以西結書 39章1節 到 39章20節   背景資料  上一筆  下一筆
Chit章mā是針對歌革所講ê預言,其中有真chē內容kah第三十八章重複。Ná親像頭前有敘述過ê,上帝有審判,必定有拯救。Chit章講tio̍h上帝懲罰歌革kah伊ê聯軍,mā同時講tio̍h上帝拯救祂ê子民以色列。

Chit段經文真清楚講tio̍h歌革軍隊慘敗ê情景,屍體橫臥野外,被野獸kah飛鳥當做食物,原本伊率領ê軍隊是beh攻擊以色列人民ê,現在卻反卻是以色列人民beh去清理歌革軍隊死傷ê屍體,而且是需要用長到七個月時間,這說明歌革若m̄聽從上帝ê話,就會為家己帶來悽慘ê結果。

第1節,chit節kah第三十八章2到3節仝款。

Chit節強調上帝beh kah米設kah土巴這兩國ê統治者歌革「做對」,表示上帝會懲罰伊。

第2到3節,參考第三十八章15到16節。

Chit兩節講歌革kā率領精銳軍隊「扭轉過來」,上帝kā歌革帶到「以色列ê群山頂」,卻是「beh phah掉」伊「倒手掠tiâu ê弓,正手the̍h ê箭」,這表示情況已經完全改變過來。

第4到5節,chit節描述歌革軍隊慘敗ê情況,伊所率領ê聯軍會phah慘敗致使軍隊ê「橫屍野外」,m̄-nā án-ne,上帝beh 將軍隊ê「屍體hō͘飛鳥kah野獸做食物」,就親像上帝過去懲罰以色列人民仝款(參考以西結書三十三27)。Tī本章第17到20節有koh khah詳細說明上帝怎樣差遣飛鳥kah野獸來吞噬屍體。

第6節,「放火燒瑪各ê土地,kah沿海一帶安居ê人民」,chit種情形就ná同上帝tī懲罰埃及仝款(參考三十:8)。

第7節,chit節講上帝beh用án-ne嚴厲ê懲罰手段,主要是為tio̍h beh維護祂ê「聖名」,上帝絕無容允祂ê聖名koh一pái hō͘人「侮辱」。

第8節,先知以西結講,上帝所講出ê話「一定來臨」,因為祂ê話一出,事必定會成就。

第9到10節,chit兩節說明戰爭已經結束,而歌革所率領ê軍隊戰敗了後,留落來真chē武器,hō͘所有ê以色列人民「出去拾」當做柴火燒,數量「加得tio̍h夠額燒七年」之久。這mā是隱喻tio̍h以後bē koh再有任何戰爭發生,而chia所講ê「七年」,是一個象徵性ê數字,表示武器數量非常chē燒不完ê意思。以色列人民「beh搶劫」、「掠奪」過去搶劫kah掠奪in ê chiah-ê敵人,這表示以色列人民會進行報復ê動作,而chiah-ê動作lóng是上帝所允准ê,表示這是上帝teh報應歌革所犯ê嚴重罪過。

第11節,chit節說明歌革ê軍隊死亡慘重,因為以色列人無想beh hō͘ in ê屍體污染土地,所以kā它集體埋葬(á是講是棄sak)tī一個kā它稱做「歌革軍谷」ê所在。因為「歌革kah伊ê部隊lóng tio̍h葬tī hia」,這表示歌革mā tī chit pái ê戰爭中陣亡。

第12到14節,chia講以色列人民單單beh處理chiah-ê死去ê歌革軍人ê屍體,就需要花上「七個月」時間,其實,chia ê「七」mā是一個象徵性ê數字,表示一段長時間,因為死去ê人非常chē,所以「tio̍h動員全國ê人力來埋葬」,而且是beh「派專人巡視各地」,chiah有辦法完成chit項潔淨土地ê工作。若有「iáu暴露在地面ê屍體」,就需要kā它「埋好」,表示chit種潔淨ê工作一定會徹底實行。因為照摩西律法ê規定,屍體是無清氣ê(參考利未記五:2、廿一:1—4、廿二:4,民數記五:2、六:5—8、十九:16、三十一:19)。Á上帝所賞賜ê土地是聖潔ê。

第15節,thang理解,若是有屍體經過「七個月」了後iáu未埋葬,暴露tī外面受tio̍h風吹日曝,以及飛鳥野獸吞噬,必定kan-taⁿ會chhun落來「骸骨」而已,chiah-ê lóng一定tio̍h留落來記號,hō͘專責埋葬ê工作人員好chhōe處理,而埋葬骸骨ê地點就是tī「歌革軍谷」。這就是kā歌革軍隊ê屍體lóng全部埋葬做伙,以防有屍體暴露tī外面,hō͘路過ê旅客因為觸(tak)tio̍h到屍體而無清氣。

第16節,「附近有一個庄頭以這軍隊號名」,chia並無寫出「軍隊」ê名,m̄-koh tī《中文和合本》有寫「哈摩那」,意思是teh指「軍兵」,á是「群眾」ê意思,以今á日ê名來講,就是「萬人塚」ê意思。

第17到20節,chit段經文ē-sái講是koh再進一步描述第9到16節ê歌革軍隊戰敗後悽慘之情景,就是屍體遍滿山谷,夠額餵飽所有ê飛禽行獸。因為án-ne chia講「tùi四面八方呼喚」所有ê飛鳥行獸來食上帝為in準備ê「祭肉」。Chiah-ê祭肉除了是死亡ê軍兵屍體,mā包括歌革軍隊ê後勤補給品,有「公綿羊、小羊、山羊、公牛,kah巴珊ê肥牛」等,chiah-ê家畜會因為無人保護而成為飛禽行獸ê食物,被in「盡情地食肉,lim血,直到食飽醉倒」為止。

重新查詢 專卷研經 以西結書系列
錯誤回報,請聯繫comm[@]fhl.net