申命記 9章1節 到 9章11節   背景資料  上一筆  下一筆
Chit章mā是仝款teh提醒以色列人民,m̄-thang認為in ē-tàng進入迦南地是因為家己真有能力,其實,是上帝teh帶領、保守,chiah hō͘ in ē-tàng phah敗迦南地ê原住民。Chit章mā提起in過去tī曠野hō͘ 上帝嚴厲懲罰ê原因,就是in無聽從上帝語所致。

Chit段經文真清楚teh提醒以色列人民,m̄-thang認為家己有甚麼特別能力thang趕走當地ê原住民,是因為上帝出手幫助ê緣故。主要lóng tī提醒以色列人民一定tio̍h謙卑,以上帝為kui個民族ê中心。

第1到3節,chit兩節thang講是回應民數記第十三章,摩西差派人去窺探迦南地,tńg來後報告講:「總是,hit 所在ê 人民勇壯,城mā 堅固koh 闊大, 阮tī hia mā 看tio̍h 亞納族。(全民版)」(民數記十三:28)chit-má,上帝beh帶領in進入迦南地,即使當地ê人民有ná「巨人」á是有高大ê城牆,以色列人民卻ē-tàng得勝。這是因為有上帝tī頭前帶領ê緣故。

第4到6節,chit段經文特別提起以色列人民一定ài會記得上帝,是祂ê緣故chiah ē-tàng順利進入迦南地,並m̄是因為以色列人有甚麼好ê德行、品行,卻是當地居民敗壞、邪惡。另外一方面是上帝為tio̍h beh履行祂對以色列人民祖先所立ê約ê緣故。

第7到11節,摩西特別Tī chit段經文中提醒以色列人民,in bat tī曠野背叛上帝。換句話講,若m̄是上帝憐憫、赦免,in早就死tī曠野了,無今á日ê機會。伊提起hit-pái引起上帝極大忿怒ê事件,當時伊上山tī hia停留四十暝日,領取上帝刻tī兩塊石版上ê十誡之誡命。

重新查詢 專卷研經 申命記系列
錯誤回報,請聯繫comm[@]fhl.net