以西結書 5章1節 到 5章4節   背景資料  上一筆  下一筆
以西結書第四章ē-tàng清楚看tio̍h先知以西結用身軀語言,向猶大人民傳達上帝ê信息。第五章繼續chit種身軀語言,ài伊kā上帝hō͘猶大人民聽ê信息表達出來。Chit種用身軀表達上帝信息ê方式,tī今á日大眾傳播發達ê時代mā真oh bat,何況是對聖經時代ê猶大人民,in koh khah無容易明白。

Chit章kah第四章仝款,m̄-koh chit章kan-taⁿ用短短4節篇幅,透過身軀語言來傳達上帝信息,然後用khah長ê段落來解釋上帝beh先知以西結講ê話。

這四節是續接第四章所用ê身軀語言。Tī這短短四節經文中,上帝beh先知以西結用剃刀kā家己ê鬍鬚、頭毛剃掉,然後kā之各分做三分之一,續落來是用無仝ê方式處理chiah-ê鬍鬚kah頭毛,包括三分之一用火燒,三分之一用力跺掉,最後ê三分之一hō͘風吹掉,用chit三種無仝方式teh表示耶路撒冷ê猶大人民會遇tio̍h ê結果,意思是in會被火燒、刀刣、趕散(俘虜),koh khah慘ê是連這被趕散ê三分之一,到最後mā會hō͘上帝用「劍tui-jiok」in,這lóng teh表示kui個國家、民族會遇tio̍h嚴重性ê禍果。

第1節,「the̍h一把利劍當做剃刀」,若是對照以賽亞書第七章20節,上帝就bat用亞述帝國國王當做理髮匠,伊beh剃掉以色列國ê鬍鬚、頭毛,kah拔盡身上ê每一條汗毛,表示是一種嚴厲ê懲罰、侮辱kah痛苦ê動作(參考撒母耳記下十:4—5)。Á蓄髮、留鬍鬚對猶大人民來講,認為是一種神聖、誓約ê記號(參考民數記六:5—6a),摩西律法mā清楚規定,cha-po͘人ê鬍鬚kah頭殼頂周圍ê頭毛bē-tàng剃掉(參考利未記十九:27),特別是祭司koh khah是án-ne(參考利未記廿一:5)。只有tī悲傷ê時chūn,chiah會剃掉頭毛kah鬍鬚(參考以賽亞書十五:2、耶利米書四十八:37)。因為án-ne,當先知以西結聽tio̍h上帝beh伊kā頭毛kah鬍鬚剃光ê時,就會感覺真好笑,左鄰右舍á是街坊厝邊,必定會認為伊精神不正常,會嘲(sau)笑、譏諷伊。

第2節,「城被圍困ê日子」是teh指第四章4到5節所提起ê總共三百九十工,á是包含另外iáu koh khah koh加上去ê四十工。續落來繼續解釋第1節所提起ê ài kā剃落來ê「三分之一ê鬚髮tī城內燒;the̍h另三分之一到城外,邊行邊剁碎;koh the̍h chhun落來ê三分之一掖tī空中hō͘風吹散」。這真清楚,「tī城內燒」是譬喻耶路撒冷城to̍h是會遇tio̍h ê結果(參考列王記下廿五:9,耶利米書三十九:8),chiah-ê人可能是iau餓到死,á是病死。Á hiah-ê逃離到城外ê人,m̄-nā無佳哉免得受難,卻是被巴比倫ê軍隊tui-jiok,有ê貴族就tī城外被殺害,連國王mā是仝款tī城外被俘虜,另外有人tùi城內被掠到外面殺害(參考列王記下廿五:4—7、18—21)。

Chhun落來ê三分之一teh代表人民會受掠去,被賣到各地去做奴隸。Chiah-ê lóng是teh說明亡國ê日子kah境遇,是非常悲慘ê。

第3節,「留落來幾根頭毛,用你ê衣角包上」,chit句話真清楚teh說明tio̍h留落來一kóa在身上,mā thang看出其含意,表示雖然上帝tī極大ê忿怒中,m̄-koh á是帶憐憫ê心,祂會留落來一kóa當做「殘存ê子民」,chiah-ê人mā是先知以賽亞、耶利米所講ê「劫後餘生」者(參考以賽亞書十:20、三十七:31—32,耶利米書廿三:3、三十一:2)。

第4節,chit節說明hiah-ê逃離chit pái巴比倫攻擊、蹂躪耶路撒冷城ê猶大人民,並m̄是每一個人lóng會聽從先知ê話,其中會有人認為只要逃到埃及去,就ē-tàng佳哉免得受難。M̄-koh先知以西結tī chia講,若是不聽從上帝ê話,就算逃到埃及去避難mā無用,因為上帝必定會追討chiah-ê不聽從祂話語ê人。

重新查詢 專卷研經 以西結書系列
錯誤回報,請聯繫comm[@]fhl.net