創世記 6章1節 到 6章8節   背景資料  上一筆  下一筆
Chit段是siōng早期「耶和華文獻」ê資料。創世記chit本經冊是teh講述人犯罪,以及上帝ê拯救恩典ê冊。因為án-ne,每一個故事ê開始到結束是用chit種結構:人犯罪,上帝受氣,會懲罰;m̄-koh上帝有恩典,tī伊ê懲罰中,上帝mā會憐憫人ê軟弱。因為án-ne,人ê性命會得thang生存落去。

第1節開始就講tio̍h「人口開始增多,分佈全世界」。Chit句話已經說明上帝有賜福,mā是上帝原本創造時就賜福hō͘人類ê恩典(參考一:28)。

第2到4節,「神子」,原本用ê「神」字,是複數ê。表示真chē ê神ê意思,是teh指hiah-ê khiā tī上帝左右ê眾天使(參考列王記上廿二:19—22、約伯記一:6—12、詩篇八十二:1)。Chiah-ê「神子」kah hit位創造ê主宰、獨一ê神無仝。第3節特別強調人因為tiāⁿ-tiāⁿ犯罪,因為án-ne上帝特別縮短了人tī世間ê歲月,tùi第五章所講ê用百計算,縮成siōng koân年限「一百二十歲」,chit-ê歲數mā是東方社會公認siōng koân ê年限,ná親像台語所講ê「活到百二」仝款。

第4節提起「巨人」,tio̍h怎樣解釋in tú-tio̍h身材高大ê「巨人」問題,thang參考民數記十三:31—33,撒母耳記上第十七章 4到7節,記載大衛王kah巨人歌利亞ê戰爭,描述歌利亞ê身高、型態已經超過以色列人ê經驗,soah hō͘ in產生驚惶。另外一點tio̍h處理ê是:天頂靈界侵犯人類ê世界,致使上帝ê不滿。因為án-ne,hō͘人koh khah痛苦,因為上帝ê靈永遠離開了人類。Chia說明一件重要ê信息:規律、限制。上帝造人以及萬物時,是tī一定ê空間中。Pôaⁿ過應該有ê空間對性命就是一種生存ê危險(第十一章1到9節巴別塔ê故事koh一pái表達了chit種訊息)。因為he是違背上帝旨意ê。因為án-ne,人kah「神子」通婚,hō͘人超越人ê界限,帶來ê就是性命ê負擔,m̄是賜福。

第5節,「人類ta̍k個邪惡,頭尾心懷惡念」,chit句話成做上帝beh毀滅大地先做一個伏筆。Chit節講上帝「看見」,這是teh指長期觀察後所得ê。親像上帝觀察以諾,伊一世人lóng是kah上帝交往,chiah會得thang hō͘ 上帝接去。

第6節,chia ê「後悔」一詞,是teh指上帝痛心、艱苦心(憂傷)ê意思。上帝會án-ne悲傷,是因為人類逼祂做祂siōng無歡喜做ê事──審判人類。因為審判人類會koh牽連到hō͘人類生存ê土地受傷。換句話講,審判人類,等於是上帝對家己創造ê宇宙萬物kā in否定仝款。這就kah-ná人否定了家己所努力、用心工作ê結果時,hit種心中ê艱苦心是仝款ê。

第7節,chit節kā以後ê大水故事做序言。說明大水ê由來乃是因為上帝懲罰ê緣故。因為人受造是為tio̍h beh管理萬物,chit-má人既然無法度管理家己,受造ê萬物一定會失序,因為án-ne,萬物連帶受拖累。Chiah-ê觀念lóng kah第三章17節ê「土地會因為你違背命令來受詛咒」ê講法是一致ê。

第8節,「上主kah意挪亞」tī犯罪到「人類ta̍k個邪惡」ê時,獨獨挪亞是上帝所歡喜ê對象,這就為kui個拯救工作先埋落來伏筆。因為挪亞hō͘ 上帝歡喜,伊就成做上帝揀選kah立約ê對象。


重新查詢 專卷研經 創世記系列
錯誤回報,請聯繫comm[@]fhl.net