Chit章全部lóng teh說明上帝對hiah-ê悖逆ê人，一定會嚴厲懲罰。M̄-koh對hiah-ê遵行上帝旨意ê人，上帝m̄-nā bē懲罰，iáu會hō͘ in賜福。Chit種信息tú好講出上帝一定kā善kah惡清楚分別出來。換句話講，上帝絕對bē傷害到無辜ê。

Chit章mā講出先知以西結傳出ê信息是：甚麼人犯罪，甚麼人就會因為罪來死。Á慈悲ê上帝，是無願意任何人死亡。Mā因為án-ne，上帝一再地差遣祂ê僕人眾先知傳達信息hō͘祂ê子民，只有一個期待：就是以色列人民ē-tàng悔過歸向上帝，m̄-thang koh再去做違背上帝旨意ê事，尤其是去拜偶像神明。

Tī chit段經文中，先知以西結糾正猶大人民久長以來tī信仰上ê錯誤觀念，包括掠做是上帝會kā祖先犯罪ê責任加重tī後代kiáⁿ孫中間，以及怎樣做chiah算遵行上帝ê旨意。伊kā猶大人民講，去做上帝看做好ê事並無困難，就是對上帝忠實，而且tī實際ê社會生活中就ē-tàng實踐上帝看做善ê事。

Koh講，chit段經文mā舉例說明kiáⁿ m̄-nā無傳承家己父母ê好模樣，卻是所講所行lóng kah父母所做ê事相違背，chit種人，就一定tio̍h為家己ê惡行，接受上帝ê懲罰。

第1到2節，chia thang參考耶利米書第三十一章29節。

「以色列境內流傳ê chit句俗語」，是teh指流行tī當時kui個中東地帶民間ê俗語。表示每一個人lóng一定tio̍h為家己所做ê事負責，無推託ê空間。

第3到4節，上帝用祂「永恆ê性命chiù-chōa」，表示祂所講ê話，會永遠流傳落去，因為上帝ê話就是真理。

「以色列境內以後be7 koh流行chit句俗語」，表示當猶大人民被掠到異鄉去受苦難，hit時就會認清家己會遭遇苦難，確實是因為家己犯罪所致使，bē koh再怪罪別人。無論是甚麼人，一定tio̍h清楚chit件事，就是「甚麼人犯罪，甚麼人就會死」，這是性命ê基本認知，無chhōe藉口ê餘地。

第5到9節，chit段經文真清楚描述「一個誠實、公正ê好人」之生活態度kah樣式。

一是「不拜以色列人ê偶像」，表示對上帝絕對忠實，不跟tòe大家棄sak上帝。

二是「不拐誘別人ê bó͘」，表示真實ê上帝子民，bē去做違背社會道德、倫理ê事。而且會嚴格遵守潔淨ê禮儀「不kah經期中ê cha-bó͘-gín-á同房」。

三是「不欺詐，不搶劫」，chiah-ê lóng是屬十誡中ê第八誡kah第十誡，不貪別人ê財物（參考出埃及記二十：15、17）。注意chia ê「不詐欺」，表示用誠實ê法碼對待人，這包括司法公平在內（參考申命記廿五：13—16）。

四是「Kā抵押品iáu hō͘負債ê人」，mā會「the̍h物件hō͘ iau餓ê人食，會the̍h衫褲hō͘赤裸ê人穿」，mā知影「借錢hō͘人不取利息」等，chiah-ê lóng teh表示伊會關心貧困ê人生活之需要。

五是「m̄做邪惡ê事」，這是teh指tio̍h用公義ê法則對待人，bē冤屈別人，會按「公tú-teh理糾紛」，這mā是摩西律法ê規定（參考出埃及記廿三：2—3、6—8，申命記十六：19—20）。

六是會真確「服從」上帝ê「誡命」，知影「謹慎遵行」上帝ê律法。
第10到13節a句，chit段經文是舉出違背頂面所講「好人」行為ê例，即使是「好人」ê kiáⁿ，mā仝款會tú-tio̍h到上帝嚴厲ê懲罰。

一是「搶劫、刣人」，chiah-ê lóng是不應該有ê惡質行為。Á chiah-ê行為是伊ê老父「從來無做過」chit種「pháiⁿ事」，ná親像「tī山頂神廟食祭肉，拐誘別人ê bó͘」等。換句話講，這ná親像瑪拿西王所做ê，並m̄是in父親希西家bat án-ne做，卻是伊家己án-ne做。

二是「欺詐sàn-chhiah人，搶劫，扣押負債人ê抵押品」，以及到「異教ê神廟去拜可惡ê偶像」，而且是為tio̍h beh收取利息而「借錢hō͘人」等等，chiah-ê lóng是in父親所無做ê事。

其實先知以西結ê chiah-ê描述，mā thang tùi猶大約雅敬王ê身上看出來，伊m̄-nā無學tio̍h老父約西亞王對上帝忠實，卻是做出惡質ê行為（參考耶利米書廿二：13—17），chit種君王á是領導者一定會hō͘上帝嚴厲懲罰。如果一個君王á是社會ê領導者是用惡質ê態度對待人，in所領導ê社會，人民ê社會行為mā kan-taⁿ會學樣，做koh khah敗壞ê事。

第13節b句，chia上帝做出宣判講有頂面所講án-ne行為ê人，「伊一定死；伊是自取滅亡」，chit句話回應了第4節所講「甚麼人犯罪，甚麼人就會死」。因為上帝是公義ê，祂一定進行嚴厲ê審判。

第14到18節，chit段經文舉出ê例tú好kah第一個例（第10到13節）顛倒；第一個是teh指kiáⁿ無kā老父好ê行為傳承落來，卻是做kah老父完全顛倒ê事，去做惡質ê事，chit種人一定死。現在chit段舉出顛倒ê例，就是拒絕學習老父ê pháiⁿ模樣ê人，一定ē-tàng存活。

一是kiáⁿ「看見老父一切ê罪惡，卻無隨從老父ê pháiⁿ模樣」，chiah-ê惡質ê行踏包括有：拜偶像、拐誘人妻、欺壓人、搶劫、the̍h sàn-chhiah人ê抵押品不歸還、m̄-the̍h食物hō͘ iau餓ê人、借錢hō͘需要ê人索取利息等等，chit-ê kiáⁿ無仿效老父ê pháiⁿ模樣，ná親像希西家王無傳承伊ê老父亞哈斯，做出上帝眼中看做邪惡ê事（參考列王記下十六：1—4），伊確實做上帝認為對ê事（參考列王記下十八：1—3）。因為án-ne，tī siōng困難ê時刻，上帝伸手救助伊，差派天使kā圍耶路撒冷ê亞述大軍趕tńg去去（參考列王記下十九：35）。

二是頂面所講chiah-ê惡質行踏lóng是老父家己所做ê事，chit-ê老父就beh「因家己所犯ê罪死亡」，上帝絕對bē hō͘伊ê kiáⁿ承受罪罰。因為chit-ê gín-á kā老父ê chiah-ê惡質行為完全切割斷絕，從來m̄-bat學習。