,因為真正會賜福hō͘土地帶來生產豐富五穀ê是上帝,m̄是chiah-ê虛假ê神明。因為án-ne,上帝決定beh「降落siōng驚人ê災禍」,因為上帝「呼叫,in無回答應」,上帝「講話,in m̄聽」,而且是「故意不服從」上帝,而且去做祂「無歡喜ê pháiⁿ事」,就是teh指去拜偶像。

第5節,chit節提起「敬畏上主」,就是對上帝對忠實ê人,mā會tú-tio̍h極大ê侮辱,kah hō͘人所「恨」,甚至是hō͘人「拒絕來往」,陷入孤獨、無助中,chiah-ê lóng tī說明對上帝忠心ê人,mā會tú-tio̍h性命困境,m̄-koh上帝一定會伸手救助。

第6節,chit節是teh回應第5節所講ê,當時hiah-ê悖逆上帝ê人,認為上帝並無會干涉世間ê事,其實不然,上帝對hiah-ê侮辱祂ê人,上帝絕對bē有看kah-ná無看tio̍h、聽而不聞。上帝一定會進行懲罰,chia就提起上帝懲罰帶來ê哀嚎聲音。

第7到9節,chia用婦女有娠生產來形容性命出世做譬喻。先知以賽亞強調從來無發生過ê事就是tī有一個國家tī「一工之內、一下á生落來」,這是teh表示in亡國chiah-ni̍h久,m̄-koh,獨立建國會真緊to̍h發生。就算婦女有娠生kiáⁿ,mā需要有十個月懷胎ê時間,m̄-koh beh建立一個國家應該會需要koh khah長ê時間,m̄-koh chia講「一工之內、一下á」就出現chit-ê國家,表明上帝一定會成就chit件tī人看起來是無可能ê事。

第10節,「tio̍h kah耶路撒冷同齊歡樂」,tī chit chìn前,耶路撒冷城被巴比倫摧毀ê時,是悲傷、痛苦。Taⁿ上帝m̄-nā帶領in tńg去故鄉,而且有能力hō͘ in tùi廢墟中重建chit-ê城,並應允beh hō͘ chit-ê城繁榮成做世界ê中心(參考以賽亞書四十九:19—20)。

第11節,chit節thang參考以賽亞書第六十章16節。

因為上帝beh hō͘耶路撒冷城為萬國聚集敬拜上帝ê中心,因為án-ne,大家lóng會聚集做伙tī chia,hō͘ chit-ê城ná親像老母豐滿ê乳房,有源源不斷ê奶汁流出來仝款。用chit種方式來形容城市繁榮ê景象。

重新查詢 專卷研經 以賽亞書系列
錯誤回報,請聯繫comm[@]fhl.net