創世記 19章30節 到 19章38節   背景資料  上一筆  下一筆
Chit段經文主要是teh講述摩押人kah亞捫人ê祖先是tùi何而來ê。Koh講,chit段經文mā提供一個重要ê題材:以色列人民kah摩押人、亞捫人之間ê深仇大恨之背景,chit點tùi民數記第廿二到廿五章,申命記第廿三章3到6節,以及士師記第三章12到30節等等,thang看tio̍h以色列民族kah chit兩個民族之間ê對敵狀態。M̄-koh,當以色列人民對摩押人、亞捫人帶有歷史情結ê仇恨、歧視時,路得記chit本經冊ê作者提供了另外一個觀點,是非常值得大家注意ê。

Chit段經文mā是有關羅得記事ê結束,tùi第十一章記載伊喪父,到第十二章伊跟tòe伯父離開哈蘭,然後選擇看起來真肥美ê土地khiā起,卻因為án-ne遠離了上帝透過亞伯拉罕帶來ê賜福,á kah罪惡tòa做伙,結果是喪失了所有ê一切。

Koh講,醉酒sià面子,這mā是挪亞事件了後ê另外一個例(參考九:21—27)。聖經作者一再提醒bē-tàng醉酒,因為會亂了該做ê事(參考箴言三十一:4,以賽亞書廿八:7,羅馬書十三:13,哥林多前書五:11、六:10)。

第二十章除了最後一節(18節)是「耶和華文獻」ê資料以外,其餘所有ê 17節lóng是屬tī「以羅伊文獻」ê資料。

Ná親像頭前已經敘述過ê,有關亞伯拉罕kābó͘撒拉當做家己ê小妹看待,chit件記事應該kah第十二章、第廿六章可能是仝一件事,m̄-koh,經過無仝ê流傳kah資料ê收集有差別。因為如果照經文ê編輯順序看,chit時ê撒拉應該mā有八十九歲了,而且已過了更年期,根本無算是所講ê súi、少年。M̄-koh,ná親像tī前段所講ê,這是「以」典提供ê資料,á第十二章則koh khah古老ê「耶」典資料,表明he是無仝資料ê來源。

Tio̍h注意ê是:kui個故事ê中心內容是tī第3到13節ê對話、辯解等chit部分。重點在tī beh釐清tāi-chì ê真相:到底是甚麼人tio̍h、甚麼人m̄-tio̍h。

Chit段經文mā提供一個真重要ê信息:上帝會阻止人犯罪,bē hō͘無辜ê陷入罪惡中。只要人ê心中保持純潔ê心仰望上帝,上帝必定會設法阻止無辜ê犯罪。

重新查詢 專卷研經 創世記系列
錯誤回報,請聯繫comm[@]fhl.net