創世記 11章10節 到 11章26節   背景資料  上一筆  下一筆
Chit份族譜顯示出「祭司文獻」ê特色,kah第五章所記載ê族譜之筆法有幾點仝款ê所在,ná親像tī第五章所記載ê族譜,tī第十代是挪亞,tùi挪亞開始,是一個全新ê世代來臨。Tī chia mā是仝款,第九代是亞伯蘭出現,伊mā是帶來一個全新ê時代來臨。第五章寫挪亞生三個kiáⁿ:閃、含、雅弗。然續後落來ê是用閃族做中心。Chit章mā是án-ne,寫他拉生三個kiáⁿ:亞伯蘭、拿鶴、哈蘭。然後,tùi第十二章開始,用亞伯蘭做主軸寫族長史。

Koh講,每一個時代lóng用「生男育女」當做結語,這mā teh表示上帝賜恩典hō͘人類,hō͘人類有延續性命ê氣力。Chit份族譜mā thang看tio̍h族長ê年歲已經kah第五章所提供ê歲數cheng差相當chē,而且有逐代減少ê現象(除了第八代拿鶴活得siōng短以外)。作者有意思beh藉這來引chhōa讀者進入第十二章揀選亞伯拉罕ê故事,hō͘亞伯拉罕ê故事kah人類實際生活經歷到ê年歲真接近。

Ná親像第五章32節記載挪亞ê資料無完成,直到第九章28節chiah結束挪亞ê族譜。Chia第26節mā是án-ne,只記載他拉七十歲hit年生「亞伯蘭、拿鶴、哈蘭」,tī第32節chiah用「他拉兩百零五歲ê時chūn死tī哈蘭」,án-ne結束他拉ê族譜。

重新查詢 專卷研經 創世記系列
錯誤回報,請聯繫comm[@]fhl.net