以西結書 9章1節 到 9章11節   背景資料  上一筆  下一筆
Tùi chit章到第十一章等三章,lóng是談起有關上帝怎樣懲罰耶路撒冷kah猶大人民ê情景。這懲罰ê情景tú好說明先知信息中有關上帝懲罰ê過程:先是查證,並且證據確鑿,續落來就宣判,然後執行。

Tī第八章就真清楚講出耶路撒冷聖殿中充滿tio̍h褻瀆上帝神聖ê偶像,而且koh khah惡質ê,是祭司、長老,kah人民lóng tī拜chiah-ê置khǹg tī聖殿中ê偶像神明。Chit章就提起上帝決定beh用嚴厲ê懲罰對付in。

第1節,「我聽見上帝大聲hoah」,這是上帝beh hō͘先知以西結知影祂teh beh進行ê審判kah執行判決ê動作。上帝對祂ê天使,mā就是行刑者下令帶「武器」來「懲罰chit-ê城市ê人」。

Chiah-ê行刑者mā ē-tàng被看做是hit-ê城ê守護天使。Chia雖然無清楚指出chiah-ê行刑者手上ê「武器」是甚麼?m̄-koh這「武器」一詞mā ē-tàng是kui個受造物,親像草蜢、冰雹、瘟疫等等lóng是。無仝懲罰方式,就會有無仝ê「武器」,而tī chia,ē-tàng知影ê是chiah-ê使者手上ê武器,其實就是巴比倫ê軍隊。因為是巴比倫帝國ê軍隊,所以先知耶利米會用「大鐵鎚」來形容(參考耶利米書五十一:20)。

第2節,「六個人各帶武器」,tī啟示錄第八章2節、6節ê記載,是有七位天使teh進行懲罰ê工作。有kóa翻譯本用「七個人」,而有kóa翻譯本用「六個人」。這是因為希伯來文ê介系詞「Be」,ē-tàng譯成「其中」,mā ē-tàng用「kah」、「以及」。若採用「後者」,則hit位「穿插麻紗衫褲ê」就是第七位。M̄-koh若是採用前者,則只有六個。

Chiah-ê上帝呼召來懲罰以色列ê使者tùi「聖殿外院ê北門行過來」,chia to̍h是猶大人民犯惡質之罪ê所在。Chit時有「一個穿插麻紗衫褲ê帶筆墨」,這「筆墨」是判決ê工具,而且是帶犯罪ê記錄。In來「khiā tī銅祭壇邊á」,這是設tī北門內院ê所在,是獻祭hō͘上帝ê祭壇。銅ê祭壇,這是為tio̍h燒化祭ê路用。這是所羅門王時代所設置ê(參考列王記上八:64)。

第3到4節,「上帝ê榮耀離開ki-lō͘-pek」,這是teh指上帝ê能力無koh kah至聖所中ê約櫃同在。「ki-lō͘-pek」是teh指約櫃頂ê蓋kòa。上帝kā hit位帶筆墨、穿插麻紗衫褲ê使者講,去「行遍全耶路撒冷」,若是看見「hiah-ê因城內所發生可惡ê是而苦惱悲歎ê人」,mā就是知影有chit種行為而心中感覺非常ê艱苦心,soah koh bē-tàng為力hō͘ in阻止而發出悲歎聲音ê人,就beh「tī in額頭做記號」,這「記號」表示ài kā chiah-ê人分別出來。這「記號」ê希伯來文是「tāw」,這字是希伯來文最後一個字母,表示上帝並無會懲罰忠實tī祂ê子民,卻是甚麼人犯罪,甚麼人就tio̍h為家己所犯ê罪死亡(參考十八:4b),先知耶利米mā持仝款ê講法(參考耶利米書三十一:30)。

第5到6節,講出上帝ê懲罰是bē有任何寬待,因為chiah-ê悖逆ê人民已經是沉淪到底à。因為án-ne,上帝下命令tio̍h chiah-ê行刑ê天使,kah tī chit位手the̍h筆墨ê天使後面,仝款是「行遍全城」,「屠殺」所有悖逆上帝ê人。除了「額頭有記號ê人」以外,其餘lóng m̄留。這是真嚴酷ê命令,而且是tùi「聖所下手」開始進行格刣令,結果是kā ná七十位「長老」(參考八:11)lóng刣死了,這表示猶大人民已經會失去領導者。

第7節,「Kā屍體堆滿聖所ê庭園,弄lah-sap聖殿」,這mā是一種污穢聖殿ê方式。等於是上帝tī回應chiah-ê tī聖殿拜偶像ê人ê行為。

第8節,先知以西結講當hiah-ê天使teh進行「大屠殺」ê時chūn,伊獨自一人留tī聖殿中向上帝為猶大人民祈禱。類似chit種祈求koh一pái出現tī第十一章13節b句。伊祈禱ê內容,差不多kah亞伯拉罕當年為所多瑪城kah蛾摩拉城ê代禱仝款,問上帝果真正beh kā「kan-taⁿ存ê人lóng滅盡mah」(參考創世記十八:23)?摩西mā bat為hiah-ê鑄造金牛而且下拜ê人民代禱過,甚至願意kā家己ê名hō͘上帝刪除,來換取上帝ê憐憫kah赦免(參考出埃及記三十二:31—32)。

第9節,是上帝回應先知以西結ê代求,表示上帝拒絕,tùi祂ê控訴thang看出來,祂講「以色列人kah猶大人罪惡滔天」,這表示猶大人民所犯ê罪,確實非常嚴重。Chiah-ê人ê行踏是「四界」行「凶刣事件」、「充滿不義ê事」,已經會失去上帝揀選ê本意。因為上帝揀選ê子民,是beh行公義、伸張正義(參考創世記十八:19)。M̄-koh chiah-ê猶大人民心中已經無上帝ê話,á是kā上帝ê話當做垃圾、廢話仝款。

第10節,上帝並無應允先知以西結ê代求,祂照計畫進行懲罰ê工作。Koh講,上帝已經無koh聽猶大人民ê啼哭之聲,堅持ài beh進行祂嚴厲懲罰ê計畫,「不饒恕」mā「不憐憫」,上帝beh用in對待別人ê方式,「照樣待in」。這說明上帝進行報應ê懲罰。

第11節,chit位執刑上帝命令ê「穿麻紗衫褲」天使tńg來,講伊已經「遵照」上帝命令,而且是「完成任務了」。Chit句話表示主前586年,巴比倫消滅了猶大國,並且死亡ê人數不計其數。

重新查詢 專卷研經 以西結書系列
錯誤回報,請聯繫comm[@]fhl.net