申命記 7章12節 到 7章26節   背景資料  上一筆  下一筆
申命記ê作者一直保持一貫ê思想脈絡──遵行上帝旨意ê人,必定存活;違背上帝旨意ê人,會hō͘ 上帝所唾棄(第9到11節)。Chit段經文mā koh一pái說明chit-ê信仰準則,作者tī chia特別tùi兩個角度來強調:(1)ài會記得過去上帝tī歷史中ê奇妙作為。上帝tī歷史中所行過ê大能大事,過去án-ne,現今mā是án-ne。(2)m̄免驚惶,有上帝同在。性命tio̍h óa靠真正上帝,只要有上帝同在,就m̄驚敵人是甚麼款ê,不管是人chē,á是對方ê武力有多強,chiah-ê lóng bē難倒上帝ê子民,因為tī戰爭中,上帝會kah祂ê子民做伙,而且會為祂ê子民á戰。

第12到16節,上帝是賜福ê上帝,對tī忠實ê子民,祂ê賜福是非常實際ê,m̄-nā tī物質生活上會有美好ê收成,tī身軀上mā會蒙福。只要上帝ê子民知影忠實遵守上帝ê誡命kah命令,就會享有chiah-ê特別ê福份。

第17到21節,上帝用大能ê手kā以色列人民帶領出埃及,表示任何強悍ê族群、國家lóng無法度抵擋上帝。只要以色列人民真實信靠上帝,上帝一定會成做in ê幫助者。

第22到26節,上帝既然應允beh kā迦南地賞賜hō͘以色列人民khiā起,就表示會kā當地ê民族交hō͘ in處置。M̄-koh以色列人民一定會tī信仰上堅守對上帝ê忠實,絕對bē-tàng因為偶像神明身上有當地居民供獻ê金銀珠寶,就起貪念。只要是偶像神明lóng tio̍h徹底摧毀,包括其身上任何貴重物件,lóng是上帝所討厭ê物件。

重新查詢 專卷研經 申命記系列
錯誤回報,請聯繫comm[@]fhl.net