以賽亞書 34章1節 到 34章17節   背景資料  上一筆  下一筆
Chit章kah第三十五章通常hông稱做「以賽亞ê啟示」,ná親像第廿四到廿七章仝款。第三十四章主要內容是談及有關上帝ê審判,並且是針對「以東」Chit-ê族群。若án-ne,則背景kah主前586年耶路撒冷被摧毀ê事件有關,hit時當巴比倫帝國圍攻猶大ê耶路撒冷ê時,以東人並無出手協助,卻是tī邊á觀戰,iáu存幸災樂禍ê心,koh khah惡質ê行為是in參與巴比倫帝國ê掠奪,這致使南國猶大人民對以東人ê仇恨koh khah惡化。因為án-ne,第三十四到三十五章,真可能就是以色列人tùi巴比倫tńg來國內了後ê作品。

先知文獻中有一個特色,就是用上帝ê審判做主要題材,然後必定會強調上帝慈悲憐憫ê救恩近óa跟tòe tī審判了後。Chit章就提起上帝怎樣進行祂公義ê審判,祂ê審判有一個特色,就是並且嚴厲,一點mā不含糊。以賽亞書ê作者用chit種筆法teh提醒所有讀者:m̄-thang tī性命ê旅途中疏忽上帝ê審判。無論是位居高官ê統治者,á是一般平民人民,lóng tio̍h注意上帝chiah是真正審判ê主。對tī hiah-ê為非作pháiⁿ,特別是殘害無辜者性命ê人,上帝絕對bē寬待。因為án-ne,tī閱讀chit章經文ê時,一定tio̍h了解:上帝是公義ê,絕對bē放任hiah-ê作惡多端,欺壓苦難者ê人繼續逍遙,上帝ê手tī拯救受難ê子民ê時,祂對懲罰做chiah-ê邪惡ê tāi-chì ê人是絕對bē手軟ê。用chit種觀點來看世事,就比較khah容易進入狀況。

第1節,chit節mā是teh回應第三十三章14到16節,當人想出所有ê辦法tio̍h逃避上帝ê審判ê時,先知以賽亞提出上帝忿怒ê審判出現。伊講上帝chit-má就beh開庭審判,m̄是秘密開庭,卻是公開審判,beh hō͘所有ê人lóng聽得tio̍h上帝ê審判。

Koh講,chia講「萬國ê人民」,是teh kí上帝ê審判,並m̄是只針對某一kóa對象,卻是針對所有ê族群、國家,無例外,大家lóng beh來注意聽上帝ê審判。

第2到4節,chia真清楚講出上帝ê審判,是針對「各國kah各國ê軍隊」,意思是teh指無任何一個國家ē-tàng免除審判,而chia所提起審判ê結果是非常「徹底」,是「徹底殲滅」ê狀態,連天頂ê日月星辰看見lóng會驚惶失色,mā tùi chia thang看tio̍h chiah-ê受懲罰ê對象,in過去所犯ê罪,是jōa-ni̍h-á嚴重。

第5到8節,chia真清楚講出上帝beh懲罰ê對象,就是「以東人」。「以東」,這有一個意思是teh代表「對敵上帝子民ê對象」。Chia提起上帝懲罰ê速度非常緊,ná親像teh獻祭ê時宰殺cheng-seⁿ仝款,手路清氣俐落。

Chia所謂ê「波斯拉」,這是古代以東ê首都,盛產銅礦。為守護國家,以東歷代ê統治者tī建造防禦工事ê時lóng真嚴密。M̄-koh即使防禦工程非常嚴密,上帝決意beh懲罰以東石,伊ê敵人會真緊進入以東,並且進行殘酷ê殺害,逼kah以東lóng無招架餘力,只有ē-tàng任敵人痛宰。這mā是上帝懲罰以東ê一種方式。

第9到10節,chit兩節真清楚指出,以東會徹底毀滅,甚至連原本khiā起ê所在lóng會變成荒涼ê廢墟,ná親像所多瑪kah蛾摩拉仝款(參考耶利米書四十九:17—18)。

第11到15節,chit段經文所提起ê飛禽、動物等,lóng是屬tī無清氣ê族類(參考利未記十一:13—19,申命記十四:12—18)。就親像上帝懲罰巴比倫仝款(參考以賽亞書十三:21—22),taⁿ懲罰以東mā是án-ne,hō͘伊成做廢墟,只chhun chiah-ê無清氣ê飛禽行獸盤踞,m̄是人thang khiā起ê所在。比較khah特別ê所在,作者講懲罰ê嚴重ná親像tńg來到「空虛渾沌,像tī創世以前仝款」,就是tńg來到上帝創造萬物chìn前,一切lóng呈現出「大地混沌」ê樣式(參考創世記一:2)。表示人過去所有ê努力lóng會成做泡影,人mā無koh存在。因為環境已經無koh適合人khiā起。作者用「無王,mā無長官治理in」,chit句話表示兩種意義:其一是tńg來到原點。是teh指一個無人khiā起ê所在,就算有君王、長官,koh有甚麼用?Á是講,人口非常稀少,根本就免得國王,á是有甚麼高官貴族ê管理。其二是真混亂,ná親像「渾沌」仝款。甚麼人mā m̄聽甚麼人,大家各自為政。觸目所及ê,就是一片廢墟、混亂而已,真親像無整理過ê叢林。

第16到17節,「去查考上主ê冊」,表示chit-má所講ê,lóng是過去已經提起過ê事。M̄-koh人並無注意,á是根本就m̄-chhap上帝ê話,chiah致使今á日ê結果出現。M̄-koh chia並無特別指明是toh一kóa冊,m̄-koh tī耶利米書第四十九章7到22節;以西結書第三十五章;阿摩司書第一章11到12節,以及俄巴底亞書等lóng有記載關係上帝beh懲罰以東ê記事。因為án-ne,上帝透過祂ê奴僕先知ê預言中,有關惡行囂張ê以東必定會受tio̍h上帝嚴厲ê懲罰。

重新查詢 專卷研經 以賽亞書系列
錯誤回報,請聯繫comm[@]fhl.net