以賽亞書 51章17節 到 51章23節   背景資料  上一筆  下一筆
Chit段經文記載先知以賽亞傳出ê信息,認為南國猶大ê首都耶路撒冷城會hō͘毀滅,是因為上帝對以色列人民受氣所帶來ê懲罰。

第17到18節,一開始先知就呼喊「耶路撒冷ah,醒起來pah」,chit-ê詞tú好kah頭前一再出現ê「注意聽」、「注意聽」相對應。表示以色列人民若是有注意聽上帝ê話,就會醒悟過來,無koh繼續沈迷tī罪惡中。續落來講上帝懲罰猶大人民ê方式ná親像kā in賜福lim了「烈酒」仝款,hō͘ in無法度挺直khiā立,全身「搖搖晃晃」bē穩定,最後是醉倒落去躺tī土腳,只有ē-tàng任人宰割。Kui個國家chhōe bē-tio̍h真正ē-tàng「領導」、「牽引」ê人,結果kan-taⁿ會行向滅亡。

第19到20節,chit兩節真清楚指出耶路撒冷被毀,人民受掠ê情景。Iáu大將會面臨ê「雙重災難」,lóng是因為戰爭所引起。M̄-nā土地被踐踏mā因為án-ne hō͘食物嚴重缺乏,iau餓ê人「tī街頭巷尾昏倒」,這一切lóng是因為「上主ê忿怒」帶來懲罰ê結果。

第21節,chia講猶大國ê以色列人民會「受苦」,是因為「上主懲罰」ê緣故。

第22到23節,chit兩節講上帝beh做出新ê決定,就是beh拯救祂ê子民脫離被壓迫ê苦難。上帝採取ê行動,就是beh hō͘ in「搖晃ê杯挪去」,這杯是上帝「受氣ê時chūn」懲罰祂子民所裝烈酒ê「杯」,tùi taⁿ以後in「用不着koh再lim了」,因為上帝赦免了in。續落來上帝beh kā chit烈酒ê杯轉移「hō͘ hiah-ê」趁機會欺負hō͘上帝懲罰ê以色列人ê強勢者,in所做ê超出上帝所允准ê範圍,無照上帝選召ê旨意,甚至擅做主張過度壓榨以色列人民,就是teh指巴比倫帝國,上帝決定kā chit苦杯換kā in賜福lim。

重新查詢 專卷研經 以賽亞書系列
錯誤回報,請聯繫comm[@]fhl.net