以西結書 34章1節 到 34章16節   背景資料  上一筆  下一筆
舊約聖經作者ài kā以色列人民ê君王、社會領袖(包含先知、祭司、長老)譬喻為顧羊人,而kā以色列人民譬喻為上帝ê羊群,而上帝就是羊群ê主人,然後上帝kā伊ê羊委託chiah-ê君王、眾領袖來照顧,hō͘ chiah-ê人扮演顧羊人ê角色,照顧、管理羊群,mā就是上帝ê子民(參考詩篇七十八:70—72,以賽亞書四十四:28、五十六:11,耶利米書廿五:34、五十:6,三十七:24,彌迦書五:4,撒迦利亞書十一:4—11、15、17)。

因為有chit種顧羊人kah羊群之間ê觀念,好ê顧羊人會為羊捨命,bē想beh tùi羊ê身上得tio̍h甚麼特別利益。

聖經作者mā提供了一則重要觀念:上帝ê話ná親像好ê「飼料」,比蜂蜜甘甜,比金子koh khah貴重,會hō͘人ê性命更新,得tio̍h智慧,心眼明亮起來(參考詩篇十九:7—11)。

Chit章就是用chit種顧羊人kah羊群ê關係中做譬喻,說明上帝子民ê受掠,就是因為上帝ê僕人無善盡顧羊人ê職責,所以,上帝表示親自來牧養祂ê羊群,餵飽hiah-ê iau餓ê羊,醫受傷ê羊,並且chhōe tńg來hiah-ê失迷ê羊等。

Chit段經文清楚指出上帝ê僕人,就是以色列人民ê眾領袖,因為無善盡好顧羊人應該有ê職責,koh khah惡質ê是in iáu吞食上帝羊群ê肉,因為án-ne,上帝beh處罰chiah-ê不忠心ê顧羊人,無koh hō͘ in當顧羊人。

相對tī chiah-ê惡質ê顧羊人,上帝beh親自做祂子民ê顧羊人,ná親像詩篇第廿三篇所寫ê,上帝就是以色列人民ê好牧者。類似chit種經文,Tī聖經中一再出現(參考詩篇七十八:52—53、七十九:13、八十:1—3,以賽亞書四十:11、四十九:9—10,耶利米書三十一:10)。

第1到2節,「以色列ê統治者」kah「以色列ê牧者」,chit二個是仝款ê意思,表示chiah-ê人民ê領袖,就是上帝所委任ê顧羊人仝款(參考撒母耳記下七:7)。

上帝beh先知以西結講「預言」,hō͘ chiah-ê以色列ê統治者知影in teh-beh「受災了」,理由是in「只顧家己,卻無牧養羊群」,chit種領導者通常lóng是存貪婪ê心。

第3到4節,chit段經文講述了chiah-ê不忠心ê顧羊人是án怎自私、貪婪,只顧家己,不照顧上帝ê羊群。Chia清楚指出chiah-ê牧者惡質ê行踏,包括「lim羊奶,穿羊毛衣,宰siōng肥美ê羊,食羊肉」等等chiah-ê,這原本是顧羊人thang得tio̍h ê報酬,m̄-koh in卻lóng「不牧養羊群」,m̄-nā無照顧破病ê、虛弱ê,mā不chhōe tńg來失迷ê羊,顛倒ê iáu使用暴力對待chiah-ê上帝ê羊群。。

第5到6節,這是上帝teh指控chiah-ê顧羊人,hō͘羊被野獸「撕碎」、「吞食」,mā hō͘羊「流落tī山谷峻嶺中,分散全地,無人照顧,mā無人chhōe」。
第7到12節,chit段經文是上帝透過先知以西結呼籲所有ê「牧者」一定「beh聽」上帝ê話,這是上帝對in ê控訴,講chiah-ê牧者「只顧家己,無顧羊群」。因為án-ne,上帝kah chiah-ê顧羊人「做對」,伊kā採取幾個積極行動:

一是上帝beh收tńg來祂ê羊,m̄准chiah-ê惡僕人繼續當chiah-ê羊ê「牧者」,因為chiah-ê惡質ê牧者「只顧家己」。

二是上帝beh tùi in ê「嘴裡搶救」家己ê「羊」,m̄准in「食」chiah-ê羊ê「肉」,意指chiah-ê惡質ê顧羊人kan-taⁿ會殘害主人ê羊群。

三是上帝beh「親自chhōe tńg來」祂ê「羊群」,kā陷入tī困境中á是危險中ê羊群「搶救」tńg來,免得受難。

第13節,第一pái出現chit種句話是tī第十一章17節,然後tī第二十章34節、41到42節、第廿八章25節等等處經文lóng一再地提起。Chiah-ê經文lóng kah chit節仝款,講tio̍h上帝重新kā四散各國ê以色列人民領tńg來故鄉重建家園。

第14節,chit節thang參考詩篇第廿三篇2節。

第15節,chit節真重要,chia講上帝beh親自牧養祂ê「羊群」,為「in chhōe thang安歇ê所在」,表示上帝beh庇護祂ê子民,hō͘祂ê子民不再生活tī強敵虎視眈眈ê環境中,ná親像詩篇第廿三篇4到5節詩歌所提起ê仝款。

第16節,chit節tú好kah第4節相對照。

先知以西結講上帝beh「按公道牧養羊群」,chia ê「公道」表示無koh有弱肉強食ê社會景象,卻是大家lóng享受公平ê生活環境。

重新查詢 專卷研經 以西結書系列
錯誤回報,請聯繫comm[@]fhl.net