以賽亞書tùi第六十到六十二章，lóng是談起上帝對重建耶路撒冷城恢復昔日光輝ê應允。因為耶路撒冷城所代表ê，m̄-nā是以色列chit-ê民族，而且代表上帝ê榮耀。

第1到5節，chit段詩歌是繼續第六十一章10到11節所提起ê，上帝tī耶路撒冷城有奇妙作為，特別提起beh賞賜「救恩」、「公義」hō͘ hit-ê城，ná親像「新郎」kah「新娘」ê榮耀。先知以賽亞Tī chit段信息中，koh一pái強調chiah-ê榮耀ê實現，是上帝所beh hō͘祂子民ê賜福。

Chia一開始就講上帝beh像「公義」ê「日頭照耀」，mā像「火燒」ê「火把」仝款，照亮tī以色列人民身上，hō͘ in teh代表上帝「手裡súi ê華冠」，是上帝心中ê「寵兒」，上帝會koh一pái kah以色列人民訂立「婚約」，過「美滿姻緣」ê生活，因為上帝kah in之間有真深厚ê愛情，如「新郎喜愛伊ê新娘」仝款，上帝就是án-ne「喜愛」以色列人民。

第6到7節，tī耶路撒冷城牆上，上帝會「派駐守望者」，án-ne，hit-ê城就bē koh一pái發生被敵人攻擊ê苦難。「上主會記得伊ê應允」，chit-ê應允就是重建以色列人民荒廢ê家園，並且hō͘ chit間園成做súi ê城市，「萬國」lóng會因為伊ê美而「稱頌」Chit-ê城。

第8到9節，上帝伸出祂有力ê「正手chiù-chōa」，意思是teh指上帝一定會執行ê計畫，絕對bē改變，mā bē拖延時間。因為這表示上帝「決定beh實現伊ê應允」。Á chit-ê應允了兩件事：一是農作物收成家己食。二是勞碌得來ê酒家己lim。以上兩項lóng teh表示以色列人民bē koh再受tio̍h外族ê欺壓、搶奪á是恐嚇，mā不需向外族進貢。因為án-ne，thang「食家己ê食物」，m̄免靠別人施捨、救濟。這是因為有上帝賜福，所以，in會kā chiah-ê美好ê農作收成帶到敬拜上帝ê場所去獻祭，感謝上帝，並且teh聚會ê所在歡欣快樂地「lim家己ê酒」。

第10到12節，參考以賽亞書第三十五章8到9節、第四十章3到4節、第四十九章11節、22節、第五十七章14節。

當上帝帶領受掠ê子民回鄉ê時，故鄉看見ê人lóng會歡欣歡喜地「到城外去」迎接chiah-ê同胞，大家iáu會「造一條大路」、「造一條大道，清除障礙」、「khiā立路標」等，thang hō͘ chiah-ê四散tī世界各地ê以色列人民ē-tàng順利tńg去故鄉。這是因為上帝已經宣告祂ài kā家己ê子民帶領tńg來，chit項宣告teh代表兩個重要信息：一是上帝beh hō͘以色列人民lóng成做「神聖ê子民」（參考六十一：9），mā是上帝「救贖ê子民」（參考六十：16）。二是耶路撒冷城會koh再成做「上帝所kah意ê城」（參考六十：14），mā會hông稱做「上帝不遺棄ê城」（參考五十四：6—8）。