出埃及記 7章14節 到 7章25節   背景資料  上一筆  下一筆
Tùi chit章14節開始到第十二章36節,記載出埃及前連續發生ê十個大災難。Á chiah-ê災難lóng kah埃及國王ê「心剛硬」有密切關係。Tī所有chiah-ê災難中,一再重複提起ê一個重要主題是:ài埃及國王hō͘上帝ê子民離開。目的是為tio̍h beh hō͘以色列人民學習敬拜上帝。換句話講,苦難ê基本原因,是因為in tī埃及生活已經長到四百gōa年(參考十二:40),早to̍h bē記得kah上帝ê約。因為án-ne,出埃及,為tio̍h是beh重新建立約ê關係。

Chit段經文是記載十個大災難中ê第一個災難。Tùi日常飲用ê水開始,hō͘人生活感受tio̍h痛苦,ná親像以色列人民tī奴役中ê痛苦仝款。

第14到18節,這是上帝對摩西講,伊知影埃及國王會到尼羅河去,ài摩西kah亞倫過去hit-pêng見國王,並且hō͘伊知影,伊ê「心剛硬」是上帝受氣ê原因。Chit-má koh一pái對國王表示,一定會hō͘以色列人民離開,去曠野敬拜上帝。若是不聽,尼羅河ê水會變成無法度lim ê血水,「魚lóng tio̍h死了了,河水會發臭,hō͘埃及人不ē-tàng lim這水」。

第16節是十個大災難ê主要中心經文。Chit節講埃及國王「一直不聽」上帝,m̄-koh,上帝ê奴僕是聽從上帝(參考七:6)。

第19節,其實嚴重性m̄-nā是尼羅河ê水變成血水,卻是埃及全國各地,只要有水ê所在全部lóng變色,無法度lim。

第20到21節,這是第一個災難,mā kā它稱做「血災」,而且tùi尼羅河下手。Á尼羅河是埃及人民生活ê命脈,如果尼羅河變色,mā是teh暗示埃及人民ê生活teh beh進入苦難中。

第22到24節,chia講出一個無知ê國王,伊身邊ê術士雖然ē-tàng行法術,m̄-koh m̄是kā已經有ê大災難降低á是減輕,卻teh表示in mā有chit種能力hō͘水變成血,結果是hō͘埃及全國雪上加霜,災難koh khah大。Chia講一個愚戇到極點ê國王並無kā人民受tio̍h ê災難hē tī心上,卻是iáu想kah上帝比高低。這是伊ê心「比以前koh khah剛硬」ê態度。

第25節,chit節講「災難繼續了七工」,表示埃及人痛苦到極點ê意思。

重新查詢 專卷研經 出埃及記系列
錯誤回報,請聯繫comm[@]fhl.net