這是第五個災難，mā是致使性命死亡ê瘟疫之災。Tī舊約聖經，先知耶利米一再提起上帝懲罰悖逆ê以色列人，就是用「戰爭、饑荒、瘟疫」等chit三種（參考耶利米書十四：12、十六：4、十八：21、廿一：7、9、廿四：10、廿七：8、廿八：8、廿九：17）。以色列人離開埃及後，tī曠野mā一再得罪上帝soah tú-tio̍h上帝懲罰所帶來ê瘟疫（參考出埃及記三十二：35、民數記十一：33）。

第1到5節，因為埃及國王「心猶原剛硬」，因為án-ne，上帝koh一pái差遣摩西去告誡埃及，特別hō͘埃及王知影，伊所藐視ê「希伯來人ê上帝」ài伊「放以色列人民行」，thang hō͘ in去「敬拜」上帝。Koh一pái說明宗教信仰ê重要性。如果埃及王拒絕，上帝一定會用「驚人ê災難」，mā就是瘟疫來懲罰伊kah埃及人民。

第4節kah第八章23節仝款，上帝ài kā以色列人tùi埃及人中區別出來，以色列人無親像埃及人會受tio̍h瘟疫ê災難。當埃及人ê家畜大量死亡ê時，以色列人ê家畜連一隻mā bē減少、死去。

第6到7節，摩西向埃及國王講完上帝chit種信息ê隔工，埃及人ê牲畜果然大量暴斃，á以色列人卻連「一隻mā無死」。當埃及王聽tio̍h以色列人ê家畜lóng無受tio̍h傷害ê時，伊非常受氣，m̄-koh心iáu是仝款「剛硬」。

Chit-ê瘟疫ê災難thang看tio̍h損失ê雖然是家畜，m̄-koh，埃及ê經濟是受tio̍h重創ê。表面上是馬、驢、駱駝、牛、綿羊，kah山羊等損失，m̄-koh像馬、驢、駱駝、牛等iáu牽涉tio̍h交通、運輸，以及種作ê問題，因為in大量死亡á hō͘埃及全國陷入半遂。