以西結書 43章1節 到 43章12節   背景資料  上一筆  下一筆
Tùi第四十章開始,上帝ê靈帶領先知以西結看tio̍h新ê耶路撒冷,就是tùi東門開始,然後tùi外面一直繞進了內院到至聖所等,án-ne繞了一kho͘-á了後,koh tńg來到chia記載ê,mā是tùi東門開始講起。

Chit章開始beh談ê是kah祭典有關ê事物。

Chit段講出上帝tùi聖殿內發出命令,表示上帝已經tńg來到祂啟示hō͘先知以西結看見ê新ê耶路撒冷聖殿。舊ê聖殿是污穢、敗壞ê,現在這新ê聖殿是聖潔ê,有上帝khiā起tī其中。

第1到2節,「以色列上帝ê榮耀tùi東方來」,chit句話表示上帝已經tī聖殿中,因為現tī先知以西結是hō͘帶到「朝東ê門」,mā就是聖殿正門口ê所在。Chia所提起ê「上帝ê榮耀」,表明ê是上帝顯現。Chia mā講上帝出現ê時有「聲音像海浪澎湃;大地因伊ê榮耀而發出顯(hiáⁿ)目ê光輝」,這是四個活物phah動翼股所發出ê聲音,ná親像大海tī澎湃,mā像龐(pâng)大軍隊tī喊hoah(參考一:24)。

第3到5節,chìn前上帝離開,是因為以色列人民棄sak上帝,而且犯上帝看做siōng嚴重ê罪,就是污穢了聖殿ê聖潔,眾祭司tī聖所內拜偶像(參考以西結書第八章)。現在是新ê耶路撒冷聖殿,是聖潔ê,上帝重新tńg來到「聖殿」裡,而且是tùi「東門」(正門)進入。然後上帝ê靈帶領先知以西結進入聖殿內院,伊看見聖殿「充滿上主ê榮耀」。

第6節,chit位帶領先知以西結丈量耶路撒冷聖殿ê人,就「khiā tī」先知以西結ê「邊á」,chit時chūn,先知以西結聽見上帝tùi聖殿內對伊傳出信息。

第7到9節,tùi第7節開始是上帝傳達hō͘先知以西結ê信息。

上帝真清楚hō͘先知以西結知影聖殿是伊ê「寶座」,而且上帝beh透過聖殿tòa「tī以色列人中間」,上帝beh治理in,這表示祂已經koh一pái接納以色列人民,恢復kah in之間ê關係。Á以色列人民kah in ê君王。而且聖殿kah王宮之間kan-taⁿ一牆之隔,mā無koh允准有任何國王被葬tī耶路撒冷城內,以維護耶路撒冷kah聖殿ê聖潔,án-ne就ē-tàng徹底kā聖kah俗之間ê差別顯現出來。

第10到14節,上帝beh先知以西結kā聖殿設計ê特殊性kah意義傳達hō͘所有以色列人民知影。主要目的,就是hō͘ in知影為過去所犯ê錯誤「感覺見笑」,án-ne mā就ē-tàng避免重蹈覆轍。特別是beh hō͘以色列人民知影聖殿ê建造kah內部ê佈置lóng是「按照條例規則執行」,連一點點á馬虎ê態度mā bē-tàng。Ná親像早年上帝ài摩西帶領以色列人民建造聖幕仝款,一切lóng tio̍h按照上帝ê命令去做(參考出埃及記第三十九到四十章)。

重新查詢 專卷研經 以西結書系列
錯誤回報,請聯繫comm[@]fhl.net