創世記 22章1節 到 22章10節   背景資料  上一筆  下一筆
第廿二章mā是屬tī「以羅伊文獻」典ê資料khah-chē,tùi第1到14節、19節lóng是。

到18節是屬tī「祭司文獻」ê資料,20到24節則「耶和華文獻」。

Chit章mā是大家所熟悉有關亞伯拉罕獻以撒ê故事,是創世記中非常頂港有名聲下港有出名ê故事之一。早期ê社會,獻孩童hō͘神明ê儀式,tī宗教行為上是真普遍ê事,特別是tī迦南地ê宗教祭典行為中,chit種獻孩童hō͘神明ê事件並無稀罕。Mā因為án-ne,摩西ê律法清楚明文禁止以色列人民有chit種行為(參考利未記十八:21、二 十:3,申命記十八:10a),chiah-ê律法規定ê背景一定kah當時、當地ê人民ê宗教行為有密切ê關係。因為án-ne,chit件亞伯拉罕獻以撒ê事件,mā是用來解釋為甚麼以色列人民m̄免孩童獻祭ê主要緣由,以區別以色列人民kah迦南地人民tī信仰上ê差別。可惜ê是,以色列人民有kóa君王並無遵照摩西律法ê規定做tāi-chì,in甚至用家己ê kiáⁿ獻hō͘迦南地ê神明(參考列王記下十六:3、十七:17、廿一:6)。

Koh講,chit件事mā進一步teh說明亞伯拉罕對耶和華上帝ê絕對忠心kah順服。Tùi伊tī哈蘭被呼召離開到chit-má,創世記作者lóng是繞tio̍h chit-ê主軸:亞伯拉罕確實是信心之父,伊對上帝ê命令絕對聽從。Tī伊ê觀念中,上帝既然有辦法tī伊一百歲ê時chūn,hō͘伊得tio̍h gín-á,taⁿài伊kā chit-ê gín-á獻tī祭壇上,伊mā ē-tàng m̄免擔憂甚麼,因為性命既然是tùi上帝賞賜而來,chit-má上帝ài the̍h去,祂家己就會有所安排。

Chit件記事ê開始就講上帝「考驗亞伯拉罕」,chia ê考驗,並m̄是講上帝m̄知亞伯拉罕是m̄是忠心ê問題,mā m̄是懷疑伊ê忠chiâⁿ度。卻是一種測驗,是beh促成hō͘伊koh khah上一層樓,堅定伊ê信心。

第2節真清楚描述以撒對亞伯拉罕ê重要性,是伊所「疼ê獨子」,而且hit年老ê時chūn真無簡單chiah chiah得tio̍h ê。Chia講「摩利亞」,chit位詞kah「看見」、「觀看」、「預備」等詞ê字根仝款。

「燒化祭」,這表示是一種宰殺了後,khǹg tī祭壇上燒獻hō͘神ê獻祭方式。換句話講,上帝ài亞伯拉罕kā以撒刣死當做祭品獻祭。

第3到8節,chit段經文描述以撒聽從並kah老父亞伯拉罕上山,á亞伯拉罕卻一直隱瞞beh kā伊當做獻祭用品獻hō͘上帝ê事。

第5節講亞伯拉罕kā奴僕留tī山下,伊家己帶tio̍h以撒上山去,有可能為tio̍h是beh防範奴僕搶救以撒á阻礙了獻祭ê事。

第8節亞伯拉罕回答以撒ê詢問講「上帝家己會親自預備」,就是第15節所講ê「耶和華以勒」ê意思。

第9到10節,chit兩節說明亞伯拉罕一屑á 都無遲疑地就準備beh kā以撒刣死當做祭品獻hō͘上帝。

重新查詢 專卷研經 創世記系列
錯誤回報,請聯繫comm[@]fhl.net