以賽亞書 11章1節 到 11章9節   背景資料  上一筆  下一筆
以賽亞書第十一章thang分做兩個部分:其一就是第1到9節,chit首詩歌是描寫以色列民族kā kah上帝有和好ê關係,這和好並m̄是因為以色列人民主動回歸到上帝面前,卻是上帝特別ê慈愛,祂伸出救援ê手,恢復kah祂子民之間和好ê關係。Á chit種和好關係mā延伸到in所khiā起ê土地。其二是第10到16節,這部分是繼續前段詩歌所講ê,上帝賜hō͘祂ê子民一個全新ê性命ǹg望。這ǹg望是預言上帝kā hō͘ chiah-ê殘存ê人民重新聚集做伙tī故鄉ê土地頂面,彼此之間無koh有「嫉妒」、「仇視」,ná親像前段詩歌所描述hiah-ê殘暴ê野獸,mā kā kah溫馴ê家畜和好相處仝款,上帝mā tio̍h án-ne照顧祂ê子民,ná親像當年祂帶領以色列人民出埃及一般。

以賽亞書tùi第一章到第十二章有四段詩歌,lóng是講tio̍h上帝拯救ê亮光kah ǹg望出現tī祂ê子民面前,這就是:一是第二章2到5節;二是第四章2到6節;三是第九章2到7節,以及第十一章1到9節等等。值得注意ê是,tī chit四首詩歌中,第一、二、四等chit三首真清楚指向南國猶大(參考二:1、3、四:3、5、十一:1),只有第三首詩歌偏向北國以色列。

這是一首希望之歌,因為其中描寫出看起來是已經被焚燬ê樹,發出新ê芽,這是新性命開始ê現象。

    第1節,「耶西」,是大衛ê老父(參考撒母耳記上十六:10—13)。Chia講tio̍h「殘幹上tio̍h抽出嫩芽」,是一種象徵性ê譬喻方式,主要teh強調下半句ê「有一位新王beh tùi伊ê後代興起」。因為chit句話ê緣故,新約時代ê猶太人一直認為tio̍h beh帶領in建立新國度ê領導者,必定是猶大家族ê kiáⁿ孫,原因是大衛王就是屬tī猶大家族。因為án-ne,馬太福音第一章1節teh紹介耶穌ê族譜ê時,特別強調「耶穌基督是大衛ê後代」。

第2節,「上主ê靈tio̍h降tī伊身上」,chit句話thang參考撒母耳記上第十六章13節,chit句話表示上帝kā kah chit位被揀選者同在。Á「智慧、聰明」、「謀略、能力」等等chiah-ê用詞,對照第九章6節所描述ê hit位teh beh來臨ê統治者仝款。Chit位新ê王必定是充滿tio̍h「知識kah敬畏上主ê心」,kah以往ê君王大無相仝。

第3節,「敬畏」一詞,表明ê是tùi心內真實ê遵從,照上帝ê教導而行。Á一位公義ê君王是bē憑「外貌」、不靠「風聞」斷案,因為chiah-ê lóng是本身是一個領導者一定tio̍h有ê基本要求。Án-ne,chiah會有公義ê審判,ná親像大衛tī統治全以色列ê時,就是「秉公行義」(參考撒母耳記下八:15)而得tio̍h人民ê擁戴。

第4節,上帝揀選出來ê奴僕,必定tio̍h用「公道」ê態度治理國家(參考創世記十八:19)。先知以賽亞就bat呼籲以色列民族ê統治者,一定tio̍h beh維護「公道,伸張正義,幫助受壓迫ê,保障孤兒,為寡婦辯護」,「在世間持公道」(參考以賽亞書一:17、四十二:6)。Chit種「保障孤苦無助者ê權益」,就是teh見證君王á是有權勢者對上帝有正確ê認bat(參考耶利米書九:24)。Á對「罪人」kah「邪惡ê人」絕對bē寬待。

第5節,chit位tùi上帝來ê拯救者必定會用「正義治理」人民。同時會以「信實施政」。聖經談起「信實」一詞,所表示ê就是「守約」。說明chit位tùi上帝來揀選ê君王,絕對會誠實信守kah人民ê約定。

第6到9節,chit段詩歌tú好講出一個kah上帝和好ê生活環境。創世記第三章17節談起人犯罪了後,上帝ê懲罰就是連帶hō͘土地受tio̍h詛咒。chit-má kah上帝和好,就是人重新修復kah土地kah地上萬物之間ê關係。這mā說明一個上帝所揀選ê統治者(君王)會改變過去ê生活態度。相對ê,會kā人當做牛馬看待ê君王,絕對bē疼惜所khiā起ê土地kah環境。只有會曉尊重性命價值ê君王,chiah會疼惜土地kah環境。

Chia用「豺狼」、「豹子」、「獅」「熊」、「毒蛇」等動物,chiah-ê Tī聖經通常lóng用來形容殘暴ê性格,teh象徵chit種君王用殘忍、壓迫等手段對待人民。因為án-ne,chit首詩歌tī chia,並m̄是teh描述實況ê生活環境án-ne,卻是用來teh象徵新來ê君王,因為是tùi上帝來揀選之忠實奴僕,因為án-ne,bē koh再像過去hiah-ê殘暴統治者用殘忍、壓迫之手段,卻是會用仁慈對待人民,如同在養飼溫馴ê家禽動物ná般ê善良。因為án-ne,chia用「綿羊」、「小羊」「母牛」、「小牛」、「牛」,以及「食奶ê嬰á」等脆弱不堪一擊ê家畜動物kah嬰á來對照頂面所講凶猛ê野獸動物。這表示過去hiah-ê被殘暴統治ê痛苦經驗bē koh再出現。

第9節,chit節是第6到8節ê結語。Chia講tī敬拜上帝ê地方,bē koh再有傷害性命ê行為出現,卻是充滿tio̍h性命ê活力,ná親像「海洋充滿水」,因為所有ê人lóng「認bat」上帝ê慈愛。

重新查詢 專卷研經 以賽亞書系列
錯誤回報,請聯繫comm[@]fhl.net