創世記 2章1節 到 2章17節   背景資料  上一筆  下一筆
創造中以「第七工」達tio̍h高峰。作者講上帝因為「完成了伊創造ê工作就歇工」,這表示第一章所敘述ê創造已經全部完工,因此tī chit-ê「第七工」歇工歇睏,m̄-koh上帝特別「賜福」、「聖化」chit工。這mā是第一個創造故事siōng重要ê中心思想。

「安息日」就是tùi chia延伸出來ê(參考出埃及記二十:8—11)。作者講chit工是帶有上帝「賜福」ê日子,mā就是tī chit工所有ê人lóng tio̍h停止一切工作,專心敬拜上帝,用chit種方式來回應上帝ê疼,mā因此得tio̍h上帝ê賜福來加添性命ê氣力。

Chit段經文通常hông稱做是第二個創造ê故事。

Chit份創造ê資料來源,比頭前第一章創造ê資料來源會khah早。Tī chit份創造故事中,作者以「地」做基礎,以「人」做中心,人是一切受造物ê開始,然後地上所有受造物lóng是為tio̍h人ê需要來造。Chit-ê觀念kah第一章所表達ê人是萬物最後chiah造出來,為tio̍h是beh替上帝管理受造物,二者之間看法完全無仝。

作者用「擬人法」chit種特殊筆法寫創造ê故事,親像:上帝用捏土ê方式造人,這就ná親像一個陶匠teh捏造陶器仝款。Kah下一章kah人講話ê景況,lóng是kā上帝以「人ê型態」表達出來。

第5節,chia有一個關鍵ê字眼,就是「無」。作者以「無」當做創造ê開始,表明ê kah第一章是仝款ê基本信仰:上帝是tùi從來m̄-bat有來開始祂ê創造。作者特別強調tú開始之初,地上無草木、菜蔬、雨水等,意思是teh指一切生物lóng iáu未開始,mā無生存ê條件。

第7節,chit節講上帝造人了後,「Kā性命ê氣pûn入去」人ê鼻孔,hō͘人「成做有性命ê人」。重點tī上帝「pûn氣」。Chia所講ê「氣」並m̄是指「靈魂」,卻是teh強調人會「有性命」,是kah上帝有bē-tàng分離ê關係。Á第一章則重視tī人ê身上有「上帝ê形像」(參考一:26—27)。

第8到15節,chit段經文開始紹介「伊甸園」,意思是teh指「樂園」。有含「快樂」、「歡喜」、「滿意」ê意思,mā thang講是一種性命ê泉源ê意思(參考以賽亞書五十一:3),ná親像顧羊人牧放牛羊四界chhōe青草水源時,發見一大片綠洲ê心情般,hit種興奮之情,表達出來ê是ná親像chhōe-tio̍h一片「伊甸園」。

Tī「伊甸園」中有「相對」ê存在,一是賜性命ê樹,二是hō͘人辨別善惡ê樹。所謂「辨別善惡」是teh指:hō͘人遠離認bat上帝。

Chit段經文為第三章人犯罪先埋一個案底,因為人並無注意tio̍h tī siōng súi ê伊甸園中有「約」。

第15節,是chit-ê創造故事ê中心經文:chia講上帝造人,為tio̍h是beh人「種作」,看守「伊甸園」。這kah第一章所提起ê上帝ài人管理萬物ê意思仝款。

第16到17節,chia真清楚提起禁止令,就是「絕對bē-sái食」園中hit叢「ē-tàng hō͘人辨別善惡ê樹所結ê果子」,若食了,「hit工一定會死」。Chia所講ê「死」,表明kah上帝創造ê本意相違背,會hō͘上帝隔離出來。

重新查詢 專卷研經 創世記系列
錯誤回報,請聯繫comm[@]fhl.net