以賽亞書 40章1節 到 40章11節   背景資料  上一筆  下一筆
Tùi第四十章開始直到第五十五章,chit段落是用主前第六世紀中葉為背景,談起以色列民族得tio̍h上帝ê救恩,tùi巴比倫得tio̍h釋放tńg來故鄉。主要對象mā tùi亞述轉kah成巴比倫了後ê波斯帝國。

Tī chit段落中thang看tio̍h一個重要單元,就是「上帝奴僕」ê詩歌,包括第四十二章1到4節、第四十九章5到6節、第五十章4到9節、第五十二章13到五十三章12節等等。Tī這四段詩歌中,先知以賽亞所描述ê chit位上帝奴僕,乃是個受苦奴僕。有真chē聖經學者特別kā第四段ê詩歌kah耶穌受難ê記事連結起來看,認為以賽亞書ê chit段詩歌,就是tī預言耶穌ê受難。

這就成做一個真有趣味ê思考話題,當上帝應允受掠ê以色列人民thang重回並建造家園ê時,soah koh出現受苦ê奴僕,這到底teh講出甚麼信息?是m̄是teh傳達一個重要ê信息:當人領受上帝ê救恩後,一定會謹記在心。若無,人遺忘上帝ê恩典後,會曉背叛上帝而害死上帝ê奴僕。

以賽亞書第四十章ē-tàng看出先知信息ê中心:上帝chiah是性命ê主宰。Chit章thang分做三個段落來看,一是第1到11節,這是宣告上帝解救以色列人民ê信息;二是第12到24節,這是說明上帝乃是宇宙萬物ê創造者;三是第25到31節,只有上帝chiah是萬物ê掌權者,是咱性命siōng好ê óa靠者。

Chit段詩歌mā ē-sái講是chit段四十四到五十五章經文ê序曲仝款,作者tī一開始就傳出上帝赦免ê信息,而且一而再、再而三kā祂ê奴僕講,beh kā大好消息大聲叫hō͘祂ê子民知影。這好消息ê中心,就是上帝赦免祂ê子民。聖經作者mā一再表示:當上帝赦免祂ê子民ê時,mā同時teh表示上帝拯救ê時刻來臨。

第1到2節,「Lín tio̍h安慰」,這是上帝發出ê信息,對象是所有聽tio̍h ê hiah-ê人。Chia ê「Lín」,可能是天頂ê使者,是上帝ê奴僕。Tī chia「安慰」一詞是用複數動詞,表示上帝ê「安慰」是豐富有chhun。

「鼓勵耶路撒冷ê人民」,chia ê耶路撒冷ê人民,是teh指hiah-ê無hông掠去巴比倫ê「一kóa siōng窮苦ê人」,mā同時包括hông掠去巴比倫ê人民,in tī巴比倫做奴隸,過奴役ê生活,in ê苦境上帝完全清楚。上帝已經赦免、赦免in ê罪。

第3節,「有一個聲音喊講」,tī chit節出現三pái ê喊叫,另外兩pái tī第6節、第9節。「tio̍h tī荒野為上主預備道路」,這是因為上帝介入了chit項拯救ê工作。祂beh親自帶領祂ê子民tńg去故鄉。無論是tī人煙稀少ê荒郊野外之地,á是「沙漠」地帶,lóng會有上帝同在。

第4節,chit節所用ê句話lóng是古代君王出巡ê時,一定tio̍h做好ê chìn前準備。用這來表示歡迎偉大ê統治者、拯救者beh來到,mā表示極大ê尊敬。

第5節,聖經作者ài用「上帝ê榮耀」表示上帝ê拯救(參考以賽亞書三十五:2)。因為án-ne,chia表示上帝beh用大能ê手,beh拯救以色列人民脫離巴比倫帝國ê統治。這會hō͘「全人類lóng tio̍h看見」,因為這是人類眼中認為無可能ê事,m̄-koh tī上帝手中卻實現了。

第6節,「有一個聲音喊講」,tī第3節ê聲音是beh人去傳達拯救者來臨ê消息,tī chia是beh去傳達另外一個重大消息。Chia ê句話thang翻譯做「聽ah,有人teh大聲講話」。然後聽tio̍h清楚ê命令句講:「去報消息!」而聽tio̍h ê人隨時回應講「報甚麼消息?」Chia先講出「人人lóng像草芥」仝款目nih-á ê性命,雖然mā是súi,m̄-koh卻會瞬間消失去。

第7到8節,chit兩節講出一個中心信息:無論是甚麼人,都無所謂永恆。這說明世間chiah-ê自命偉大ê君王、統治者,雖然伊ê國度有精銳ê部隊,有滿倉庫ê金銀財富,性命mā是仝款有限,真緊lóng會過去。因為「人kah花草無兩樣」,只要上帝吹個東風,就會lian去(參考三十七:27)。只有「上帝ê話永bē改變」,上帝ê話,是真理,mā是創造ê氣力,kah性命ê根源(參考約翰福音一:1—4)。Tī chit世界上,只有ê話ê真理chiah會永遠長存(參考詩篇一一九:89—90)。

第9節,這是第三pái講beh「大聲hoah」。而且喊叫ê內容是關係「好消息」,而這「好消息」是「Lín ê上帝就beh來à」,chit位上帝就是以色列人民拯救者。

第10到11節,chit位「至高ê上主beh帶權柄來臨」,祂beh對hiah-ê欺壓祂子民ê強權國家進行審判。上帝ê「權能」teh代表上帝ê能力,mā teh代表上帝ê審判權,祂beh「拯救」祂ê子民,同時mā tio̍h親自扮演「牧者牧養羊群」,像「慈祥」ê「母羊」teh帶領祂ê「小羊」,hō͘伊無koh失散,á是受tio̍h欺負。

重新查詢 專卷研經 以賽亞書系列
錯誤回報,請聯繫comm[@]fhl.net