創世記 44章18節 到 44章34節   背景資料  上一筆  下一筆
猶大koh一pái請求發言,tī chit段發言中,第一部分是tùi第19到23節,伊重複敘述第一pái來買糧ê時,約瑟堅持ài in帶siōng小ê小弟便雅憫來見伊,並且當時koh kā西緬押tio̍h做人質。In照約瑟ê要求chhōa siōng細漢ê小弟便雅憫來。伊特別強調chit位小弟便雅憫是「老父年老ê時chūn生ê」,而且伊有一個親兄哥已經「死去」(這是因為in m̄知khiā tī in面前ê,就是chit-ê被in出賣而且認為已經死去ê約瑟)。伊iáu特別講這siōng小ê小弟便雅憫「老父真疼」伊。

第24到29節,這是第二段話。猶大將 in tńg去後kah老父雅各講,照實地重複敘述一pái。伊強調老父疼ê bó͘拉結只有生兩個kiáⁿ,一個已經離開、「被野獸裂碎à」,chit-má只要便雅憫出任何差錯,in ê老父會「白髮蒼蒼、悲悲慘慘地進墳墓」,表示非常悲傷、m̄甘願死去ê意思。

第30到34節,猶大講ê第三段話。Tī chit段話中,伊表示老父雅各kah便雅憫ê性命是相連結ê。意思是teh指便雅憫若是無法度kah in tńg去,in ê老父雅各mā bē活落去。Án-ne,in chit群兄弟就是hō͘老父悲慘死去ê罪人。Koh講,伊bat向老父chiù-chōa過,若是無法度hō͘便雅憫tńg去,伊願意用終生受罪責ê方式來換。因為án-ne,伊請求約瑟hō͘伊用做奴隸來換便雅憫ê安全tńg去厝裡,來安年老老父雅各ê心。

猶大teh代表兄弟講話,mā充分顯示伊已經扮演大kiáⁿ ê角色。


重新查詢 專卷研經 創世記系列
錯誤回報,請聯繫comm[@]fhl.net