Chit章主要是「耶和華文獻」ê資料（第1節、第3到4節、第12到23節），á「以羅伊文獻」ê資料是第6到11節，「祭司文獻」ê資料只有第2節。編輯者則加上第5 節。

Chit章thang看tio̍h慈悲ê上帝雖然tī極大忿怒中降落瘟疫懲罰以色列人，m̄-koh祂iáu是堅守kah以色列人ê祖先所立之約。Chit章mā講上帝無koh親自帶領以色列人前進迦南，卻是差派天使帶領in，chit種敘述句tú好說明tùi拜金牛偶像神明ê事件了後，上帝kah以色列人之間有「距離」。

Chit段經文是續接第三十二章34節後面，上帝講beh派天使kah以色列人同行，祂無koh親自帶領，chit件事hō͘以色列人感覺相當「悲傷」。Tùi chit段經文mā thang反省一個重要信仰主題：犯罪累累ê子民，怎樣ē-tàng期待上帝同在、帶領？

第1到2節，chit節iáu-koh繼續提起上帝kah以色列人ê祖先ê約定，beh帶領in進入應允「亞伯拉罕、以撒、雅各，kah in後代」到上帝賞賜ê土地去khiā起。Tī chia並且koh一pái提起hit所在是當地原住民khiā起ê土地，chiah-ê原住民lóng是當時迦南地ê族群，包括有迦南人、亞摩利人、赫人、比利洗人、希未人，kah耶布斯人等，這六族一再被提起。

第3節，是真重要ê一節，mā ē-sái講是上帝對以色列民族siōng大ê懲罰，雖然祂應允一塊非常肥而且流奶kah蜜之地hō͘ in，m̄-koh上帝卻無kah in同往，這表示上帝iáu-koh履行祂ê約，m̄-koh無上帝同在，就算土地koh再美mā是枉然。因為chiah-ni̍h súi ê土地，真緊to̍h會hō͘外族入侵á喪失所有。這mā是基督教信仰siōng重要ê認bat：無上帝，就會失去所有ê一切。有上帝同在，欠缺ê一切lóng會得tio̍h補足。有上帝，chiah會有一切。

Koh講，當初上帝ài摩西帶領以色列人建造聖所，而且製造約櫃放入去祂kah以色列人所立之約，表示上帝kah in同在。taⁿ上帝講boài kah in做伙，án-ne，聖所ê建造等於無用，mā無意義。

第三，chia講上帝m̄ kah以色列人民同行，原因是in「頑劣」，上帝可能會koh再因忿怒á懲罰in致使koh khah chē人死亡。因為án-ne，m̄ kah in同往，這mā是一種「恩典」，m̄-koh另外一個面向，卻是懲罰。

第4到6節，以色列人chit-má已經清楚了，若無上帝，in就算擁有ná肥koh流奶kah蜜之地，mā是無用。因為án-ne，in lóng感覺相當ê「悲傷」，決定「無koh配戴裝飾品」，á上帝mā決定tī in無koh配戴任何裝飾品後，beh koh再查看in是m̄是真正懺悔，á是只是表面上ê懺悔而已。就án-ne，以色列人決定取落來身上所有配戴ê裝飾品，表示悲傷、哀慟ê謙卑樣式。