出埃及記 14章1節 到 14章9節   背景資料  上一筆  下一筆
Chit章記載以色列人離開埃及後,隨時tú-tio̍h一件siōng hō͘ in擔心ê事,就是埃及國王派兵出來tui-jiok。而且是tī in行到紅海邊界ê時,埃及追兵趕到à,chit時,in面臨前無路,後有追兵ê生死關頭,就tī chit時chūn,全能ê上帝施行奇妙神跡,分開紅海ê水,hō͘ in ē-tàng安然行過,m̄-koh用紅海ê水,淹滅了所有埃及ê追兵。

Chit章mā結束loh以色列人kah埃及人之間主人kah奴隸ê關係。

Chit段經文描寫埃及國王聽tio̍h以色列人已經逃離埃及,隨時就派出精銳部隊tui-jiok。

第1到4節,上帝指示摩西帶領以色列人行到「密奪kah紅海之間,靠近巴力‧洗分ê比‧哈希錄」,chiah-ê地名lóng已經無法度考證。上帝故意ài摩西帶領以色列人行chit條路線,是beh hō͘埃及追兵有錯誤 ê判斷。Á埃及國王ê「心剛硬」,是因為伊認為若抵擋不過上帝ê能力,會hō͘伊tī埃及人民間無法度擁有神明權威,因為án-ne,jú想jú受氣,就決定派兵去tui-jiok。

第5到9節,顯然地,埃及國王後來知影以色列人已經離開埃及,會有chit種記事,真可能是因為伊喪失大kiáⁿ,心痛無停,無人敢向伊報告chit件事,mā因為全國lóng處tī痛失大kiáⁿ ê氣氛下,hō͘以色列人會得thang逃脫。因為án-ne,當事件過一段時間,伊開始整軍追緝,對伊來講以色列人離開是「失去一陣奴隸」,表示以色列人是埃及ê廉價勞力。Chia講埃及國王率領ê軍隊是非常精銳ê部隊。

重新查詢 專卷研經 出埃及記系列
錯誤回報,請聯繫comm[@]fhl.net