出埃及記 3章11節 到 3章22節   背景資料  上一筆  下一筆
Chit段經文teh說明上帝怎樣hō͘摩西順服祂ê揀選,以及上帝koh一pái紹介祂家己hō͘摩西koh khah清楚認bat。

第11到12節,摩西聽tio̍h上帝呼召伊tńg去埃及,伊第一個反應是:「我算甚麼?我怎樣ē-tàng到埃及王hia去,kā以色列人領出來?」chit句話thang參考第二章15到16節,摩西真清楚家己是埃及朝廷通緝ê要犯,tńg去埃及等於自投羅網。M̄-koh上帝真肯定kā伊講,beh kah伊同在,而且ài伊帶領以色列人民離開埃及後,到chit山頂來敬拜上帝。

第13節,chit節是摩西第一pái推託,伊無想beh接受上帝ê呼召。伊問ài怎樣紹介上帝hō͘以色列人民知影?Chit種紹介tī東方社會siōng重要ê,就是tùi名開始。

第14到17節,chit段是上帝紹介家己hō͘摩西知影。

「創始成終ê主宰」,意思是kui個宇宙萬物ê開始,就是tùi chit位創造者開始。所以,tī宇宙萬物iáu未開始chìn前,chit位主宰就已經存在。Chit位宇宙ê主宰,bat kah以色列人民ê祖先「亞伯拉罕、以撒、雅各」有密切關係。因為知影in受苦,所以差派伊去帶領in。並且mā ài摩西kā in講,上帝beh帶領in出來到一個新ê所在,he是「流奶kah蜜ê肥土地」。對以色列人民來講,chit位「創始成終ê上帝」之所以重要,是因為chit位上帝乃是「in祖宗ê上帝,是亞伯拉罕、以撒、雅各ê上帝」。

第18到20節,這是上帝對摩西講ê差遣之第二段話。

上帝ài摩西去帶領以色列人民ê「眾領袖去見埃及王」,然後beh對埃及王講,「希伯來人ê上帝」ài國王准伊帶領以色列人民「行三工ê路程,到曠野去」向上帝獻祭敬拜。

Chia特別用「希伯來ê上帝」,表示這tī埃及人眼中根本是無甚麼能力ê上帝。而且beh tī曠野敬拜chit位上帝,表示chit位上帝真窮,chiah會khiā起tī曠野。有甚麼人會想tio̍h,上帝ài摩西帶領以色列人民tùi埃及出來,竟然是beh到「曠野」,這kah富裕ê埃及是非常大ê cheng差。

第19到20節,chit兩節真清楚說明埃及王無可能chiah-ni̍h輕易就放以色列人民離開,因為以色列人民就是埃及工業ê奴工,hō͘ in離開,等於hō͘埃及ê經濟陷入困境。上帝知影一定tio̍h透過「各種神跡來懲罰埃及」,chiah會hō͘埃及放以色列人民離開。

第20節mā是為第七到十一章chit段經文所記載上帝用各種神跡來懲罰埃及人先留落來伏筆。

第21到22節,chit兩節是上帝對摩西所講ê第三段話,mā為後來第十二章33到36節預留伏筆。

上帝講以色列人民離開埃及ê時,「bē空手離開」,表示bē hō͘ in以奴隸ê樣式離開,因為奴隸無法度帶走任何物件,包括in tī主人厝裡所得tio̍h ê kiáⁿ孫kah產業。上帝會hō͘以色列cha-bó͘-gín-á帶tio̍h「金銀、首飾,kah衫褲」離開,表示是真有尊嚴地離開埃及。這ná親像雅各tio̍h離開拉班ê厝,帶tio̍h家己ê bó͘-kiáⁿ以外,iáu帶tio̍h真chē家僕、家畜動物等。拉班bat恐嚇地講chiah-ê lóng是屬tī伊ê(參考創世記三十一:43)。M̄-koh上帝hō͘雅各m̄是空手tńg去,卻是滿載á歸。


重新查詢 專卷研經 出埃及記系列
錯誤回報,請聯繫comm[@]fhl.net