Chit段來自古老資料ê經文，中心主題在tī：(1)閃、含、雅弗chit三個人ê名，所代表ê是人類ê意思。作者kā人類分做三大族群。(2)beh描述一個既有ê事實：為甚麼以色列民族kah迦南人之間有極大ê衝突。

第18到19節，tùi大船出來ê只有挪亞一家人，因為án-ne，chia講挪亞ê三個kiáⁿ，就是人類分佈「全世界」ê祖先。

第20到23節，chit段經文主要teh說明兩件中心信息：一是挪亞開始teh過作穡人ê生活。表示這是非常進步ê時代，已經進入農業社會，有安定ê生活，chiah有土地種作、栽種。

第22節，chia講含因為看見老父挪亞赤身露體，就去kā兩位兄弟講，chia所講ê「kā xx講」是有含輕視ê語詞。

第23節，chit節講閃kah雅弗m̄敢用輕視ê態度看老父。因為án-ne，in遮老父ê身軀。

第25到27節，chit三節一再重述迦南ài做其他兄弟ê奴隸。這可能ê背景是因為以色列人民teh進入曠野時代，kah迦南人有極大ê衝突。Koh講，in khiā起tī迦南ê時，mā因為受當地文化ê影響真深，致使一再背棄上帝。因為án-ne，用chit種語句描述in二者之間無可能同時平等做伙。第三，做一個兄弟成做其他兄弟ê奴隸，he mā是真大ê侮辱。為甚麼含beh受án-ne ê詛咒？除了是本來ê衝突之外，mā teh暗示當伊看tio̍h老父挪亞赤身露體之時，無為老父遮蓋，卻是用「侮辱」ê態度teh渲染老父ê裸態。