以西結書 16章15節 到 16章34節   背景資料  上一筆  下一筆
Tùi第15節開始,chit段經文真清楚指出以色列人民墮落,棄sak上帝ê罪行。先知以西結傳出上帝ê信息,ná親像先知何西阿ê信息仝款,是用上帝kah以色列民族之間ê「夫妻」關係來譬喻,指責以色列人民棄sak家己ê丈夫,去kah其他ê情人行淫,這表示in棄sak了上帝,去拜其它偶像神明。

第15到19節,chit節講出以色列民族並無記念上帝對伊ê厚愛,mā bē珍惜上帝賞賜各種恩典。顛倒地,利用家己ê美貌kah名氣「放蕩縱情,來者不拒」,chit種行為kah妓女仝款。In kā家己美麗ê衫褲「裝飾拜神明ê所在」,想beh吸引人去kah in行淫,in ê行為就kah廟妓仝款。Koh khah hō͘上帝傷心ê,in竟然the̍h上帝賞賜kā in賜福ê「金銀珠寶鑄造」偶像神明來拜,iáu kā上帝賞賜kā in賜福ê衫褲、「糧食」,而且是「上等麵粉、橄欖油、蜂蜜」等貴重珍品當做祭物獻hō͘ chiah-ê in ê手「鑄造」出來ê「偶像」神明。這kah主前第八世紀ê先知何西阿所譴責當時北國以色列人民ê行踏完全仝款(參考何西阿書二:5、8)。

第20到21節,「你the̍h你kah我生ê kiáⁿ當牲祭獻hō͘偶像」、「iáu刣死我ê kiáⁿ當牲祭獻hō͘偶像」,chiah-ê句話lóng真清楚指出北國以色列kah南國猶大ê人民bat kā家己kiáⁿ獻祭hō͘巴力等偶像神明,而且chit種行為又koh是tùi國王帶頭teh做(參考列王記下十六:3、十七:17、廿一:6)。Á chiah-ê行為lóng是上帝嚴厲禁止ê(參考申命記十八:10),mā是上帝看做siōng討厭ê行為。

第22節,chit節thang對照第6節。

第23到26節,「你慘了!你受災了!」chit種用詞早tī先知何西阿ê時代就用teh警告北國以色列人民棄sak上帝(參考何西阿書七:13),現tī先知以西結用來譴責猶大ê以色列人民,講in án-ne做,kan-taⁿ會帶來滅亡而已。所謂「邪惡ê事」,Tī聖經作者認為就是去拜偶像。而且in拜偶像ê行為是處處可見,「街頭巷尾」lóng有,淫亂ê嚴重,hō͘ in原本尊貴、高雅ê氣質全部喪失殆盡,chiah-ê惡質ê行踏hō͘上帝非常受氣。

第27到29節,chit三節lóng是進一步用來指責猶大國ê領導者,對上帝無信心,不聽從先知ê勸告,而去勾結「埃及」(第26節)、「亞述」(第28節)、「巴比倫」(第29節)。這說明in kan-taⁿ想beh用用政治ê方法來取得國家安全保障。先知以賽亞就bat警告in講,這是愚戇ê念頭kah做法(參考以賽亞書二十:5—6、三十:1—3、三十一:1)。M̄-koh先知ê信息hō͘ in知影,若無上帝伸手庇護,就算擁有強大ê軍事武力mā是枉然。

第30到34節,chit段經文koh一pái說明以色列民族所做chit種棄sak上帝,去拜偶像神明行為ê氾濫行踏,就「像無恥ê妓女」仝款,連一點見笑感mā無。M̄-koh in是比妓女koh khah慘,妓女是為tio̍h thàn錢出賣肉體,m̄-koh以色列民族根本就是只為tio̍h滿足淫亂ê心去行淫,iáu「贈送禮物倒貼情郎」,只為tio̍h滿足家己ê慾望,「出錢去雇情郎」,這真正hō͘上帝無法度容忍。

重新查詢 專卷研經 以西結書系列
錯誤回報,請聯繫comm[@]fhl.net