出埃及記 34章1節 到 34章9節   背景資料  上一筆  下一筆
第1到28節lóng是「耶和華文獻」ê資料,然後tùi第29到35節是「祭司文獻」。Chit章ê主題講tio̍h上帝kah以色列人重新立約,並且頒布新ê兩塊石版。不過,爭議比較多ê是tī第28節,本來ê石版只有寫十誡,chit節講石版上寫ê (第14到26節)kah本來第二十章1到17節ê十誡無相仝。會有chit種差別,kah資料ê來源無仝有關;tī第二十章ê資料來源是「以羅伊文獻」ê資料,á chit章是 「耶和華文獻」ê資料來源。

因為頂pái上帝親自寫tī石版頂ê法典已經tī摩西知影以色列人民悖逆上帝ê時,忿怒ê摔tī土腳pháiⁿ了(參考三十二:19)。chit-má上帝ài摩西家己準備兩塊石版上山去,上帝ài伊kā誡命寫tī石版頂。

第1節,上帝ài摩西重新準備兩塊石版,然後上帝ài kā摩西所摔pháiⁿ ê ná兩塊石版上重新「寫tī chit-ê兩塊版上」。

第2到4節,摩西照上帝ê指示準備好,就上山去見上帝。上帝不准任何其他人kah摩西同齊上山,只准摩西一個人上去。

第5節,「上主tī雲中降臨」,chit句話一再出現tī出埃及記,表示上帝m̄ hō͘人看見祂ê面ê摩西死去,用雲彩遮tio̍h祂ê面,後來聖所約櫃前ê帳幔mā就teh代表chit種意義。

Koh講,chit句「宣告伊ê聖名—耶和華」,是teh指摩西teh呼求上帝ê聖名,表示一種o-ló、歌頌ê意思。

第6到7節,講出kui本聖經ê中心信息,說明上帝「是滿有慈悲憐憫ê上帝。不輕易發怒,有豐富ê慈愛kah信實」。聖經若出現「信實」chit-ê詞,表示堅持所立ê約,無放棄ê意思。Chia「千萬代」chit-ê詞表示永遠ê意思。Á kah「三、四代」相比,就成做鮮明ê對比,表示上帝ê疼贏過上帝ê忿怒。

第8到9節,摩西無替任何以色列人辯護,伊知影家己ê族人真「頑劣」,伊只有祈求上帝憐憫「赦免」in ê「罪惡過犯」,繼續接納以色列人作祂ê「子民」。這ná親像耶穌tī譬喻中所講ê hit位抽稅ê人tī聖殿向上帝祈禱ê時講,求上帝憐憫伊是一個罪人仝款(參考路加福音十八:13)。

重新查詢 專卷研經 出埃及記系列
錯誤回報,請聯繫comm[@]fhl.net