以弗所書 6章10節 到 6章20節   背景資料  上一筆  下一筆
Chit段經文ē-sái講是使徒保羅寫ê書信中非常特別ê一段,伊kā信仰看做是一場戰爭,ài有隨時準備赴戰場ê心理準備。原因是誘惑人棄sak上帝ê魔鬼隨時會侵入到人ê身上。因為án-ne,伊kā一個基督徒看做ná親像一個戰士仝款,是穿插「全副軍裝」上戰場去作戰。

第10節,tio̍h先注意,使徒保羅tī chia所談ê戰爭,基本上是kah用武力上戰場無相仝,chia所講ê是一種象徵性ê講法,是teh指心靈ê層面。Chia ê「主」是teh指耶穌。這清楚teh說明做一個堅強ê基督徒,並m̄是óa靠家己ê能力,卻是óa靠耶穌,chiah ē-tàng得tio̍h堅定ê信心。

第11到12節,chit兩節是siōng重要ê經文。使徒保羅kā對抗魔鬼看做是戰爭,chit種戰爭是屬靈性命存亡之戰。人ê性命一定tio̍h結連tī耶穌內面,因為只有連結tī耶穌內面,chiah ē-tàng tńg來到上帝面前(參考以弗所書三:12)。Á魔鬼主要ê工作就是想出所有ê辦法hō͘人離開耶穌。因為án-ne,使徒保羅提醒以弗所教會ê信徒,對抗魔鬼誘惑siōng好ê方式,就是kā家己「武裝」起來,kah-ná teh對抗性命ê敵人仝款,需要「全副軍裝」。

注意,這「全副軍裝」m̄是人家己設計ê,是上帝設計供應ê。因為第12節講敵人m̄是一般血肉之軀ê人,卻是邪靈界ê氣力,它是超越人ê氣力所ē-tàng抵擋。Tī第一章21節,使徒保羅講koh活ê耶穌已經「統治超越一切靈界邪惡ê執政者、掌權者、統治者,kah主宰;伊超越現世kah來世一切ê名號。」án-ne,使徒保羅ài基督徒穿「上帝所賜ê全副軍裝」,其實就是耶穌,因為只有伊chiah有超越邪靈ê氣力。

第13節,提起án-ne「全副武裝」ê裝備,為tio̍h是beh準備「tī險惡ê日子裡」用ê。換句話講,誘惑人離開上帝ê氣力,是隨時lóng teh chhōe thang滲透ê機會進入人ê心靈中。因為án-ne,需要隨時準備穿適當ê裝備,以備hit日來臨ê時,隨時thang派上用場。

第14到17節,chit段經文看使徒保羅kah-ná是一個身經百戰ê勇士仝款,其實伊寫chit封phoe ê時tú hông關tī羅馬監獄中,因為án-ne,每工看tio̍h當時siōng堅強ê羅馬軍人穿ê軍服kah手持ê武器,用chiah-ê所看tio̍h ê景象來描述一個基督徒,如果beh成做「福音ê精兵」,就應該有chit種類似羅馬英勇ê戰士仝款,是穿插「全副軍裝」,包括整套ê武器在內。伊Tī chit段經文中引用羅馬軍人ê裝備,來形容基督精兵應該有下列ê裝備:
一、以真理作腰帶(14節a)。Chia所講ê「真理」指ê是真實ê意思,mā就是使徒保羅一再強調ê誠實。

二、以正義作護胸甲(14節b)。Chia「正義」指ê是正直、聖潔ê意思。

三、宣揚和平ê福音作鞋á(15節)。甚麼是「和平ê福音」?就是teh指用疼為基礎,是犧牲、奉獻ê疼,mā就是耶穌tī十字架上ê疼。Mā因為有chit種ê疼,tī耶穌ê十字架裡,大家lóng成做「成做一體」ê共同體,因「基督親自kā和平賜hō͘咱」(參考以弗所書二:14)à。

四、the̍h信心當盾牌(16節)。盾牌,這是古代戰士必備ê武裝器具,用來保護身軀免受tio̍h敵方武器ê攻擊。「信心」是對上帝ê óa靠,m̄是óa靠家己ê聰明才智。箴言ê作者án-ne講:「上帝ê 話ta̍k 句lóng 有經過鍛鍊,見若óa 靠祂ê 人,祂就做in ê藤牌。(全民版)」(箴言三十:5)

五、以救恩作頭盔(17節a)。頭盔是用來保護頭部ê,古往今來,軍人lóng一定tio̍h帶頭盔chiah ē-tàng上戰場。為甚麼使徒保羅tī chia ài beh特別提起救恩ê事?除了保守派ê猶太人基督徒要求外邦人基督徒守割禮chiah ē-tàng得救ê事外,iáu有就是當時有真chē基督徒因為受tio̍h迫害往生,有人傳出chit種疑問講:真正有koh活mah?真正有得救ê恩典mah?為tio̍h chit種事,使徒保羅寫hō͘哥林多教會ê書信中,特別提起死人koh活ê事(參考哥林多前書第十五章),ná親像伊寫hō͘羅馬教會ê書信中所講,基督徒是kah耶穌同死,mā同koh活(參考羅馬書六:8)。基督教信仰siōng大ê特質就是講tio̍h死人koh活。使徒保羅tio̍h用弗所教會信徒會koh活當做保護siōng重要ê頭部,免得因為聽tio̍h有人放出「另外一種福音」就會失去準則。

六、以上帝ê話作聖神所賜ê寶劍(17節b )。寶劍,這是攻擊ê武器,任何軍人無法度kan-taⁿ有保護身軀ê防衛武器,iáu一定tio̍h配備攻擊敵人ê武器chiah ē-tàng得勝。只有上帝ê話語chiah真正ē-tàng攻擊敵人。因為祂ê話語是真理,是公義ê氣力,mā是siōng好ê保護網。希伯來書ê作者講:「上帝ê 話是活ê,koh是有功效ê,比一切雙面利ê 劍khah利,ē-tàng插入,甚至破開人ê 靈kah 魂,以及骨節kah 骨髓,koh ē-tàng 判斷人心內ê 慾望kah 心思意念。(全民版)」(希伯來書四:12)有上帝ê話,就是對抗敵人siōng好ê利器。

第18到20節,一個基督徒有頂面所講chiah-ê武器裝備了後,iáu是無夠ê,因為信仰中非常重要ê一件事,就是祈禱。祈禱是kah上帝對話,是走chhōe明白上帝旨意siōng好ê途徑。會祈禱ê人,chiah是謙卑ê人,只有驕傲ê人拒絕祈禱。使徒保羅認為抵擋魔鬼siōng好ê方法,就是常常祈禱,祈求上帝ê幫助。伊mā講祈禱是beh隨從聖神ê帶領,chit點是非常值得注意ê,因為聖神mā是祈禱ê靈(參考撒迦利亞書十二:10),會kā人心中無法度用語言講述出來ê話語帶到上帝面前。使徒保羅寫hō͘羅馬教會ê書信mā講過:「聖神mā 親像án-ne,tī 咱軟chiáⁿ ê時kā 咱扶持。咱m̄ 知應該tio̍h án 怎祈禱chiah 好,m̄-koh,聖神家己用人ê 話bē-tàng 表達ê 吐氣teh 替咱祈求。 鑒察人ê 心ê 上帝知聖神ê 意思,因為聖神是照上帝ê 意思來替信徒祈求。(全民版)」(羅馬書八:26—27)聖神是咱kah上帝之間對話siōng好ê橋樑kah力量。



重新查詢 專卷研經 以弗所書系列
錯誤回報,請聯繫comm[@]fhl.net