以西結書 14章12節 到 14章23節   背景資料  上一筆  下一筆
Chit段經文真重要,講出對上帝信仰ê忠誠,m̄是靠祖先累積ê成果做憑據,卻是每一個人一定tio̍h為家己ê信仰態度kah行為向上帝負責。Tī chit段經文mā提起上帝所用ê懲罰是非常嚴重ê,chiah-ê懲罰包括戰亂、饑荒、野獸,kah瘟疫等四種驚人ê災難,作者希望用chit種警語hō͘大家醒悟過來,而會即時改邪歸正,順服上帝ê教導。

Koh講,chit段經文mā提起聖經siōng常出現ê代禱功課,ná親像亞伯拉罕為所多瑪、蛾摩拉城ê罪惡代求仝款,希望慈悲ê上帝會赦免犯罪ê人民。Chit段經文mā提起三位tī傳說中ê信仰模範生,包括有挪亞、達尼爾,kah約伯這三人,m̄-koh就算是有án-ne信仰楷模者tī,in mā只有ē-tàng救家己,卻m̄是因為有in三人,上帝就赦免了所有棄sak上帝去做邪惡ê tāi-chì ê人。

第12到134節,對tī一再悖逆ê子民,上帝最後採取懲罰ê方式,就是用嚴重ê「饑荒」當做懲罰方式。當人kah cheng-seⁿ lóng面臨iau餓ê性命威脅ê時,chiah會發現家己ê軟弱、有限,而且in所拜ê偶像神明mā bē-tàng做甚麼,kan-taⁿ會hō͘人放sak。

第14節,chit節kah第20節仝款。

Chit節提起「挪亞、達尼爾,kah約伯三個人」,這是古代真有名望ê人,是大家公認ê義人,in lóng有真好ê「義行」。Chia ê「達尼爾」,其希伯來文是「Dani’el」,中文《和合本》用「但以理」,為tio̍h kah聖經中ê「但以理」區別(希伯來文是「Daniyye’l」),所以《現代中文》譯本用「達尼爾」chit-ê名字。不過聖經中只有tī chia出現「達尼爾」chit-ê名字,並無記載關係伊ê事跡。先知以西結想beh表達:chit三個人lóng是上帝眼中ê「義人」,m̄-koh就算有in ê代禱,上帝會垂聽,in mā「只有ē-tàng救家己」,因為拯救ê恩典kah主權是tī上帝手中,並m̄是來自某一個人。無任何人ē-tàng救別人免tī上帝忿怒ê懲罰。

第15到16節,chia講上帝會用「野獸」來懲罰悖逆ê子民。即使是有挪亞等「三個人tòa tī hia,in mā無法度救家己ê kiáⁿ;in只有ē-tàng救家己,而土地會變成荒野」,chit點真清楚teh警告已經被掠到巴比倫做奴隸ê以色列kah猶大人民,m̄-thang總是期待有祖先á是信仰偉人ê代求,he是無用ê,只有家己認罪悔改chiah是正途。

第17節,chit節提起「遭遇戰亂,銳利ê刀劍」,chiah-ê lóng是teh指戰爭,表示上帝懲罰ê一種方式。Chia指出嚴重到「Kā人kah cheng-seⁿ lóng刣了了」,表示徹底毀滅ê意思。

第18節,chit節kah第14節、第16節、第20節等等仝款。

第19節,chit節提起另外一種懲罰,就是「瘟疫」,而且是非常厲害,因為teh傳染病「猖獗」之下,死亡會降臨hō͘「人kah cheng-seⁿ lóng刣了了」。

第20節,koh一pái重複第14節、第16節、第18節ê句話。

第21節,「戰亂、饑荒、野獸,kah瘟疫」,chia講此四種是「siōng驚人ê災難」,意思是teh指超過人ê能力thang防止á是降低死亡。Chit節mā特別指出chit四種「驚人ê災難」是beh降臨到「耶路撒冷」,當做上帝懲罰hit-ê城人民ê惡質行為。

第22到23節,當大災難來臨ê時,若「有人佳哉免得,koh救出了伊ê kiáⁿ」,chia先知以西結特別提醒,m̄-thang認為chiah-ê逃出來ê人是khah好ê,á是照上帝ê話去遵行ê,不,只要「注意觀察」,就會發現in是「jōa-ni̍h-á邪惡」、敗壞,因為án-ne,tùi chiah-ê逃出來ê人ê身上kah行為,tú好thang來證明上帝會án-ne嚴厲懲罰耶路撒冷,並m̄是無端冤枉人,卻是lóng「有理由」,而且chiah-ni̍h嚴厲ê懲罰是「應該ê」。Chiah-ê人只不過是目nih-á地存活落來。

重新查詢 專卷研經 以西結書系列
錯誤回報,請聯繫comm[@]fhl.net