Chit章mā是用詩歌ê方式寫出來，是摩西為以色列人民祝福ê詩歌。對以色列人來講，長輩ê祝福是相當重要ê，因為he等於是性命最後ê財產，是無法度取代á是更改ê（參考創世記廿七：37）。

Chit章mā是teh回應創世記第四十九章雅各對十二個kiáⁿ ê祝福。整首詩歌thang分做下列段落來看；一是第2到5節kah第26到29節，chit兩個段落lóng是teh o-ló上帝ê詩歌，主要內容就是上帝乃是以色列人民唯一ê上帝，無其他ê上帝。

二是第6到25節，chit段中是對十二支派ê祝福。不過Tī chit段祝福ê詩歌中，卻欠缺對西緬支族ê祝福，真有可能是因為寫chit首詩歌ê時，西緬支族已經併入了猶大族。

Chit段是o-ló上帝ê詩歌。Mā同時ài以色列人民用敬虔ê態度敬拜chit位偉大ê上帝。

第1節，chit節真清楚講出是摩西往生chìn前為以色列人民祈福ê詩歌。

第2到5節，chia開始提起「西奈山」，就是teh提醒以色列人民ài會記得kah上帝ê約。上帝就是因為chit-ê約ê關係，賜福以色列人民，保守帶領in行過曠野ê路徑。所以需要kā上帝所頒佈hō͘以色列人民ê誡命看做國家ê寶貝，因為有chiah-ê誡命，國家chiah ē-tàng生存。Mā因為有西奈山之約ê關係，上帝就是以色列人民ê君王。