出埃及記 9章13節 到 9章35節   背景資料  上一筆  下一筆
這是第七個災難,所講ê「冰雹之災」。Tī十個災難中,thang kā它分做三組,一是第一到三ê災難;二是第四到六ê災難;三是第七到九ê災難。第十個災難是總結。第一組災難是一種警告,無算嚴重。第二組災難就開始有經濟上ê重創,kah身軀ê痛苦。第三組災難除了經濟災難外,koh khah嚴重ê是開始有驚惶kah不安出現。

第13到21節,koh一pái強調「希伯來人ê上帝」,chit種用語lóng是故意beh hō͘埃及國王知影,伊所藐視ê chit位大地主宰真正受氣à。祂一定會埃及王放祂ê人民離開,thang hō͘ in去「敬拜」祂。Tī chia,特別強調頂pái ê瘟疫,上帝有憐憫,kan-taⁿ tī家畜動物,無tī人ê身上出現,若無一定會有真chē人死去。M̄-koh chit種冰雹災難,連國王mā tio̍h「同齊懲罰」,只有án-ne,埃及王chiah會相信家己m̄是神,卻是chit位伊所鄙視(siùⁿ)ê大地之主—以色列人民ê上帝,chiah是真正神。上帝ài摩西去kā埃及國王講,祂會用冰雹來嚴懲伊kah伊ê人民。

第20到21節,chit兩節真值得注意,一則「國王ê一kóa臣僕因為上帝驚惶,kā in ê奴隸kah牲畜lóng趕進厝內」,免得受冰雹打擊á死去。換句話講,埃及國王ê重臣開始有人相信摩西kah亞倫à。M̄-koh hiah-ê m̄相信ê人,根本m̄ kā上帝ê警語當做一回事,照常hō͘奴隸kah牲畜留tī田裡工作。

第22到26節,chit-pái ê災難包括埃及「人民、牲畜,kah所有ê植物」,而且災難之大,是「埃及有史以來siōng大ê冰雹災難」,kā「埃及境內田野裡ê一切lóng摧毀了」,這包括hiah-ê無tī厝內ê「人、牲畜、田裡ê農作物,kah所有ê樹木」。注意第26節,chia koh強調「以色列人民khiā起ê歌珊地區無冰雹」,chit句話明顯講出上帝已經kā以色列人kah埃及人區隔出來à。這mā說明當埃及人民受tio̍h極大ê痛苦ê時,想beh掌控以色列人ê能力就相對降低。

第27到32節,頂pái埃及國王講ē-tàng hō͘以色列人mài離開siuⁿ遠去敬拜上帝,m̄-koh伊食言(參考八:28)。Chit-pái,伊看見事態嚴重,終其尾第一pái承認家己「犯罪了」,而且講伊kah伊ê人民lóng「m̄-tio̍h去;上主是對ê」,chit種承認,是真大ê進步,表示伊已經知影家己m̄是神,mā無能力抵擋chit位伊所看bē起ê希伯來人ê上帝,chit位ài祂ê以色列子民去曠野獻祭敬拜ê上帝。

M̄-koh,mā有kóa學者認為第27節ê埃及國王所講ê,並m̄是真正承認家己有錯,卻是一種政治術語,表示埃及國王承認伊過去是誤判à。chit-má伊tio̍h正確判決,thang hō͘以色列人去敬拜上帝。因為án-ne,伊要求摩西kah亞倫向上帝祈求停止冰雹災難,á以色列人「m̄免koh再留tī」埃及。

摩西聽了後,除了hō͘埃及國王知影上帝就是大地之主,所以ē-tàng真清楚劃出災難ê界線,hō͘以色列人khiā起ê歌珊lóng無災害出現,這是大地ê主宰chiah有ê能力。M̄-koh同時摩西mā警告埃及國王,伊對國王ê信任度已經降低à。

第31到32節講出埃及siōng主要ê經濟作物,就是大麥、麻等lóng受tio̍h嚴重損害,á值得注意ê是第32節特別提起「小麥無受損」,因為這是人民ê糧食,希望因為án-ne,hō͘埃及人民ē-tàng醒悟過來。

第33到35節,ná親像摩西所警告ê,當埃及國王看見冰雹停止了後,「伊kah伊ê臣僕ê心koh剛硬起來」,chiah-ê臣僕並m̄是真正關心人民ê苦難,kan-taⁿ會強化埃及國王心ê剛硬,拒絕放以色列人民離開。

重新查詢 專卷研經 出埃及記系列
錯誤回報,請聯繫comm[@]fhl.net