創世記 18章1節 到 18章15節   背景資料  上一筆  下一筆
第十八到十九章全部lóng是「耶和華文獻」ê資料。Chit種文獻tī創世記中佔有真大ê份量,包括第二章、第三章、第四章、第十二章、第十三章、第十五章,kah第十六章lóng是屬tī chit種文獻。這兩章lóng是講tio̍h有關上帝毀滅所多瑪城ê故事,hō͘讀者印象相當深刻。頭前有提起過,「耶和華文獻」ê特色,就是用「擬人化」ê筆法teh講述上帝kah人之間ê關係。Ná親像第三章,講上帝tī伊甸園裡kah人直接對話。這兩章mā是án-ne,上帝親自kah亞伯拉罕講話,甚至thang討論有關所多瑪城發生ê問題。Á這兩章ê重點就tī第十八章17到19節所提起ê,上帝kah亞伯拉罕有特別親密ê關係,因為án-ne,上帝kā準備ài懲罰所多瑪城ê計畫kā亞伯拉罕講。

上帝親自顯現tī亞伯拉罕ê面前,chit種筆法就是「耶」典資料ê特色,mā說明tī上帝眼中,亞伯拉罕確實是無仝款ê族長。作者並無說明上帝是用怎樣ê形式出現 tī亞伯拉罕面前,thang hō͘伊一看就知影he是上帝。作者beh表明ê一個信念:kah上帝有親密關係ê人,只要一看,就會清楚知影三個人中間必定有上帝ê天使,kah上帝親自在中間。因為án-ne,當伊一看見這三人行過來,就趕緊趨向前去,而且用「坦覆 (thán-phak)在地」ê方式迎接in三人。Chit種態度tú好說明亞伯拉罕知影in三人m̄是一般人,而且有上帝現身tī伊目chiu前。

第3到5節,第3節chia用「我主」一詞,表示單數。亞伯拉罕清楚知影這三人中間有一位是領導者,á是主要ê對象。伊beh接待in,希望in ē-tàng留落來做客。In接受亞伯拉罕ê邀請,成(chiâⁿ)實留落來接受招待。Mā因為án-ne,希伯來書ê作者勸勉早期教會ê信徒,講:「M̄-thang bē 記得接待出外人,因為án-ne 做會tī 無意中接待tio̍h 天使。(全民版)」(希伯來書十三:2)這ē-sái講是亞伯拉罕ê親身經歷。

洗腳,這是中東地帶非常重要ê待客禮節。耶穌bat受邀請去一位法利賽人西門ê厝作客,m̄-koh西門卻無the̍h水hō͘耶穌洗腳,ē-sái講有一位hō͘人認為是「罪人」ê cha-bó͘人,卻用伊ê目屎kā耶穌洗腳,然後用珍貴ê香油膏耶穌ê腳(參考路加福音七:37—39)。Tī最後晚餐ê時,耶穌親自the̍h水為門徒洗腳(參考約翰福音十三:5),然後希望門徒mā kah伊仝款ê態度學習謙卑家己(參考約翰福音十三:14—15),m̄是beh做別人ê領袖,是beh成做眾人ê奴僕(參考馬可福音十:45)。

第6到8節,重點並m̄是在tī亞伯拉罕án怎煮食佳餚待客,卻是伊真誠ê熱情,說明伊kah上帝之間美好ê關係。

第9到15節,chit段經文koh一pái說明上帝對亞伯拉罕ê應允並無改變,祂清楚kā亞伯拉罕講,一年後chit-ê時chūn,撒拉一定會有娠生kiáⁿ。Chìn前亞伯拉罕偷笑,chit-má換做撒拉bih tī帳棚後面「偷偷á笑」,原因是伊清楚知影家己ê 更年期已經過,因為chit時她已經八十九歲ā,用人ê理解kah能力,是絕對無可能有娠生kiáⁿ。M̄-koh聖經作者就是beh強調tī上帝手中,無無法度成就ê事,這mā是第十七章1節所強調ê,上帝是全能ê意思。

Chit段經文siōng主要是teh表明上帝對亞伯拉罕ê應允teh beh實現,而且已經訂出時間表,就是tī一年後。這kah以前只有kā亞伯拉罕講beh賜hō͘伊kiáⁿ,ná親像天頂ê星辰、海邊ê細沙hiah-ni̍h chē,真無仝款。Chit-pái是kā伊講明確ê時間是tī一年後,伊ê bó͘撒拉會生一個kiáⁿ。聖經作者一再強調一件事:上帝所應允ê約必定會實現,而且實現ê時間mā是tī祂ê計畫中,m̄是人ē-tàng替上帝決定時間。性命ê事,lóng是tī上帝手中,上帝決定性命ê時間,生kah死lóng是tī上帝ê手中決定。


重新查詢 專卷研經 創世記系列
錯誤回報,請聯繫comm[@]fhl.net