申命記 9章12節 到 9章29節   背景資料  上一筆  下一筆
Chit段經文是講tio̍h tī何烈山領受上帝十誡ê經過。Tī出埃及記第三十二章mā有記載chit件「拜金牛」事件。Hit時in因為摩西上山長到四十暝日,以色列人民認為伊已經出了意外,要求亞倫替in造金牛hō͘ in thang來崇拜,chit件事引起上帝大大受氣,並且做出決定:beh tùi性命冊上除掉hiah-ê犯罪ê人名(出埃及記三十二:33—34)。摩西重新講述chiah-ê事件,主要是teh提醒in一定tio̍h注意過去所犯ê過錯,千萬m̄-thang koh再犯。一定會對上帝忠心,án-ne chiah ē-tàng tī上帝賞賜ê土地上永遠khiā起落去。

第12到14節,摩西hō͘以色列人民知影,當上帝看見in棄sak祂,鑄造偶像神明teh拜ê時,非常忿怒,甚至想beh改變揀選ê對象,beh立摩西當做新ê族群,hō͘伊ê後代成做選民。

第15到21節,chit段經文thang tùi出埃及記第三十二章看tio̍h kui個背景。摩西hō͘這新生代知影,上帝非常忿怒in頂一代棄sak祂,去拜金牛。摩西非常受氣,kā刻tio̍h上帝頒布十誡ê兩塊石版,摔tī土腳破碎了,用chit種方式表示in kah上帝之間ê關係已經破壞à。M̄-koh摩西深驚上帝ê忿怒會消滅所有以色列人民,伊替以色列人民代求,懇求上帝憐憫赦免,特別是亞倫mā是tī伊祈求赦免之下chiah得tio̍h上帝ê赦免。Mā為tio̍h beh減輕上帝ê忿怒,摩西對以色列人民採取嚴厲ê懲罰,就是ài in kā所鑄造ê金牛磨成粉,掖tī溪水裡,hō͘人民lim下hiah-ê水,用chit種方式來表示認罪、悔改,kah潔淨家己。出埃及記mā講摩西iáu bat命令利未人lóng配劍,kā參與祭拜金牛偶像神明ê以色列人刣死,hit-pái大約有三千人被殺(參考出埃及記三十二:28)。同時摩西繼續為tio̍h án-ne事祈求上帝ê憐憫kah慈愛,甚至願意以家己ê名hō͘ 上帝刪除來換上帝赦免以色列人民(參考出埃及記三十二:32)。

第22到24節,tī第22節所提起ê「伊備拉」,thang參考民數記第十一章1到3節ê資料,「伊備拉」這地名ê意思是:上帝ê火tī hia燒in,原因是in埋怨上帝,上帝tùi天頂降火燒in。「瑪撒」,chit件事發tī出世koh名叫米利巴ê所在,以色列人民因為無水lim á埋怨摩西,上帝ài伊the̍h手中ê柺á phah石磐,結果石磐流出水(參考出埃及記十七:1—7)。「基博羅‧哈伊瓦」,tī民數記第三十三章16節提起chit所在名ê意思是「貪慾ê墳墓」,á chit位稱出現tī民數記第十一章34節,背景是以色列人民埋怨無肉食,上帝為tio̍h án-ne賜hō͘ in鵪鶉肉食,直到in因為拾拾siuⁿ chē肉,發生瘟疫,死去bē少人,in kā hiah-ê染上瘟疫á死ê人埋葬,所以有chit-ê名稱。第23節ê「加低斯‧巴尼亞」,背景記載tī民數記第十三到十四章,in因為聽信hiah-ê探子ê 回報á驚惶,拒絕進入迦南地。為chit件事,in確實付出了siōng大ê代價,只要是tùi埃及出來、年滿二十歲以上ê人,lóng無法度進入迦南地。摩西ê chit句:「tùi我認bat lín以來,lín不時背叛上主。」講出以色列人民確實kah上帝所講ê仝款,是心內真頑固ê子民(參考第6節)。

第25到29節,摩西tī chia一再提醒以色列人民,若m̄是上帝記念祂kah祖先亞伯拉罕、以撒、雅各之間所立ê約,以色列人民早就hō͘ 上帝所滅亡消失à。上帝會留落來in ê性命,是因為祂beh維護家己ê榮譽,m̄ hō͘迦南人、埃及人認為上帝無能力thang kā以色列人民帶入去迦南地。因為án-ne,祂一定會kā以色列人民帶入去迦南地。Á這mā是摩西向上帝懇求chiah得tio̍h ê憐憫恩典。

重新查詢 專卷研經 申命記系列
錯誤回報,請聯繫comm[@]fhl.net