以西結書 13章1節 到 13章17節   背景資料  上一筆  下一筆
Chit章談起有關假先知囂張ê情景,先知以西結講chit種人危害猶大人民非常大,因為in lóng是亂使用上帝ê名傳達虛假ê信息。Chiah-ê假先知中m̄-nā有男ê,mā有女ê假先知。換句話講,tī主前第六世紀時代,猶大國真正是假先知四界猖獗,án-ne chiah是真正致使猶大國滅亡ê另外一個重要因素。因為假先知傳出來ê信息會誤導民眾偏離上帝ê道jú來jú遠。

Chit段經文是談起假先知所帶來ê問題,m̄-nā無幫助猶大人民免tī災難臨身,koh khah嚴重ê,是帶來koh khah悲慘ê結局。Chiah-ê假先知主要問題在tī in是kā家己ê意念、想法,當做是上帝ê啟示。Koh講,in是想用家己所講ê,來「逼」上帝應驗,因為án-ne,上帝絕對bē赦免、不原諒chiah-ê假先知,一定會嚴厲懲罰in。

第1到2節,假先知siōng the̍h手ê方法,就是「家己編造預言」,m̄-koh真先知kan-taⁿ會傳達上帝ê ài in講ê話(參考列王記上廿二:14),m̄是為tio̍h beh討人歡喜。

第3節,「愚戇ê先知有災禍à」,chia ê「愚戇」一詞tú好kah「智慧」相對。「愚戇」是teh表示對上帝ê認bat完全無知ê意思,而「智慧」則是teh指認bat上帝(參考箴言一:7、九:10)。Chit句話已經真清楚指出對上帝m̄-bat ê假先知,就無可能會講出上帝ê信息來指引人行正確ê道路。因為án-ne「in ê靈感是家己幻想ê;in ê異象家己編造ê」。

「靈感」、「異象」,這lóng是上帝對先知啟示ê方式(參考民數記十二:6)。假先知敢做chit種事,tú好顯示in ê心中根本m̄相信有上帝(參考詩篇十四:1—3)。

第4到7節,chit段話講出假先知ê幾個特色:

一是「跟tòe tī廢墟內出入ê狐狸仝款無用」。聖經作者用「狐狸」來表示kan-taⁿ會破壞、踐踏,一無好處(參考雅歌二:15)。Mā被用來形容是kah蛇仝款ê「奸巧」之動物。Koh講,chia ê「狐狸」一詞,mā有ê翻譯本用「野狗」,in通常會集體出入,mā tī廢墟中chhōe腐屍ê肉食(參考耶利米哀歌五:18)。

二是kan-taⁿ會bih起來tī廢墟中四界遊蕩,chhōe機會圖己私利。當發現「城牆ê缺口」出現ê時,bē想beh去「修補」,看見「倒落來ê低圍牆」mā bē想beh去「修建」。Chia所講「城牆ê缺口」、「倒落來ê低圍牆」,lóng是teh指一個國家、社會發生了問題ê意思。

因為án-ne,「當上主ê日子來臨、戰事發生ê時chūn」,猶大人民只有ē-tàng眼睜睜地看tio̍h因為聽從假先知ê話為家己帶來ê災難,無能力保衛家己免受災害。因為上帝講祂「並無差派in」,in就無法度kā猶大人民講怎樣chiah ē-tàng避過災難。

第8到9節,上帝講beh「對敵」chiah-ê假先知。「對敵」一詞,thang參考以西結書第五章8節,表示上帝kā kah chiah-ê人成做仇敵,會進行審判懲罰in。Chia mā講出上帝beh án-ne懲罰假先知:

一是「bē-tàng參加我子民ê聚會」,表示上帝kā遠離in,án-ne,in永遠聽bē-tio̍h上帝憐憫ê消息。Koh講,chit句話mā表示tī敬拜上帝ê聚會場合,m̄准chit種會亂使用上帝ê人進入,beh kā chit種人當做是外族人仝款。

二是「in ê名bē-tàng登記tī以色列家ê名冊上」,這意思是beh tùi族譜中kā chiah-ê人ê名hō͘刪除。表示tī in ê族群中,已經無chit種人,因為是見笑ê記號。

三是「絕無法度tńg來到以色列故土」,表示in無法度成做「殘存ê人民」、「劫後餘生」ê子民。換句話講,重建家園ê榮譽in無份。因為in就是殘害猶大人民受難,而且是逼kah猶大人民遠離上帝ê禍首。

以上三項懲罰表示kā in完全排除tī猶大人民中間,上帝ê選民m̄准有chit種人tī內面。

第10到12節,koh一pái舉出假先知ê特色:

一是「哄騙」,意思講白賊,講不誠實ê話。

二是「講:『平安!』,其實並無平安」,thang參考第16節,表示chit-ê信息是假ê,m̄是tùi上帝來ê信息(參考耶利米書六:13—14、八:10b—11)。

三是「用石頭堆砌ê牆,先知刷上白灰」,這是一種譬喻,mā就是無真實打造起來ê牆,外面用iáu未浸過ê「白灰」塗抹tī牆面上,hō͘外表看起來亮麗,內面卻是lóng無連結穩固ê氣力,chit種牆真緊to̍h會倒落來。因為是假ê,當事件來臨ê時,chiah-ê假牆真緊to̍h會倒落來,看見ê人就會問講:「Lín粉刷牆有甚麼路用?」是嘲(sau)笑ê意思。

第13到14節,koh一pái重複敘述第10到12節ê經文所譬喻不真實ê砌牆工程。Á其結果是倒落來ê牆會「壓死」chiah-ê聽從假先知話語,kah講假信息ê眾先知。。

「Lín就知影我是上主」chit句話,chit句話tī本章中一再重複出現tī第21節、第23節。Tī以西結書中共計出現有chē kah 52次ê chē,作者用這句來表示猶大人民lóng是tī受tio̍h嚴厲懲罰而帶來苦難了後,chiah會醒悟過來。

第15到16節,thang看出上帝是會受氣ê,雖然祂是憐憫慈悲,不輕易受氣,m̄-koh對hiah-ê專門teh假冒祂ê名,傳不實信息ê假先知,上帝一定會「傾倒」祂ê「大受氣」,用以嚴厲懲罰chit種人。Chit種「大受氣」就是第9節所提起ê三項。

只要是假先知,無論in講jōa-chē「平安」,都無用,m̄-nā無平安,反卻是帶來滅亡。

重新查詢 專卷研經 以西結書系列
錯誤回報,請聯繫comm[@]fhl.net