以西結書 36章1節 到 36章15節   背景資料  上一筆  下一筆
Chit章teh說明上帝真正是憐憫了全部以色列人民。上帝beh hō͘以色列民族換做全新ê「心」,是顆會順服上帝旨意ê心,就是tùi洗盪in ê心靈做起,hō͘ in知影真正性命ê主,是創造宇宙萬物ê主宰。M̄-nā án-ne,上帝iáu koh khah賜福hō͘以色列民族,hō͘ in有堅強ê性命力kah真chē ê後代kiáⁿ孫。

Chit段經文是上帝beh透過先知以西結向所有以色列民族khiā起ê「山嶺」、「土地」講話,chit種象徵性ê表達方式,主要teh向以色列民族傳達一個重要信息:上帝beh koh一pái帶領in tńg來到chit片祂所賞賜ê土地頂面khiā起。Chit種宣告,mā等於teh kā tī hit片土地khiā起ê人民講,上帝對祂所指定ê土地有主權。

第1到2節,上帝beh先知以西結「向以色列ê群山傳達」祂ê「信息」,這表示山嶺mā是上帝創造ê,一定tio̍h聽從上帝ê命令。另外一方面,chit句「以色列ê群山」,mā teh表示對所有佔領tī chiah-ê山嶺ê族群知影上帝teh對in講話了,beh hō͘ in清楚in所佔領ê chiah-ê山嶺並m̄是in ê,卻是上帝ê,是祂賞賜hō͘以色列人民khiā起ê所在。

第3到4節,現在上帝beh先知以西結對chiah-ê佔領了以色列民族土地、山嶺ê鄰國講話,chiah-ê鄰國過去bat「譏笑以色列」,mā bat「洗劫、侮辱」以色列民族,現在in lóng tio̍h聽上帝ê話。

第5節,chit節講上帝beh「tī大受氣之下責備鄰國,尤其是以東」,這表示上帝受氣à,而且特別針對「以東」,原因是in ê態度是「目中無人」。

第6到7節,chit兩節koh一pái強調上帝確實是忿怒到極點了,祂堅持beh對chiah-ê佔領以色列民族土地ê國家、族群,進行嚴厲ê懲罰。

第8節,chit節講出兩個重要信息:一是上帝beh koh一pái hō͘ chiah-ê被破壞而遇tio̍h剉殆盡ê樹木重新恢復生機,「koh再茂盛」起來,並且hō͘果子樹lóng ē-tàng「結出果子」。二是上帝beh hō͘祂ê子民「真緊to̍h beh回鄉」,上帝beh kā四散到各地ê以色列人民帶tńg來故鄉,重建家園,ná親像重新栽種ê樹仝款koh再茂盛起來。

第9到12節,chit段經文講到à上帝對以色列民族ê應允:一是beh hō͘四散各地ê以色列人民ē-tàng回鄉,二是ē-tàng重新「耕犁掖種」,in ê子女bē「iau餓」,這mā表示in thang安定生活,三是賜福in會「chē子chē孫」,表示有充沛ê性命力。四是比以前koh khah有活力,城鎮「koh khah繁榮」。

第13到15節,「chit塊土地是食人ê」,chit句話隱含tio̍h tī主前587到586年間,當巴比倫帝國圍困耶路撒冷城ê時,城內發生嚴重饑荒,致使人民做出交換嬰á煮食充飢ê慘事(參考耶利米書十九:9,耶利米哀歌二:20、四:10)。M̄-koh現在無koh會有過去hit種交換kiáⁿ煮食來食致使「絕子絕孫」ê現象,mā bē是「亡國喪民」土地,顛倒ê,tī上帝賜福下,chit塊過去被蹂躪ê土地,會重新出現生新機。「bē koh再hō͘ lín被外國人辱罵、譏笑」,原因是上帝做in ê上帝,成做in ê盾牌kah守護者。

重新查詢 專卷研經 以西結書系列
錯誤回報,請聯繫comm[@]fhl.net