以賽亞書 11章10節 到 11章16節   背景資料  上一筆  下一筆
Chit段經文真明顯ê,是對未來景況ê預言,屬tī上帝應允拯救ê預言。指出上帝beh親自帶領流亡tī各國ê以色列子民tńg去故鄉,而且用當年上帝帶領以色列人民行出埃及做譬喻,表示tī人看起來是無可能ê事,tī上帝手中卻是易如反掌,這是上帝賞賜hō͘以色列人民極大ê恩典。

A.第10節,當上帝ê拯救日子來臨ê時,「tùi耶西ê根tio̍h興起一位新王」,chit句話thang有兩種意義,一是teh指猶大家族ê kiáⁿ孫,另外一是teh指以敬畏上帝做中心思想,ná親像當年耶西聽從先知撒母耳ê話語仝款。Chit位teh beh來統治ê「新王」,無koh是用家己做中心,卻是用上帝ê旨意為遵行ê方向,án-ne chiah會hō͘伊ê國家kah國民帶來siōng koân ê榮譽。因為「列國」、「萬民」lóng kā以chit-ê國家為模樣kah學習ê對象,ná親像看見有「旗幟」做記號,並且因為ē-tàng向伊學習而感覺光榮。

第11到12節,chit兩節kah第六章12節是相對ê。原本tī上帝懲罰之下,致使以色列民族四散到世界各地。chit-má則上帝施恩典,beh hō͘這四散ê民族tùi各地tńg來koh一pái聚集。包括tùi「各海島」,就是在地中海沿岸,以及海上ê諸島,以及tùi「亞述」kah「埃及」、「巴特羅」、「古實」、「以攔」、「巴比倫」、「哈馬」等地區ê子民,lóng kā hō͘上帝帶領tńg來故鄉。In lóng thang看見「上主beh升起旗幟」,知影上帝展開行動,拯救祂「四面八方」ê子民「歸回故土」。

第13到14節,雅各hiah-ê過去分裂ê 眾kiáⁿ孫,彼此以後be7 koh有「嫉妒」、「仇恨」,卻是會kah好聯合起來對付來自西邊ê「非利士人」,以及「東方人」。In mā會有夠額ê氣力抵擋「以東kah摩押」,連亞捫人lóng會來「順服」。Chiah-ê lóng teh表明重建了後ê以色列民族,會恢復過去ê興旺成做大國。

第15到16節,chia特別用上主要吹乾「埃及ê海」kah「幼發拉底河」做譬喻,說明上帝早年怎樣帶領以色列人民離開埃及,行過紅海。Taⁿ,上帝mā會親像過去hit種大顯神能,帶領hiah-ê受掠tī外面國ê以色列人民,順利重新「歸回故土」,無任何障礙ē-tàng阻止上帝án-ne做。以色列人民會行tī「一條平坦大道」,無任何危險,因為是上帝親自帶領,ná親像過去衪帶領以色列人民離開埃及仝款。

重新查詢 專卷研經 以賽亞書系列
錯誤回報,請聯繫comm[@]fhl.net