何西阿書 8章1節 到 8章14節   背景資料  上一筆  下一筆
先知何西阿講:上帝kah人之間ê關係是形同「夫妻」一般ê親密切bē-tàng分割。因為án-ne,做一個人對上帝不忠ê時,就表示對上帝不誠實,chit種人,即使用各種kāu枝葉ê敬拜禮儀,mā是枉然,因為這m̄是上帝所喜愛ê方式。先知何西阿就bat kā以色列人民講,m̄-thang想beh用獻牲祭hō͘上帝歡喜,因為上帝根本就無ài人án-ne回應祂。上帝所喜愛ê,就是以色列人民有「堅定ê疼」,永遠bē改變、而且用忠實ê疼回應上帝對in揀選ê疼。可能是主前第八世紀ê北國以色列,人民lóng有chit種心態,就是想用各種祭典禮儀來hō͘上帝歡喜,m̄-koh另外一方面卻走去拜偶像,而且tī社會生活上根本就無活出「聖潔」ê樣式,án-ne m̄-nā無見證出上帝ê疼,反tńg褻瀆了上帝「聖潔」ê名。因為án-ne,先知以賽亞、阿摩司、彌迦等人lóng為chit種背叛上帝之行踏,提出嚴重ê譴責(參考以賽亞書一:11—17,阿摩司書五:21—24,彌迦書六:6—8)。

第1節,「吹警號」,古早時看守城牆ê士兵看tio̍h有敵人來臨ê時,一定tio̍h吹警號,負責吹警號ê人就是「守望者」(參考以西結書三十三:1—10)。「敵人kah-ná la̍h-hio̍h突擊」,chia先知何西阿所講ê「敵人」是teh指亞述,它會來攻擊上帝所賞賜hō͘以色列人民,並且beh佔領以色列人民所khiā起ê土地,原因是以色列人民「違背」了in kah上帝之間所「訂立ê約,討厭」上帝ê教導。

第2到3節,說明以色列人民怎樣背叛kah上帝之間所立ê約。一是in並無確實「認bat」上帝。Chit-ê「認bat」,指ê是ná親像「夫妻」相好仝款,thang「同房」(參考創世記四:1)般ê親密。Á若ài有chit種親密關係,基本ê要件是彼此之間一定tio̍h絕對忠實,否則無可能ê。二是以色列人民「拒絕良善」,這是teh指in並無照上帝ê教示,好款待hiah-ê貧困孤寡ê人,顛倒地,in欺負chiah-ê生活貧困ê人。只知影累積財富tī家己ê身上,甚至為tio̍h beh掠奪koh khah chē ê財富,無惜kā困苦無法度還債務ê sàn-chhiah人賣做奴隸(參考阿摩司書二:6—8,彌迦書二:1—2)。

第4節,已經講出tùi耶羅波安二世死後ê北國以色列政局,確實是一個動盪不安ê時代,tī短短ê二十年間,就發生五次軍事政變,而且每pái政變lóng是用謀殺國王篡奪王位ê方式,tùi列王記下第十五章thang看tio̍h chit種歷史背景。Tùi耶羅波安二世死後,伊ê kiáⁿ撒迦利亞續接王位chiah不過半年就被沙龍謀殺;沙龍mā只做一個月ê王就hō͘人謀殺,刣伊ê是米the̍h現;伊為tio̍h鞏固謀殺得來ê政權,the̍h「三萬四千公斤ê銀á」hō͘亞述皇帝提革giú‧比列色,請求亞述保護伊。然後伊ê kiáⁿ比加轄繼承王權。M̄-koh伊統治ê時間mā只有一年而已,就被比加謀殺奪去王位;然後是何細亞mā用仝款方式謀殺了比加,篡奪王位。M̄-koh in都無照上帝ê旨意形式,lóng是拜「用家己ê金銀鑄造」ê「偶像」,結果為北國以色列帶來滅亡。因為人民lóng跟tòe學習棄sak了上帝。

第5到6節,清楚講tio̍h以色列人民拜「金牛像」,表示in已經kah迦南人學習信仰,認為「牛」是幫助in農作物增產ê神明,因為án-ne,用金子á是銀á鑄造金牛敬拜,而這是tùi開國之君耶羅波安就開始了(參考列王記上十二28)了,而且是後代君王lóng跟tòe學習。

第7節,有兩句流行tī當時ê俗語。

第一句是「掖種ê是風,收割ê是暴風」。「風」,這tī智慧文學內是代表「bē穩定」、「白做無功」ê意思。「暴風」,就是比一般ê「風」koh khah高層次。換句話講,以色列人民m̄-nā得bē-tio̍h,iáu會收tio̍h koh khah大ê災難如饑荒、欠收。

第二句俗語是「無結實ê麥穗做無成麵包」,這是teh指嚴重欠收ê農莊景況。「無結實ê麥穗」,這是麥á teh成長過程中得tio̍h ê病症,致使麥á無法度結成飽穗。

先知何西阿就是beh指出北國以色列ná親像有病ê麥穗仝款,無法度像作穡人期待ê收成,到最後chiah-ê無結實ê麥穗,只有ē-tàng用來做堆肥,甚至tio̍h用火燒成灰掖tī麥田中做肥料。先知何西阿指出ê現象koh khah慘,就是無結實ê麥穗已經無法度提供hiah-ê人食物ê需要,而即使有一點點á thang食ê麥穗,mā為tio̍h beh向亞述國進貢,致使已經悽慘ê iau餓景況雪上加霜。

第8節,「破裂ê瓶子」,意思是「lóng無路用」,表明已經無存在ê價值à。

第9節,「像倔強ê野驢á任性行家己ê路」,chit句話是teh描述北國以色列根本就不聽從上帝ê旨意,kan-taⁿ想beh家己ài怎樣行,就怎樣行。所謂「野驢á」,就是bē合群、m̄聽主人指揮ê驢á。本來驢á是真溫馴ê動物。現在變成野驢á,就是teh指無法度駕馭ê驢á,會四界亂走、跳、撞,結果受傷koh khah嚴重。

第10節,結果就是「當亞述王壓迫in ê時chūn,in就beh食盡苦楚」了,因為in m̄聽主人ê話,kan-taⁿ會淪落到凶悍ê亞述王手上。

第11節,是chit章經文ê中心,講述北國以色列真正ê問題是:當國家陷入危機ê時chūn,in從來m̄-bat考慮、mā無想tio̍h走chhōe上帝ê赦免kah憐憫,顛倒ê,拜偶像ê風氣反tńg koh khah興盛。In認為拜巴力jú普及,希望就jú高。一代傳一代,傳到落尾,北國以色列lóng變成敬拜巴力神明ê祭壇à。甚至iáu kā上帝ê僕人先知刣到只chhun先知以利亞一人(參考列王記上十九:10)。

第12節,講上帝為以色列人民「寫落來真chē教示,in卻認為怪異而拒絕」,意思是teh指上帝一再想出所有ê辦法beh教導以色列人民該怎樣行,而且是寫得非常清楚。M̄-koh,in lóng一再拒絕。

第13節,mā就是第六章6節所提起ê,上帝並無歡喜人用獻牲祭ê方式來表達對上帝ê疼,上帝所喜愛ê,是人真正「認bat」祂。先知何西阿tī chia明白指出,以色列人民獻牲祭並m̄是真正beh敬拜上帝,卻是想貪食chiah-ê獻祭ê肉。甚麼人會得tio̍h chiah-ê獻祭ê肉?當然是祭司。換句話講:祭司鼓勵人民獻祭,並且講了真chē關係獻祭jú chē,上帝jú會祝福等類似ê話,因為án-ne,人民燒熱衷tī獻祭,就是想beh hō͘上帝歡喜,以求得koh khah chē ê祝福。其實是眾祭司貪愛chiah-ê財物,這就是先知何西阿一再指出ê,以色列人民並m̄是真正「認bat」上帝。先知何西阿甚至警告chit種信仰態度,m̄-nā換bē-tio̍h上帝祝福,顛倒ê,kan-taⁿ會帶來koh khah慘重ê懲罰,因為上帝beh「Kā in遣tńg來埃及」,hō͘ in重新淪為他國ê奴隸,ná親像in祖先tī埃及做奴隸ê日子仝款。

第14節,「宮殿」、「城堡」等,chiah-ê lóng teh顯示財富kah國防軍力,m̄-koh無論是jōa-ni̍h-á堂皇ê宮殿á是jōa-ni̍h-á堅固ê城堡,若無上帝看守,這一切lóng會hō͘摧毀成灰。

重新查詢 專卷研經 何西阿書系列
錯誤回報,請聯繫comm[@]fhl.net