以賽亞書 23章1節 到 23章18節   背景資料  上一筆  下一筆
Chit章是有關腓尼基人所khiā起ê兩個重要城市—泰爾kah西頓ê信息。久長以來,lóng是地中海海域siōng活躍ê族群,而泰爾kah西頓則ē-sái講是地中海地區貨物ê轉運khiā。Tī siōng興旺ê時代,chit兩個港口所連接ê航運版圖甚至擴展到西班牙。因為án-ne,雖然tī第1節開始就講「是有關泰爾ê信息」,其實,是連同西頓mā列入其中(參考第2節、第4節、第12節)。會用泰爾當做標題,真可能就是因為最後ê第15到18節是用泰爾當做結尾pah。Mā thang án-ne了解:談起泰爾,就會講tio̍h西頓。

第1節,「泰爾」,這是設tī地中海西岸ê重要港口城市。Tī大衛王朝時代,泰爾王希蘭kah大衛王維持非常良好ê外交關係。因為án-ne,當所羅門王續接王位,興建耶路撒冷聖殿kah王宮ê時,就是由希蘭王提供協助,用船隻tùi黎巴嫩運來大量ê香柏木到耶路撒冷,並且由希蘭王提供大量勞工,協助建造聖殿kah王宮ê工程(參考列王記上第五章),kah建立所羅門王商船隊伍,並且幫助以色列帝國訓練航海ê水手(參考列王記上九:26—27)。由此可見,「泰爾」Chit-ê城tùi大衛王朝以後,就kah以色列民族有真親密ê關係。

Chia先知以賽亞傳出ê信息是ài in「痛哭pah」,原因是「房屋kah海港mā被摧毀了」,這teh表示kui個城市lóng會被佔領,會失去自主權。

「基提」,就是teh指今á日ê塞浦路斯這島嶼。Tùi chia tńg來ê船隻,iáu未來到港口,就會聽tio̍h泰爾kah西頓被摧毀ê哭聲,可見tùi兩個城市傳出哀哭ê聲音非常大,震撼了kui個地區ê安寧。

第2到3節,包括第4、12等節lóng有提起「西頓」。Ná親像頭前所敘述ê,chit-ê城kah泰爾是當時siōng出名ê港口城市。Chia講災難m̄-nā tī泰爾發生,mā會降臨在西頓城。Chia講泰爾kah西頓ê商人,「Kā埃及出產ê五穀賣hō͘各國」,chit句話已經指出chit兩個港口城市,就是當時中東kah地中海區域ê貨物轉運khiā。

第4節,原本「西頓」就是一個繁榮ê港口城市,是人人lóng嚮往ê所在。Taⁿ因為tú-tio̍h chit種慘狀,hō͘一切貿易lóng停頓落來。連地中海mā發出聲明,講無koh認「西頓」,就是beh kah它劃清界限。「從來無chhōa過gín-á,mā無生男育女」,這表示斷絕關係ê意思。

第5節,因為埃及是靠泰爾kah西頓ê航海商人輸出轉運物件,雙方關係親密,taⁿ chit兩個城市遇tio̍h án-ne悲慘ê結果,連帶ê是「埃及人」mā lóng有「傷痛」ê感受。M̄-koh「埃及人」ê「傷痛」,可能m̄是因為泰爾kah西頓ê毀滅,卻是為埃及失去商業貿易ê良好伙伴,會失去大好機會,經濟發展kā因為án-ne受tio̍h極大ê影響而發出悲痛ê聲音。

第6到9節,「腓尼基人」,意思是teh指迦南人。Chia mā是teh指泰爾kah西頓這兩城市ê居民。Chit段經文指出in會因受tio̍h敵人強大武力ê攻擊,而出現嚴重ê難民潮,真chē人想beh利用海路「逃到伊施」(西班牙)去避難。當泰爾siōng繁榮ê時chūn,就bat藉tio̍h經濟勢力,擴張了它ê版圖,建立真chē「殖民地ê城」,tī主前第八世紀末葉,甚至tī塞浦路斯、希臘、北非、馬niâ伊、西西里,以及西班牙等,lóng有設立殖民地,koh khah重要ê,就是腓尼基人koh kā文字帶入希臘。M̄-koh卻因為chiah-ê成就hō͘ in真驕傲。「是甚麼人hō͘它tú-tio̍h chit種厄運」,chit句話已經講出聽聞到泰爾遇tio̍h án-ne慘重打擊ê人、seng-lí人、船隊等lóng會發生類似ê問題。聖經一再kā驕傲ê人講,心中是無上帝ê(參考詩篇十四:1),chit種人siōng容易犯一種錯誤,就是認為家己有能力處理,á是做各種事,天下無難得倒伊ê事。為chit-ê緣故,上帝計畫「tio̍h hō͘驕傲ê人變做謙卑」,所用ê方式就是Kā chit種人ê一切lóng收tńg來。

第10到12節,chia真清楚講出「伊施」(西班牙)人民,會因為泰爾ê遭遇而無法度koh再像過去hit種,控制tio̍h西班牙ê政治、經濟活動。原因是上帝有計畫ê進行懲罰泰爾kah西頓ê工作。因為是上帝有計畫ê懲罰,chit時,無論人怎樣逃避都無用,因為上帝是無所不在ê創造主(參考詩篇一三九:7—8)。

第13節,chit節是編者所做ê說明。「是巴比倫人,m̄是亞述人」,chit句話是編者teh說明有一工,會徹底摧毀泰爾ê人,是巴比倫人,m̄是亞述人。編者ê看法是:巴比倫人chiah是真正驚人。尼布甲尼撒王bat率兵攻泰爾城,tùi主前585年一直到主前573年,繼續進攻長到13年時間(參考以西結書廿六:7—21),m̄-koh iáu是無法度攻落hit-ê城。可見hit-ê城防衛上ê堅固。泰爾後來被佔領、摧毀,是tī亞歷山大大帝時代,he是主前332年。

第14節,重複第1節所提起ê警告。

第15到16節,是一首古老ê希伯來人詩歌,描述「妓女」若人老珠黃,除了老顧客會光顧之外,無人客會上門,就算上街去招攬人客mā是仝款無人chhap。值得注意ê是:用「妓女」來形容泰爾,mā有另外一個含意,表明泰爾過去tī商業發達ê時代,充滿tio̍h不正當ê商業貿易,包含tio̍h真chē淫亂、貪婪ê行為夾雜tī貿易行為中。Ná親像現代社會有人利用女色、花酒等類似chit種方式來thàn錢。Koh講,chia ê「妓女」,mā有另外一種含意,表示只知影thàn錢,並無考慮道德良知ê問題。這tùi先知阿摩司ê信息中就thang看會tio̍h(參考阿摩司書一:9—10)。

「被遺忘七十年」,這mā是先知耶利米預言以色列人民會hō͘掠到巴比倫ê時間(參考耶利米書廿五:11—12、廿九:10)。Chia ê「七十」,表明ê是一個「適當」ê時chūn,á是「真長」時間,以及「完成」ê意思,無一定是真正數字。不過mā有可能是teh指主前701年亞述大帝西拿基立,率兵攻打巴勒斯坦等地開始,泰爾kah其它巴勒斯坦地區ê城市lóng遇tio̍h威脅,直到主前630年代,亞述開始衰微,對巴勒斯坦kah附近地區ê城邦,已經會失去控制能力止。主前612年巴比倫消滅亞述,tùi主前630年到612年chit段期間,hō͘泰爾kah西頓有目nih-á恢復ê機會。

(e)「tú好是一個國王ê壽數」,七十是當時ê人看做siōng長壽,mā認為美好ê性命週期(參考詩篇九十:10)。

第17到18節,chit節koh一pái說明「七十年過了後」會恢復泰爾繁榮ê景象。雖然chia講會有「真chē國家向它租用船隻」,m̄-koh chit種景況並無實現,一直等到希臘帝國ê 多利買王朝亞達薛西三世時代,攻落西頓,並tī亞歷山大大帝tī主前332年攻落泰爾城,了後ê希臘帝國時代,為tio̍h海上控制權,以及商業利益ê需要,chiah下令重建泰爾城。

Chia講出kui章ê一個中心信息:驕傲ê人,心中並無上帝。Á人會驕傲,往往是發生tī個人事業á是國家勢力siōng堅強ê時代。相對ê,當人á是國家遇tio̍h無法度承受ê災難後,chiah會發見家己ê渺小、脆弱,需要上帝扶持、帶領。Chit時,人chiah會想tio̍h時刻感謝上帝ê帶領,mā會想beh遵行上帝ê教導kah指引。chit-má ê泰爾,因為經歷過殘酷ê外力摧殘,得tio̍h解救了後,終其尾知影只有óa靠上帝ê帶領、保守,chiah有生機。因為án-ne,重建、恢復起來ê泰爾,已經會曉tio̍h敬拜上帝,尊崇上帝為大。


重新查詢 專卷研經 以賽亞書系列
錯誤回報,請聯繫comm[@]fhl.net