何西阿書 9章1節 到 9章17節   背景資料  上一筆  下一筆
Tī前一章先知何西阿提起以色列「掖種ê是風,收割ê是暴風」(參考八:7),這是上帝對in背叛「約」ê嚴厲懲罰。上帝會án-ne懲罰in,主要是in kā原本敬拜上帝ê祭壇,lóng變成拜偶像ê所在,hō͘本來建造ê祭壇,lóng成了犯罪ê記號。這就是先知何西阿所指責ê「祭壇jú chē,犯罪ê所在mā jú chē」(參考八:11)。以色列人民因為tī迦南地學習tio̍h拜巴力神明,誤認巴力ē-tàng幫助in ê土地增加生產,hō͘ in tī物質生活上koh khah富裕。M̄-koh in chit種行為就kah其它列國人民ê態度仝款,會失去上帝揀選in ê神聖意義。上帝絕對bē隨在祂揀選ê子民繼續án-ne悖逆而去,一定會嚴厲懲罰in。

無論是先知何西阿á是阿摩司、彌迦等,lóng仝款提出警告,就是人心ê墮落並無會因為經濟、物質生活ê富裕有改善,顛倒ê,往往是因為經濟繁榮所帶來富裕ê物質生活,加快人心敗壞ê速度,chit點chiah是值得大家省思ê所在。

第1節,tio̍h以色列人民「m̄-thang狂歡,mài kah異教徒仝款慶祝lín ê節期」,為甚麼先知何西阿會傳出上帝chit種話語?因為早期社會siōng可能舉行節期慶祝、狂歡ê,應該是kah收割後ê收藏節期(指Tòa棚節)有關。利未記第廿三章39到40節記載有關以色列人民舉行Tòa棚節ê時,除了有各項敬拜、獻祭ê禮儀之外,mā tio̍h有「歡欣慶祝」ê活動。而且這慶祝活動長到七工之久。現在何西阿傳出上帝ê信息,講不tio̍h以色列人民koh再慶祝Tòa棚節,因為已經無koh是以前ê樣式,卻是參雜迦南地人祭拜巴力神明ê活動tī內面。有ê甚至是根本分bē清楚到底是teh向上帝獻上感恩,á是teh對巴力神明獻祭。Á迦南人teh慶祝祭拜巴力神明ê時,不時有ê方式之一,就是進行男女歡愛。In是利用chit節期hō͘男女青年做伙進行選擇喜愛ê對象,mā因為án-ne teh慶祝節期活動中不時會有淫亂ê行為發生。因為án-ne,當有異教徒入來參加這慶祝節期活動ê時,真可能就陷入了chit種危險,hō͘以色列ê cha-bó͘-gín-á「像妓女」仝款,tī巴力神明前慶祝了後kah異教徒苟合,有淫亂行為出現。

第2節,聖經真清楚kā咱講,萬物tùi上帝來ê創造kah賞賜,因為án-ne,應該感謝ê對象是上帝。M̄-koh以色列人民teh進入迦南地了後,跟tòe當地原住民學習拜巴力、向巴力獻祭,因為án-ne先知何西阿提醒以色列人民知影:上帝賞賜kā in賜福五穀、雜糧、美酒等民生用品,in既然the̍h chiah-ê去拜巴力神明,講he是巴力神明所賞賜ê,上帝必定bē hō͘ án-ne惡質ê信仰行為繼續落去,祂一定會採取行動,有一工會kā所有ê恩賜收tńg來。Án-ne,in bē koh再有「五穀kah橄欖油」,以及「美酒」thang用。

第3到4節,真清楚提起以色列人民會hō͘亞述帝國侵犯,並且會被帶去亞述帝國做奴隸。所謂「beh tī亞述食無清氣ê食物」,意思就是以色列人民kā成做亞述帝國ê奴隸,食亞述主人提供ê食物。In會親像以前以色列人民ê祖先tī埃及做奴隸仝款,會失去自由,只有ē-tàng tī哀哭中過日子。

Koh講,以色列人民如果被俘虜到亞述帝國去做奴隸,食ê方面就無法度隨心所欲,只有ē-tàng聽從主人ê指示。亞述人民當然會ài chiah-ê以色列人民去做平時一般人無jōa想beh做ê事,包括運送屍體,以及死去ê牛、羊等動物ê屍體。M̄-nā án-ne,亞述人iáu會kā chiah-ê tī以色列人民看起來是屬tī無清氣ê食物kā in賜福食。In如果m̄食,會餓;beh食,卻是宗教禮儀上屬tī無清氣ê食物。問題是:in恐驚連tio̍h講「不」ê機會mā無,原因真間單,如果m̄食,餓一pái、二次,á是允准以,總無法度ta̍k工腹肚挨餓。Á chiah-ê屬tī無清氣ê食物,koh khah無法度用來獻祭。

第5節,「上主ê節期」,指ê就是「Tòa棚節」ê節期活動。Chit-ê節日是以色列人民三大節期之一(另外兩個節期是Pôaⁿ過節、五旬節)。Tòa棚節是teh慶祝收割後舉行,mā是以色列人民siōng kah意ê節期,因為chit節期是一個慶祝、歡欣ê節期(參考利未記廿三33—43)。先知何西阿tī chia提出chit種反問:如果有一工in亡國了,被俘虜到亞述去了,án-ne,tī chit慶祝ê節期內,「in ē-tàng做甚麼?」其實甚麼lóng無法度做。

第6節,提起即使in有辦法逃到埃及去避難,m̄-koh先知何西阿卻指出:直到in死去,mā是無法度tńg來到家己ê故鄉,只有ē-tàng客死異鄉,甚至埋葬tī異鄉。Chia ê「摩弗」,是teh指埃及一個墳地ê名。換句話講,先知何西阿已經teh警告in,亡國ê日子會來臨,而且會有一段真長ê時間,m̄是短短ê幾年而已。In ê「家園,儲藏財寶ê所在,kā長滿刺phè雜草,這意思是國家滅亡了後,故鄉土地kā成做廢墟,荒涼而無koh有人khiā起、管理。

第7到9節,chit段經文講出上帝忠實僕人先知ê境遇,就是除了被排斥外,mā會遇tio̍h殺害。

先知何西阿tī chit短短三節經文中,宣佈上帝「報應」以色列人民ê「日子到à」,就是頭前所講ê,會淪亡tī亞述帝國之下。因為以色列人民m̄-nā不聽從先知ê警告,甚至叫伊「大阿西」,講伊是「 瘋子」、痛恨伊,甚至iáu會設法beh謀害伊。先知何西阿講上帝指派伊做祂ê「代言人」(chit-ê詞表示「先知」ê意思)m̄-koh無論伊到「甚麼所在」,hit所在ê人「lóng tio̍h謀害」伊,甚至連tī敬拜上帝ê地方mā無法度佳哉免得。Chia特別提起「以前tī基比亞ê時仝款」,chit句話ê背景kah士師記第十九到廿一章ê記載有關;he是講述有一個利未人ê細姨,被便雅憫族ê基比亞人輪暴致死ê事件,引起其他以色列十一支派人民聯合起來攻打便雅憫族人。Mā因為chit-ê事件,便雅憫族差一點á就被消滅。先知何西阿提起這事件為例,主要是tī提醒以色列人民,殺害上帝ê先知、僕人,只有帶來koh khah大ê懲罰,而且嚴重ê時,iáu會有被消滅ê可能。

第10到12節,短短ê三節經文,卻講出兩種極大ê對照景象;先知何西阿指出過去以色列kah上帝ê關係是親密切bē-tàng分割,ē-sái講是現在kah上帝之間關係卻已經惡化到à極點。

Chit句「曠野中發現葡萄」,kah民數記第十三章ê歷史背景有關;當以色列人民準備ài進入迦南地chìn前,摩西bat派出探á先去看māi,想beh事先知影到底上帝所講ê流奶kah蜜之地是一個怎樣ê所在。Chiah-ê人tńg來ê報告講:「In 來到以實各ê 山谷,tùi hia剉葡萄樹一支,頂面有一葩葡萄,兩人用槓á 來扛,koh 帶kóa-á 石榴kah 無花果來。 (全民版)」(民數記十三:23)in看tio̍h chiah-ni̍h大串ê葡萄,確實是hō͘人振奮。

M̄-koh另外一面,m̄-koh以色列人民一到「比珥山」開始拜巴力,chit件事ê記載thang參考民數記第廿五章1到5節ê記載,比珥山是設tī摩押ê某一個座山,chia ê巴力神像siōng出名。以色列人民來到什亭谷紮營ê時chūn,kah摩押ê cha-bó͘人行淫,並且接受hiah-ê摩押cha-bó͘人ê邀請參加in祭拜巴力神明,地點就是tī出名ê比珥山(民數記用「比珥」)地方。Chit件事hō͘上帝非常痛恨,摩西為tio̍h息上帝之怒,kā chiah-ê kah摩押cha-bó͘-gín-á行淫ê以色列領袖判處死刑。上帝ê懲罰就是kā in ê光榮the̍h掉。所謂「光榮」,tī以色列人民看起來就是,kiáⁿ孫像天頂ê星hiah-nih-chē。有能力繁衍下一代,就是性命siōng大ê光榮。先知何西阿講上帝beh懲罰以色列人民,嚴重ê程度差不多是到à斷絕in ê後代,hō͘ in無法度繼續存在chit-ê世界。

第13到14節,講出以色列人民被掠到亞述去做奴隸ê時,婦女會tú-tio̍h ê慘痛經歷。M̄是被殺害,就是hō͘強暴,若beh án-ne,不如無有娠會khah好。

第15節,「吉甲」,這是以色列人民第一位君王掃羅被先知撒母耳膏立為王ê所在。Chit-ê所在mā是以色列ê宗教聖地。M̄-koh掃羅後來一方面拒絕聽從上帝ê命令,另外一方面卻ài tī吉甲設祭壇,獻siōng好ê牲祭hō͘上帝,結果先知撒母耳責備(參考撒母耳記上十五:22)。因為án-ne,吉甲雖然是北國以色列ê宗教聖地,卻mā常常常hông當做背叛上帝命令ê記號。

第16到17節,lóng提起上帝bē koh再是以色列人民ê上帝。因為上帝beh拒絕承認以色列人民是祂ê子民。無上帝ê眷顧,等於無性命ê保障仝款,生存就會有危險。Chia特別強調失去上帝ê疼,就ná同樹無根仝款,真緊會枯乾死亡。


重新查詢 專卷研經 何西阿書系列
錯誤回報,請聯繫comm[@]fhl.net