以賽亞書 5章1節 到 5章7節   背景資料  上一筆  下一筆
Chit章共計有三首詩歌,就是第1到7節,形容以色列人民就是上帝所揀選siōng優等ê葡萄樹,栽種tī siōng好ê葡萄園。可惜ê是,以色列人民並無hō͘上帝安心,in反而成為siōng差ê族類。第二首詩是第8到25節,這是對以色列人民ê控訴,tī chiah-ê控訴中,提起六pái「遭殃」ê來臨。第三首詩是tùi 26節到30節,預言外國ê軍隊會來打擊以色列人民,hō͘ in ê國家面臨毀滅ê危機。

Chit首詩歌是kā葡萄園看做像愛人般來描述。M̄-nā án-ne,甚至tī第4節中,葡萄園主人teh反省家己無好好á照顧葡萄園,chiah hō͘原本siōng好ê葡萄樹栽,生出koh酸koh澀ê葡萄?chit種反省ē-sái講是信仰中siōng珍貴ê。

第1節,chit句「為我所親愛ê唱一首歌」,講出上帝kah以色列民族之間有特殊ê感情,就ná親像戀愛中ê情侶一般ê親密。因為án-ne,為愛人唱一首情歌,真親像雅歌中所描述ê仝款。Á「葡萄園」,Tī聖經中lóng是用來譬喻以色列民族。

第2節,「挖土,清除石頭」,這表示開闢葡萄園ê主人,非常用心teh整理,來期待栽種落去「品種優良ê葡萄樹」會結出好ê果子。詩篇第八十篇8節,詩人講chit-ê葡萄樹是「tùi埃及帶出來」ê,這已經真清楚是teh講以色列民族,上帝kā in帶離開埃及奴役之地。先知耶利米講這棵葡萄樹,是「特選ê果子樹,用ê是siōng好ê葡萄種」(參考耶利米書二:21)。葡萄園裡有「造一座高塔」,這是當做「瞭望臺」ê路用,用來看守田園,來預防豺狼á是羊群kah顧羊人進入園內偷食,á是防範仇敵進入園內破壞,chiah-ê作為lóng ē-tàng看出主人ê用心。而且主人「挖了一個踩踏葡萄ê池子」,準備收葡萄後釀酒用。M̄-koh主人怎樣想mā無想tio̍h,直到收成ê時,採收ê葡萄卻是「koh酸koh澀」,kah原本栽種落去ê葡萄樹,是特選「品種優良」ê樹栽無仝,這表示該樹已經變種chiah會án-ne。

第3節,chia講「耶路撒冷kah猶大ê居民」,表示是對南國猶大人民所講ê。Chit-ê主人ài猶大人民「對葡萄園kah我ê事評理一下」,表示這是一件thang公開辯論ê事,絕對bē有任何冤屈、捏造、不實ê假證據。

第4節,葡萄園主人提出伊ê反省問句:為甚麼伊chiah-ni̍h細膩照顧葡萄園,而且是栽種落去siōng好品種,卻會長出「酸葡萄」,卻m̄是伊所期待收tio̍h ê「甜葡萄」?

第5到6節,評理了後,葡萄園主人講「tio̍h án-ne處理」伊ê葡萄園。第一是beh kā保護葡萄園ê「籬笆」hō͘「拔除」。當圍籬拆除了後,馬上會發生問題,he就是「野獸」就ē-tàng入來食園裡ê葡萄。Á當野獸入來後,會因為葡萄真酸,bē-sái食,就會忿怒來致使「糟蹋」、摧毀kui個葡萄園。續落來beh採取ê第二個行動,是無koh開銷時間、金錢去整理此葡萄園,beh hō͘葡萄園長滿「野草」、「蒺藜刺phè」,hō͘葡萄園變成像廢墟一般。「禁止雲降雨水」,就是teh指無水thang灌ak葡萄樹,hō͘葡萄樹漸漸枯焦死。

第7節,chit節說明頭前譬喻所khah強調ê內容,葡萄園指ê是以色列民族,á是以色列chit-ê國家(指iáu未分裂chìn前ê以色列國),而「猶大」是teh指南國ê族群,in原本就是上帝特別揀選出來ê葡萄樹栽。上帝原本「ǹg望in實行正義」,m̄-koh in並無ná親像上帝揀選ê期待hit種,違背上帝揀選in成做祂ê子民ê期待(參考創世記十八:19)。Ná親像栽種好品種ê葡萄樹ê時期待有甜美ê葡萄thang收成,結果卻是結出酸葡萄仝款。

重新查詢 專卷研經 以賽亞書系列
錯誤回報,請聯繫comm[@]fhl.net