申命記 31章30節 到 32章14節   背景資料  上一筆  下一筆
Chit段是摩西以詩歌教導以色列人民(參考三十一:22),透過chit首詩歌來講述上帝kah以色列人民之間「約」ê關係,á以色列人民棄sak kah上帝之間所立ê「約」。其實,chit首詩mā thang講是上帝對以色列人民ê控訴,因為in後來iáu是背叛了祂。Thang án-ne瞭解:(1)以色列人民tī曠野時代ê時常違背上帝ê旨意,不時抱怨摩西帶領in出埃及tī曠野受苦,因為án-ne,mā預測到以後in進入迦南地,tī當地文化ê影響之下,必定會棄sak上帝,去敬拜偶像神明。Chit首詩是預言ê詩歌,為tio̍h是beh先警告in。(2)chit首詩歌可能是後來tī亡國後,想起出埃及tī曠野ê經歷,以及in棄sak上帝後,致使亡國ê運命,因為án-ne,用chit首詩歌來做後代kiáⁿ孫ê警戒kah教示。

Chit段詩歌是tùi 回憶以色列人民過去受tio̍h上帝特別ê眷顧、揀選、帶領等講起,直到in進入迦南應允ê富饒之地後,chit段期間所發生ê事。

第三十一章30節到第三十二章4節,詩歌是讀hō͘以色列全體會眾聽ê。事(tāi)先就以「呼喚天地來做證」ê方式唱出,表示chit-ê詩歌beh講述ê內容,是kah性命ê存亡息息相關。Chit段詩歌先講述chit位帶領以色列人民離開埃及ê上帝,就是偉大ê創造者,mā是公義ê神,祂ê審判公正、是值得信靠ê性命之主。

第5到6節,相對tī公正無私ê上帝,以色列人民就顯得愚戇kah無知。實在不配做chit位上帝ê Kiáⁿ。以色列人民tùi siōng弱小ê民族thang成做偉大ê國家,其實,是chit位上帝ê賞賜,m̄-koh以色列人民確實是愚昧到不配。

第7到14節,摩西tī chit段詩歌中,ài以色列人民回顧歷史,聽聽老一輩ê人講述往事,看上帝怎樣揀選in作家己特別ê子民。續落來講出上帝像la̍h-hio̍h teh照顧小鷹一般關心保護看顧以色列人民,mā像祂teh看手上ê明珠一般珍惜in。並且賞賜hō͘ in siōng好ê土地,thang tam味siōng好味ê食物,有肥ê田園kah豐富ê五穀,永遠bē缺乏。

重新查詢 專卷研經 申命記系列
錯誤回報,請聯繫comm[@]fhl.net