創世記 3章1節 到 3章13節   背景資料  上一筆  下一筆
這是非常重要ê一章,因為tùi chit章開始,充分表達聖經一個主題:人ê性命為甚麼會有苦難?這是kah人違背上帝ê命令有密切關係。Kui本創世記ê中心主題,就是tùi chit章5節ê人想beh「親像上帝」仝款thang掌管一切chia開始,然後直到創世記第五十章19節,約瑟對伊眾兄哥講,伊「無法度代替上帝」作結束為止,其中所串做伙ê,竟然lóng是人犯罪ê記錄,mā說明人性命苦難ê原因。

Chit段經文描述人怎樣tī奸巧ê蛇ê誘惑下,做違背上帝旨意ê事。

第1節,蛇是萬物中siōng「奸巧」ê,chit-ê詞mā有另外一個意思是「赤身露體」。如果是相親相疼,就是「赤身露體」,是ân-ân地貼做伙。M̄-koh如果「心懷鬼胎」,he就是「奸巧」ê意思,是有含「故意扭曲」ê意思。Chia蛇就是故意扭曲上帝,thang食ê果子lóng m̄提,á故意講做「園á內任何果子樹ê果子」。

第2到3節,cha-bó͘人陷入蛇ê陷阱,就是kah它對話。

第4到5節,chit兩節是kui個故事ê中心。蛇否定了上帝ê命令──bē死。並且提出只要人食了hit-ê分辨善惡ê果子後,就會「親像上帝」,這是相當有誘惑力ê一句話。

第6到7節,cha-bó͘人聽蛇誘惑,果然伸手摘落來絕對bē-tàng食ê辨別善惡ê果子來食,然後koh kā它交hō͘丈夫食。結果,果然無死,chit點tú親像蛇所講ê,m̄-koh卻因為án-ne開了目睭,看見家己無穿衫,「赤身露體」,只好the̍h無花果樹葉來遮身,表示見笑。

第8到10節,雖然是hit尾蛇所講ê chiâⁿ實無死,ē-sái講是另外一種「死」卻出現,he就是kah上帝ê關係斷裂à。In開始逃避上帝,閃躲上帝ê來臨。因為驚惶,這是死亡ê另外一種記號。犯罪者共同ê態度,就是驚tú-tio̍h上帝。Chit對夫妻躲避上帝ê方法,就是用掩遮ê方式,隔離kah上帝ê關係。M̄-koh上帝開始來chhōe人,並且發出詢問「你tī tó位」,希望ē-tàng喚醒人ê心。

第11到13節,講出人犯罪了後ê具體行為反應:推諉責任。Chia cha-po͘人講是cha-bó͘人誘惑伊;cha-bó͘人講是蛇誘惑伊。M̄-koh無論án怎講,lóng逃bē過上帝ê審問。


重新查詢 專卷研經 創世記系列
錯誤回報,請聯繫comm[@]fhl.net