Chit段經文是針對猶大人民中間ê女假先知所講責備ê話。Tī以色列ê歷史中，有出現過女先知，親像摩西ê阿姊美莉安（參考出埃及記十五：20）；士師時代ê底波拉 mā是（參考士師記四：4）；tī約西亞王時代mā出現戶勒大女先知（參考列王記下廿二：14）；tùi巴比倫回鄉了後koh一pái出現ê女假先知挪亞底（參考尼希米記六：14）；而耶穌出世ê時耶路撒冷mā出現一位女先知名叫「安娜」（參考路加福音二：36）。M̄-koh只要是先知，意思lóng是teh指上帝ê僕人，lóng應該嚴格遵守傳達上帝啟示ê話，bē-tàng有虛假、捏造ê事發生。

Tī chit段經文mā指出chiah-ê女先知，ná親像迦南地普遍ê占卜者、女巫、行法術ê婦女。以色列人民進入迦南地後深受影響，有人學自迦南人ê chit種巫術，mā扮演tio̍h先知ê角色（參考彌迦書三：11）。

第17節，「tī民間編造預言ê婦女」，表示是假ê，m̄是tùi上帝來啟示ê。照申命記ê規定，無論是男是女，只要是假先知，lóng一定tio̍h處以死刑（參考申命記十三：5）。

第18到19節，「手腕上ê魔帶，製頭殼頂ê魔罩」，這是迦南地婦女ê風俗，講chiah-ê物件thang做避邪ê路用。現在女ê假先知mā用chit種方式「當做一種符咒，thang hō͘ in ē-tàng操縱人ê性命」，這就是一種邪門奇術，為tio̍h是beh迷惑別人，á是用來控制別人ê行動，in是用chit種方法tī「左右」上帝「子民生死」，為tio̍h是beh「求家己ê利益」，這是一種詐騙ê行為，bē管伊人生á是死，只追求己利，甚至mā會「為tio̍h幾kā大麥，幾塊餅」，就會傳講一大堆假話，chit種情形tī北國以色列mā發生過（參考彌迦書三：5）。

「無應該死ê，lín刣死；該死ê，lín hō͘ in活teh」，這是teh指假借上帝ê名，進行殺害無辜ê性命，這是上帝siōng痛恨ê行為。

「Lín向我ê子民講白賊，in竟相信了lín」，這是一句非常反諷ê話，表示上帝ê子民竟然會相信chiah-ê透過占卜、算命、觀兆等法術，卻m̄相信一路tùi埃及帶領in祖先行出來，pôaⁿ過生存非常困境ê曠野，進入流奶kah蜜ê迦南地，這mā是令上帝感覺非常艱苦心ê原因。

第20到21節，是上帝beh處置chiah-ê猶大人民，kah tī in中間ê女先知。
上帝beh「撕下hiah-ê魔帶，解救被lín控制tio̍h ê人」，表示beh kā chiah-ê女先知所用來欺騙別人óa靠為生ê法術器物lóng拆毀，這是teh指chiah-ê法術會失去效力，無任何作用。Hō͘忠實tī上帝ê子民「永遠bē koh受」chiah-ê假ê女先知「控制」。

第22到23節，是上帝說明前兩節審判ê理由。Chia講上帝beh hō͘「好人」恢復對上帝ê信心，知影確實有審判。並且beh結束chiah-ê假ê女先知所講ê一切預言。