Tùi頂pái約瑟提醒酒政長chhōe機會kah埃及王講伊是hō͘人綁架賣來埃及ê（參考四十：15），到落尾酒政長出監獄復職了後，kā約瑟ê事bē記得kah chheng-khì-liu-liu（參考四十：23），到chit-má因為埃及王連續做兩個夢bē-tàng解ê時，伊chiah想起家己tī王宮監獄tú-tio̍h約瑟會解夢ê事，án-ne已經經過兩年ê時間（第1節）。酒政長kā約瑟替伊kah廚房長解夢ê經歷kā埃及王講，主要目的是建議國王請約瑟來聽伊ê夢看māi，有可能會有解夢ê可能á無。

Tī chit段敘述中，酒政長無bē記得提醒埃及王，約瑟是一個「希伯來青年」。Chit種提醒真重要，因為tī埃及人眼中希伯來人地位相當低賤（參考四十三：32），何況koh是一個奴隸而且囚犯。高貴ê埃及王是m̄是ài beh見chit種對象？這只有國王家己chiah ē-tàng決定。