創世記 35章1節 到 35章15節   背景資料  上一筆  下一筆
Chit章是由「祭司文獻」、「耶和華文獻」,以及「以羅伊文獻」等三種資料混合編輯而成。第1到4節、第7到8節、第16到20節,lóng是屬tī「以羅伊文獻」;第5到6節、第9到13節、第15節、第23到29節lóng是屬tī「祭司文獻」ê作品;只有第21到22節chit兩節是「耶和華文獻」ê資料。

Chit章mā是雅各族長史暫告一個段落,續落來就是beh講約瑟ê歷史。因為chit章用雅各ê十二個gín-á作為一份簡單ê族譜,區隔一個時代ê結束,新ê另外一個時代開始。同時mā交帶以撒往生。然後,第三十六章提供一份族譜外,mā tùi第三十七章開始講tio̍h第四位族長約瑟ê故事。

Chit章也kah第三十四章有密切關係,因為原本雅各是想beh tī示劍chit-ê城市khiā落來ê,m̄-koh,chit-má雅各感覺tī-chia khiā起已經無安全,伊深深感受tio̍h「人數無chē」,深驚外族人ê反撲攻擊,致使被消滅ê危險,因為án-ne,決定離開示劍。

Chia koh一pái提起「伯特利」,這原本是雅各逃亡ê時,親自經歷到上帝kah伊同在,而且向伊啟示表示beh保守伊、看顧伊ê所在。因為án-ne,tī chit-ê siōng無安全感、危機ê時chūn,雅各koh一pái得tio̍h上帝ê啟示,ài伊去伯特利,並且tī hia「起一座祭壇」敬拜上帝。這mā是後來伯特利成做敬拜ê聖地ê原因。

第2到4節,雅各帶領家族開始學習對向伊顯現ê上帝表示忠chiâⁿ,因為án-ne,命令家族ê人,bē-tàng koh再有任何其它神像之物。雅各深深體會tio̍h,若是無chit位全能ê上帝帶領,就算擁有世間數算不盡ê財寶mā是枉然。

第5節若是編輯tī第三十四章29節後面,有可能會koh khah清楚當雅各kah全家離開示劍ê時,無人敢去攔截,替示劍人報復ê原因。Á編輯tī-chia,主要是beh說明雅各帶家族離開示劍,tńg去伯特利重新敬拜上帝,因為án-ne,有上帝庇護in。

第6到8節,雅各照上帝ê吩咐,tī來到伯特利了後,就建造一座祭壇敬拜上帝。第8節ê底波拉,是利百加ê婢女,chit-má已經是老奴僕à。M̄-koh卻無說明底波拉為甚麼跟tòe雅各?kám講當時雅各逃離老父ê厝,á是老父以撒ài伊去拉班ê厝時,hō͘底波拉陪雅各同齊去?M̄-koh這無啥可能。

第9到12節,上帝koh一pái向雅各顯現,beh賜福hō͘伊。上帝ê賜福,就是改變伊ê名叫「以色列」,這是第二pái記載雅各被改名,第一pái是tī第三十二章28節,he是屬tī「以羅伊」ê資料。Chit-má chia ê改名,是屬tī「祭司文獻」ê資料。

第11節講出上帝ê特性:全能者。Chit句「我是全能ê上帝」,mā是上帝對亞伯拉罕應允ê時講ê(參考十七:1)。

第12節講上帝對雅各ê應允kah上帝應允hō͘亞伯拉罕、以撒ê仝款。Chia特別提起「賜hō͘亞伯拉罕、以撒ê土地」,表示雅各就是傳承祖先tùi上帝領受ê賜福。

第13到15節,為tio̍h beh記念上帝對伊ê疼,雅各koh一pái tī伯特利做記念碑,頂pái是用石頭做記號(參考廿八:22)。

重新查詢 專卷研經 創世記系列
錯誤回報,請聯繫comm[@]fhl.net